اللي منكم كان معايا في ثانوية عامة في العسكرية ممكن
كان في فالفصل ده عصابة منظمة ... اعضائها بيوصل عددهم لاكتر من 15 ولد .. و علي رأسهم اربع اولاد بيحششوا من وهما في اولي ثانوي
اللي منكم كان معايا في ثانوية عامة في العسكرية ممكن يكون عاش تفاصيل القصة دي معايا انا كنت ففصل اولي رابع كان في فالفصل ده عصابة منظمة … اعضائها بيوصل عددهم لاكتر من 15 ولد .. و علي رأسهم اربع اولاد بيحششوا من وهما في اولي ثانوي و كلمة عصابة هنا اقصد بها انهم ناس اتفقوا علي الفوضي و الانحراف بكل اشكاله ببساطة … انا كنت قاعد في التختة اللي ورا رؤساء العصابة دي الصراحة اني كتير كنت بفكر اي نوع من الكاريزما يمتلكه ولد عنده 15 سنة انه يقدر يسيطر علي مجموعة كبيرة بالشكل ده المهم كان في ميس فلسفة عندها حاجة و عشرين سنة و تطورت الاحداث كالمتوقع بالظبط مش لبعيد اوي الحمد لله تحرش بس و طبعا الكل عارف مين المجرم بس ماحدش بيتكلم و المرة اللي انا “احد اخطاء عمري ” اتكلمت فيها و قلت مين المسؤول .. الفصل “بالكااااامل ” الا من رحم ربي … حاول يخليني اغير شهادتي عشان ده (((( مستقبل ولد ممكن يضيع )))) و بقية الفصل التزموا العبارة الاثيرة ( انا ملياش دعوة ) .. لما جه استاذ اشرف ابو زيتحار و وقف الفصل علي اساس ان المدرسة حتاخد قرار اسطوري بشأن اللي حصل مشي ناحيتي بالخطوة البطيئة و سألني ( ايه الحل يا اسلام ؟) كانت اجابتي ( يا اما تتقبلوا انكم بتتعاملوا مع مجرمين و تجيبولنا مدرسين مؤهلين لده مش مدرسات في العشرينيات … او تتقبلوا قرار فصل تلت الفصل بلا رجعة ) سابني و مشي … … . ذكرياتي من مرحلة اولي ثانوي كتيييير اوي يمكن لان كل حاجة بتحصل في مصر حاليا بتفكرني بيها علي فكرة فمرة من المرات (رئيس العصابة دي ) شتم مدرس عربي قدام الفصل .. فالمدرس هجم عليه و قطعله البلوفر بتاعه المدرس خد خصم و عقوبة و الولد ماخدش اي حاجة … . بس زمان انا كنت دايما باقول لنفسي … دي مرحلة و تعدي و بعد كده مش حاشوف الوشوش دي تاني .. للاسف ماكنتش اعرف ان مصر عبارة عن فصل ثانوية عامة كبير شوية