فيلم ( هابى فيت ) .. الجزء التانى .. اللى

فيلم ( هابى فيت ) .. الجزء التانى .. اللى هو بتاع البطريق اللى بيرقص ده .. النهاية بتاعته فكرتها قايمة على كليشيه مشهور فى التاريخ الإنسانى .. إن فأقصى لحظات اليأس و الإحباط اللى وصلها البطاريق و إن حياتهم خلاص حتنتهى محاصرين بين جبال الجليد .. و أقوى البطاريق و أعظمهم حجماً … حتى الحيوانات الأضخم كمان .. واقفين عاجزين عن عمل أى شىء .. أضعف بطريق و أصغرهم (بطل الفيلم) .. بيبدأ يقنعهم كلهم بالرقص و الفكرة بتبدأ تنتشر .. لحد ما إيقاع خبط رجليهم فى الأرض مجمعين بيكسر جبل الجليد … شديتك تقرا البوست ؟ … كمل بقى .. فخطبة الجمعة النهاردة .. الإمام ذكر حديث قصة الثلاثة اللى إتحبسوا فكهف بصخرة كبيرة .. و ماتحركتش إلا لما كل واحد فيهم دعا الله بحق عمل كان عمله لوجه الله سبحانه و تعالى .. و بمجمع أفعالهم دى .. الصخرة إتحركت و نجوا من الكهف . . الإمام قال القصة بهدف تذكير الناس بذكر الله .. أنا عايز أقولها عشان هدف تانى .. . إحساسك بالعجز و الإحباط مش بيأدى غير لأنك تتعود .. لأنك مابتاخدش أى رد فعل .. فعقلك بيبدأ يسجل إن ده طبيعى .. كان حيسجل إنه غير طبيعى لو كنت خدت رد فعل من أول مرة إنتهكت كرامتك كمسلم .. لكن عشان بقالك سنين و سنين .. بتشوف و مابتتحركش .. فلو عرفت بكرة إن نفس الموضوع حصل فبلد تانية غير حلب .. حتتاثر أقل كمان من النهاردة .. فاكر إنتفاضة 2002 ؟! . . عايز حل ؟ أرقص إنت كمان .. إنت ناسى إن النهاردة يوم الرقص العالمى ؟ … مجازاً طبعاً .. . بس بجد خد أكشن .. إعمل أى حاجة و لو كانت صغيرة … بينك بين ربنا .. بينك و بين الناس .. بينك و بين أى حد .. بس خلى نيتك هى إنك خدت الأكشن ده كرد فعل على اللى بيحصل .. ماتخليش عقلك يحس إن اللى بيحصل ده طبيعى و دنيتك بتكمل عادى … خلى عقلك يحس إن فى تغيير .. أى تغيير .. . بعد فترة .. خطوة واحدة .. أكيد حتكسر جبل الجليد .. و الله أعلم