هممممممم .. بقالى كتير ماكتبتش بوستات طويلة .. بس ما

هممممممم .. بقالى كتير ماكتبتش بوستات طويلة .. بس ما علينا بوست من بوستات معذرة إلى ربى :

أحد التجارب اللى عملتها لما توانت لى الظروف .. لما ففترة من فترات حياتى اللى كنت عايش فيها فى الصحرا و العياذ بالله .. و تم إستبدال كارت الميمورى ال4 جيجا فى الوقت ده الخاص بيا .. بكارت ميمورى 4 جيجا آخر .. خاص بشخص آخر .. من صوره لاحقاً تبين إنه كان على ما يبدو يعمل نقاش . . محتويات كارت الميمورى بتاعى إجمالاً لا تفصيلاً كانت :

• 2 جيجا audio books
• 1 جيجا قرآن
• 1 جيجا (classical music like chopin , bach , mozart and like wise) . محتويات الكارت بتاعه إجمالاً و تفصيلاً كانت :
• 3.5 جيجا مهرجانات
• .5 جيجا صوره . بمجرد إكتشافى للخطأ و بعد تأكدى من فشل محاولات إعادة الإستبدال .. و بعد مسح صوره كلها .. كنت فمواجهة 3.5 جيجا من أغانى المهرجانات و العياذ بالله .. مأرشفة و مرتبة و منسقة بعناية . . و كان القرار الجرئ فى الوقت ده هو : أنا هربت من إنى أسمع الحاجات فى أى مكان منذ لحظة تفشى الوباء ده .. و لكن ليه ماعضدش الرفض المستمر من قبلى ده .. بعلم عن الوباء نفسه . و قررت إنى حاسمع ال3.5 جيجا مهرجانات .. و أوصيت أحد أصدقائى الأوفياء بإنه لو لقانى باتحول لكائن بيسقط البنطلون و بيحلق شعره كابوريا و بيلبس تيشرتات ضيقة و الحاجات دى .. ياخد الإجراءات اللازمة .. بدون تردد . . بعد أول يوم .. الألحان لا تعتبر إلا صدى صوت عقول ضاربة مخدرات شاربة حتى الثمالة .. و الكلام ردئ بيدل على غباء و جهل إن لم يكن قصد الكاتب على إثارة إشمئزاز المستمع . . بعد تلات أيام .. نفس النتيجة .. بس فى أغنية بدأ لحنها يفكرنى بأغنية أجنبى مشهورة .. بدأت تعلق فذهنى . . بعد أسبوع .. فى غنية تانية بدأت يعجبنى حماس المغنيين فيها . . بعد أسبوعين .. كنت منتظر وقت خلوتى بشدة عشان أسمع الأغانى دى . . بعد 3 أسابيع .. تم مسح محتويات الكارت .. و بدء برنامج إعادة تأهيل لمخى … خلاصة التجربة : أنا باسمع كلاسيك من أيام ما كنت فتالتة إعدادى تقريباً .. و كنت بواجه مشكلة ضخمة فى إستيعاب إزاى الناس بتسمع أغانى بالقبح ده . و مع ذلك .. بالتدريب و التدريج .. تم إعادة تركيب نيورونات مخى خلال 21 يوم .. للإستمتاع بالقبح ده . و هو ده مربط الفرس .. إستمتاعى بالقبح كان مجرد نتيجة لتدريب مخى .. لحد ما أصبح عندى إستساغه للنوع ده من القبح فخلال فترة قصيرة جداً … يبقى السؤال الأكبر : مين المستفيد ؟ . الجمال سلعة .. زى القبح بالظبط ما هو برضو سلعة . أقدر أتعب نفسى فزرع الورد و تنميته و تزيينه .. و أحاول أبيعه .. لكنى حافلس لو كنت باحاول أبيع الورد ده فلامؤخذة حارة ال… . عقلك جواه حاجة إسمها neurons نيورونات يعنى .. ليها خاصية إسمها plasticity يعنى بلاستيكيه . . النيورونات دى بتكون receptors يعنى مستقبلات لكل ما هو بيستقبله عقلك من (صوت/صورة/ ريحة / مكون كيميائى … و .. شعور) . . بعد تكوين مستقبلات لمدخل معين .. عدم الحصول على المدخل ده .. بيخليك تحس بإشتياق و إحتياج ليه .. مهما كان نوعه .. و هو ده اللى إٍسمه ( إدمان ) … فى مدخلات بتنميك و تخليك بنى آدم بيفهم و يعرف مصلحته فين و حلو و شكلك يفرح كده .. و فى مدخلات تانية بتخليك لا مؤاخذة … و تحولك لكائن أقل من الحمار بشوية .. . و فده حكمة فإنك حتى لو مش فاهم القرآن أو مش قادر تقراه .. برضو إقراه .. و إسمعه .. بعد فترة حتفهم و حتتعلق بيه . . بس البوست ده مش دينى … . رمضان داخل إن شاء الله .. صدقنى .. 110% من المسلسلات و الكلام و الحاجات اللى بتتعرض و حتتعرض .. حتخليك تكمل أكتر فى نفس المستنقع اللى بقالنا فيه من زماااااااان .. فرجتك على مسلسل معين .. و متابعتك لبرنامج معين .. و ضحكك على حاجة معينة .. و سماعك لحاجة معينة .. و إستهزائك بتأثير كل ده عليك .. بيحولك أكتر لكائن بعد كده حيشتكى من إنه مثلاً مدرس بيقبض 2000 جنيه فى الشهر .. فى حين إن الممثل اللى كنت بتضحك عليه طول رمضان .. عنده فيلا فدبى .. و إنت اللى إشتريتهاله و حاسبت عليها كمان .. . عارف دفعت فيها كام ؟! .. أغلى 30 يوم فسنتك كلها … و يمكن حياتك كمان .. . و الله أعلم