spoilers alert

spoilers alert 😭😭😭😭 هو مش من الأفلام اللى حاحتفظ بيها أكيد أو مامسحهاش .. لكن النوعية دى دايماً بافضلها لأسباب خاصة جداً .. ألا و هى كالمعتاد .. الهندسة :D النوعية اللى بيتم فيها تبسيط المتغيرات فى حياة البشر لأقصى حد .. و مابيفضلش غير العناصر الأساسية اللى ممكن تفكر فيها و تحلل بيها موديل قريب من الحقيقة .. بمعنى : كمهندسين مثلاً لما بندرس حركة عربية فمسار معين .. مابنفكرش فى البداية فى نوع و ماركة العربية .. و موديل سنة كام .. أو الإكسسوارات أو اللون أو التجهيزات الشكلية دى بالكامل .. كل اللى بنحتاج نفكر فيه عشان نكون فكرة أساسية عن الموديل .. هو الأساسيات بس .. سرعة العربية .. حجمها .. إمكانياتها .. نوع الطريق اللى بتمشى عليه .. و هكذا .. .. فحياتنا كبشر .. بنفضل نتزود بالعديد و العديد من الإكسسوارات و الكماليات اللى بتغير صورتنا بالكامل .. و بالتالى .. بيكون معظم الموديلز اللى بتتكون عننا أو بنكونها عن باقى البشر غير صحيحة إطلاقاً .. لكن .. فسيناريوهات ما بعد المحرقة على رأى دكتور أحمد خالد توفيق .. بتتشال كل الكماليات دى و بيفضل بس المعدن الأساسى اللى بنشوف بيه نفسنا فى المراية .. الفيلم تقليدى جداً فعرضه للمسألة و ماعتقدش إنه قدم أى شكل أو سيناريو أو فكرة جديدة .. لكن ده مايمنعش إن الجزء البشرى (الصغنن ) اللى جوايا فضل يعيط فى الآخر برضو .. .. أعتقد إن من الحاجات المفيدة إننا نفكر بالموديل ده أحياناً مرة أو مرتين كل أسبوع .. و نتخيل لو العالم فعلاً أصبح مافيهوش مكان لكمالياتنا و إكسسوارتنا .. إيه الأساسى بس اللى حنشيله فإيدنا و نجرى بيه .. و يا ترى حانكون مكان مين فى الفيلم ؟! .. و الله أعلم .