عن الوقاية الوسطية الجميلة .. و زمن الوباء الجميل ..

عن الوقاية الوسطية الجميلة .. و زمن الوباء الجميل .. و فإنتظار إني أسمع ( عليا الحرام من وقايتي ) … في الشارع في الخناقات .

أنا خدت قرار إننا نوقف الشغل من المكتب و نخليها كلها (work from home ) من يوم التلات اللي فات .. و كنت حاسس علي مدار الأيام الأربعة اللي فاتوا إني إتأخرت فده و كان المفروض أخد القرار من أسبوع أو أكتر . … و علي مدار الأيام اللي فاتت نزلت سريعاً لحاجات بسيطة بدون التركيز علي كيفية تعامل الناس مع الأخبار اللي بتحصل . … النهاردة نزلت عشان أخلص أكتر من مشوار إضطراريين .. و ماقدرتش ماشوفش أوجه التشابه الفجة التالية :

فئة كبيرة من الناس لابسة كمامات و جوانتيات لاتكس .. و لكنهم بيمارسوا حياتهم العادية بكل بساطة خااالص .. يعني :

• شفت اللي بتخلع الكمامة عشان تبوس صاحبتها و هي بتسلم عليها لما شافتها فجأة في الشارع .. وبعدين تلبسها تاني بكل أريحية ..
• شفت اللي لابسين الكمامة علي دقنهم ( كتير من دول ) و لوهلة فضلت أسأل نفسي إذا كان عندهم خياشيم أو فتحات تنفس في دقنهم محتاجة كمامة !!
• شفت اللي لابسين الكمامة فوق الطرحة ( علي دماغهم ) .. و فضلت أسأل نفسي .. هل الموضوع كاجوالة ؟ .. شياكة يعني ؟ … و لا خايفين علي عقلهم إن الفيروس يدخل من الطرحة ؟! .
• شفت اللي لابسين جوانتيات و بيشربوا سجاير .. و بعدين يدخلوا صوابعهم فمناخيرهم .. و بعدين يلمسوا وشوشهم .. و وشوش صحابهم بكل أريحية و تصالح مع النفس برضو .
• و مصايب أكتر بكتير .. … ماقدرتش مافكرش فإن :
• نفس النوعية دي من البشر هي اللي بتلبس طرحة و نقاب و تطول دقنها و لحيتها و تقصر جلبابها .. و تحس بكل تصالح مع نفسها إنها كده أدت اللي عليها بالكامل تجاه الإسلام و دينهم .
• نفس النوعية دي من البشر .. بتختار قشور أى شيء و أى موضوع .. و تركز عليه ( حتي لو ماكنش ده مطلوب .. أو حتي لو كان ده فغير مصلحتها .. ) و لكن بيحسوا إن بتركيزهم علي القشور دي .. بيشاركوا فشيء ما بيحسسهم بقيمتهم بعض الشيء . … … دخلت صيدلية أشتري قزازة كحول إيثيلي … لقيت اللي قبلي شاب عنده 16 سنة تقريباً .. لابس كمامة و جوانتي .. و داخل يشتري شوية جوانتيات لاتيكس تانية .. سألت الدكتورة اللى بتبيع ” هو شاريهم عشان يبيعهم صح ؟ ” .. ردت ” أنا تعبت من الشرح للناس إن الجوانتي مضر أكتر ما هو مفيد ” .. و إن الصح هو غسيل الإيد بالصابون ( أى صابون ) .. و تطهيرها بالكحول عن الضرورة فقط . .. و إن الناس بقت بتشتري الكمامات و الجوانتيات .. بنفس المبرر اللي كتييييييييييير جداً بيشتروا بيه ال ( سبح , سجاد الصلاة الغاااااااااالي جداً , الخرز الأزرق و الكف الأزرق , …) و ما غيرهم من ( إكسسوارات لوك معين ) .. … اللي هو أنا عايز أكمل ال ( لوك ) بتاع الكورونا .. عشان أبقي عالموضة .. أو أكمل ال ( لوك ) بتاع رمضان .. عشان أبقي عالموضة .. … … كمية التكاسي اللي ركبتها و ألاقيه معلق سبحة علي المراية .. و حاطط مصحف فوق سجادة صلاة متطبقة عالتابلوه .. و مشغل مهرجانات ( فيديو مش مجرد صوت ) علي شاشة مركبها فوق الكاسيت … كتييييييييييييييييييييير جداً . … أنا دلوقتي متأكد إن نفس النوعية دي من سواقين التاكسي .. و من يشاركوهم نفس الأفكار .. معتنقين فكرة : ( حالبس كمامة , حالبس جوانتي ,حاأشتري كحول ) .. و ( حانزل أقعد علي كافيه أو قهوة مع الشلة , و أتمشي أتفرج علي المحلات اللي قافلة و اللي فاتحة , و أتتريق علي حال البلد , و … ) . … … ناس كتير للأسف حيكون الفترة القادمة بالنسبة لها : لبس الكمامة .. أسهل من …البعد عن الناس و عدم السلام عليهم بالبوس . لبس الجوانتي .. أسهل من .. غسيل الإيدين و البعد عن لمس وشه و وش اللي حواليه . رش الكحول علي صحابه في الشارع بهزار .. أسهل من … قعاده في البيت . الهري و الفتي بناءاً علي الكلام اللي بيسمعه في الميكروباص ال14 فرد اللي بيركبه 25 فرد … أسهل من .. إنه يسمع كلام الدكاترة و يفكر فيه و يفهمه . … … و هما نفس نوعية البشر اللي موجودة منذ بدء التاريخ … و نفس نوعية البشر اللي كان بالنسبة لهم عبادة تمثال حيوان من دهب فيه خرم بيخليه يصفر لما الهوا يدخل فيه … و إتباع السامري … أسهل من .. عبادة الله الواحد القهار و الإيمان برسالة سيدنا موسي عليه السلام .

---

---

تعمل إيه مع النوعية دي منهم ؟ فوجهة نظري : علي حسب مقدرتك إنصح ( مجرد تذكير معذرة إلي الله ) .. و الباقي ركز علي نفسك بس .. … و الله أعلم .