بوست (طويل خلى بالك) مش سبونسرد .. بس إن شاء

بوست (طويل خلى بالك) مش سبونسرد .. بس إن شاء الله بيدخل فلوس فجيبى .. و إحتمال جيبك .. و رزقى و رزقك على الله ..والله أعلم ..

فاكر بعد إمتحانات خامسة إبتدائى .. كان كل أحلامى فى الحياة هى علبة ألوان 56 لون .. من عند مكتبة الجيل اللى فشارع عرابى .. كنت باحب الرسم و التلوين جداً .. و كنت باحترم حصة الرسم بشكل خرافى .. بس كنت فاشل جداً جداً فرسم المشاهد الطبيعية (التعبيرية) فى الوقت ده .. يمكن السبب الأساسى ففشلى فى النوعية دى هو إن المشاهد التعبيرية اللى من نوعية إرسم مشهد من حرب أكتوبر .. أو مشهد الأطفال فشم النسيم ..و الكلام ده .. كانوا بيستهلكوا ألوان معينة بشكل ضخم .. يعنى فحرب أكتوبر .. اللون الأصفر كان لازم يخلص .. و فشم النسيم .. اللون الأخضر كان لازم يخلص برضو .. و لما كنت أطلب علبة ألوان جديدة .. كان بيتم معاينة باقى الألوان .. و ماتجيش علبة جديدة إلا لو كان أكتر من 60% من الألوان فاضية :( .. أعتقد نتيجة لكده إنى بقيت أشطر بشكل أكبر جداً فى المشاهد الرمزية .. اللى هو بتقلب فيها كراسة الرسم بورتريه مش لاندسكيب .. (ولا كنت أعرف المصطلحات دى زمان طبعاً :) ) .. .. كنت باتفنن إزاى (optimize) التخيل و الرسمة عشان تستهلك القدر المناسب من الألوان .. و بعد فترة إكتشفت إنى باستمتع إزاى أحط تخيل رمزى معين جديد .. .. بعد فترة .. و بعد ما بدأت أذاكر كتب الرياضة و الهندسة بتاعت أخويا اللى أكبر منى بتلات سنين .. وقعت فغرام الهندسة المستوية .. و كنت باحس باطمئنان عجيب أول ما أشوف أى مسئلة هندسة مستوية .. for me at that time .. geometry just made sense !! .. النتيجة هى إن ميولى الفنية الصغننة دى .. إتوجهت بشكل أساسى للبرجل و المسطرة .. بقيت مغرم برسم رسومات معينة .. بعد فترة طويلة جداً (فتانية كلية ) .. إكتشفت إن اللى كنت بارسمه و ألونه و أعلقه على جدران أوضتى ده .. حاجة إسمها فراكتال جيومترى .. بص عالصور عشان تترجم :) . .. طبعاً الميول الفنية الطفولية البريئة دى .. دخلت مدرسة الإعدادى (الشهيد عبد المنعم رياض) .. حيث كانت حصة الرسم الوقت الأمثل لتصفية الخلافات بين عائلات المافيا المختلفة جوا الفصل .. و كان البرجل بيتم إستخدامه بشكل مختلف جداً .. جداً … و كان ما شاء الله فى وفره فى اللون الأحمر فكل مكان على التخت و الحيطان و الهدوم .. .. و بعد الإعدادى كان الثانوى .. حيث لا مكان على الإطلاق لأى مواهب فنية غير على ضهر صفحات الملازم و على هوامش الكتب و السكتشات فى الدروس المملة الطويلة :) :) .. .. و بعدين الكلية .. هندسة .. حيث إكتشف الفرق الضخم بين حب العلوم و الفيزياء و الرياضة عن بعد .. و بين إنك تتجوزهم و تعيش معاهم تحت سقف بيت واحد .. خصوصاً فمصر :( :( .. .. ده ميمنعش برضو من إنى بين الحين و الآخر .. ألاقى نفسى باصص على ورقة بيضاء (ضهر ورق صلاح الدين :( ) .. و ألاقى نفسى بدأت أرسم (مانجا فى الوقت ده) .. .. إلا إن فى قاعدة ذهبية بتتعلمها فكلية هندسة .. هو إنك لو لقيت العملية ساهلة فى حل مسئلة .. و مطلعش عينك و النواتج طلعت معاك بسلاسة كده .. يبقى إعرف إنك ماشى غلط :) .. if its going easy .. you’re doing it wrong .. تدريجياً .. القاعدة دى إتزرعت فأعماقى خلال حياتى العملية .. يعنى لما كنت أكتب برنامج و أو أعمل تصميم معين أو حتى أترجم بحث .. و ألاقى الموضوع خد فإيدي مثلاً ساعة بالكتير .. أحس إن أكيد فى حاجة غلط .. و أبدأ أحاسب على الشغل ده مثلاً بتمن قليل جداً .. جداً .. ..

• إنى بقيت أحس إن لو شغلى ده مطلعش عينى و خلانى كرهت نفسى و اللى حواليا و خلانى مكتئب و شايف الحياة بنظرة سودوية .. يبقى كده أنا مش شغال صح !! ..و إن الشغل اللى عملته ده ملوش قيمة .. يبقى أنا بالعب :( .. .. و يكأن القاعدة هنا هى إنى المفروض أتحاسب على قد ما بيطلع عينى .. مش على قد جودة الشغل أو قيمته !! .. المفهوم ده إتغير فحياتى مش بسهولة إطلاقاً .. مش بسهولة إقتنعت إن المفروض إن شغلى مايكونش شىء بيحولنى لقاتل متسلسل تدريجياً أو مشروع مكتئب .. و مش بسهولة إكتشفت إن الفريلانس لايف .. من أمتع أنواع الحياة اللى ممكن تعيشها .. .. أما عن قصة تسلسل حياتى العملية و أنواع الشغل و كده .. و إزاى فجأة إكتشفت إنى فعلاً باعرف أشرح .. و الأعجب إن الناس بتفهم من شرحى !! .. فدى بقى قصة طويلة تانية .. بتنتهى باللى إحنا فيه حالياً .. .. من سنة تقريباً كنت عملت سيمينار عن أساسيات المالتيميديا .. و بعده إبتديت فتدريس كورس عن أساسيات المالتيميديا فنيو فيجين أكاديمى ( New-Vision Learning-Center ) و فى نفس ذات الوقت .. كان ليا كورسين على udemy.com .. عن الفوتوشوب .. و الأفتر إيفكتس .. و بعدين بدأت أدى الكورس ف (New Horizons Alexandria ) .. .. خلال الفترة دى .. أنا كنت مازلت باعتبر كل ده شىء ثانوى جداً فشغلى .. و تركيزى الأكبر كان على البروجرامنج و الفريلانس و الstartup الصغننة اللى إبتديتها مع أصدقائى .. .. إلا أن بترتيب ربانى جميل جداً .. إلتقيت بدكتور / زينب زمزم .. و إشتغلت مع شركتها (الزمزم ميديا) .. على مشروع إن شاء الله ينزل قريباً .. (فاكر قصص الأنبياء اللى بالصلصال ؟ .. هما الناس دول ) .. الشغل ده .. حرفياً .. أعاد إحياء كل المشاعر الدفينة اللى كانت عندى تجاه حصة الرسم فى إبتدائى .. و إتعلمت فيه كتير .. جداً جداً … جداً .. و خلانى أفتكر تانى إن المعادلة الحقيقية فى شغلك بتكون على حسب إستمتاعك بالشغل .. مش بتتخنق فيه قد إيه .. لكن الأهم .. هو إنه خلانى آخد قرار كنت حاطه فى الإحتياطى لمدة 9 سنين تقريباً .. إنى أركز على المالتيميديا ككارير أساسى .. و أحول كل حاجة تانية side career .. ممكن جداً إنى أغير القرار ده فأى وقت .. لكن بالتأكيد اللى مش حيتغير هو مفهومى عن معادلة الشغل .. (على قدر إستمتاعك .. على قدر الجودة و القيمة) .. .. أما عن إيه بقى هى المالتيميديا ؟! .. و عن إزاى تدخل العالم ده لو إنت مدمن رياضة و هندسة زى حالاتى ؟ أو إزاى برضو تدخله لو بتكره الرياضة و الهندسة (زى حالات ناس كتير أعرفهم :) ) ؟ و الكورسات اللى جايه إيه و عن إيه و إمتى و إزاى ؟ و شوية حاجات تانية كتير أوى .. لسة حابقى أتكلم عنها تفصيلياً إن شاء الله ..

كل ده حيكون فى السيمينار ( أساسيات المالتيميديا 2.0 - مع العبد لله ) .. مكان السيمينار : لسة ماعرفش فين .. إسأل هنا New-Vision Learning-Center معاد السيمينار : لسة ماعرفش إمتى .. إسأل هنا New-Vision Learning-Center تفاصيل و معلومات أخرى : ممكن تسألنى .. بس أأمنلك إسأل هنا New-Vision Learning-Center

تفاصيل أكتر عن الحاجات اللى باعملها فوقت فراغى .. هنا : https://egudesign.wordpress.com/