كان و ما زال أحد أصعب المواقف اللى باتعرضلها ..

كان و ما زال أحد أصعب المواقف اللى باتعرضلها .. هى لما أخلص شغل على مشروع معين .. ملوش تسعيرة .. و آجى أحدد سعره .. لأنى إطلاقاً مش عالم فتاك .. أو دافنشى زمانى .. أنا مؤمن إنى مجرد مهندس صغنن بيفهم إنجليزى و بيعرف يعمل سيرش كويس على جوجل .. اللى مختلف على مدار الكام سنة اللى فاتوا فحياتى .. إنى كان عندى شوية شجاعة إنى أعمل حاجات مش موجودة فى المحل اللى تحت البيت .. أو المحل اللى بعيد شوية .. يعنى باعرف أركب شوية حاجات فبعضها .. هاردوير و سوفتوير ..

و هنا كانت المشكلة .. إنى عارف إنى صغير جداً بالنسبة للى فاهم فعلاً و محترف فى المجال .. و إنى بالنسبة للى مايعرفش حاجة من أساسه فى المجال .. كبييير أوى ..

و فمصر .. و بالذات الأقاليم .. ده شىء مزعج لأن مصر كلها كدولة عالم رابع .. متأخرة عن العالم ببتاع 30 سنة على الأقل .. و معدل الأمية الثقافية و التكنولوجية كافى إنك تقنع قرى كاملة إن الأرض مستوية و العالم بينتهى عند الترعة .

فبلاقى ناس بتعرض عليا فحاجة معينة عشر أضعاف تمنها .. و فحاجات تانية … عُشر التمن !!

و الأسوء هو كيفية إستغلال البعض لجهل الأغلبية و عمل تجارة من ده ..

يعنى العطار اللى يبقى أصدق قولا من الدكتور صاحب الشهادات .. و الكهربائى السلسيون اللى بيعرف يركب “حساس سنسور” .. لو بس وريته “التيليجرام” بتاعه .. !!! (quote)

ما علينا .. فى واحد من الناس اللى فعلاً أنجز فتعليمى حاجات معينة .. eli the computer guy .. من كلامه هو : in your line of work , u gotta bullshit every one around you at some point .. but never believe your own bullshit

و شخصياً .. و خصوصاً ففترة الجيش والعياذ بالله .. إضطريت إنى أبولشيت ناس كتير .. لكن عمرى ما صدقت إنى مش عايز أهاك الفيس عشان بس ضميرى مش سامحلى .. و عشان أنا و مارك ولاد كار واحد و ماينفعش كده ..

التريند الأخير طبعاً هو العبط اللى نزل التحرير .. ببساطة ده واحد مصدق البولشت بتاعه .. و حواليه دولة فيها مناخ خصب لتنمية البولشيت .. و جميع أنواع الشيت الصراحة .

و لكن .. الله يكرمكوا .. لمن يهمه الأمر .. السطرين الجايين مهمين ..

فأحد المشاريع العجيبة اللى أطلعت على نشأتها .. فضلت أدّن .. يا بشر .. اللى بتعملوه ده عبط و غلط و فيه كمان حرمانية .. و أى حد عنده آى كيو فوق ال 100 .. ممكن يفضح عبط الموضوع ببساطة .. رد عليا أحد المنشئين .. “طب يا ريت ” سألت ” يا ريت ؟!! ” قال “طبعاً .. there is no bad publicity .. كل ما حنتشتم أكتر .. كل ما الناس حتدخل تشوف إحنا بنتشتم كتير ليه ” عند النقطة دى أنا مشيت ..

فمرة تانية .. الله يكرمكوا .. كفاية تشيير بشتيمة فى البولشيت .. مهما فضلت تقول إن التريند الفلانى عبيط و إن الناس عبط عشان مصدقينه .. فى واحد أهبل فى مكان ما حيقرا عن التريند بسببك .. و حيصدقه ..