#شارك_معلومة

#شارك_معلومة أكيد مش أنا الوحيد اللى وقف قدامها و قراها .. بس فى الدوشة و الزحمة و الحر .. ماحدش تانى وقف يقراها قدامى ! .. فإسكندرية - رشدى - على أول رصيف نيو هورايزونز New Horizons Alex - Scholarships من شهرين تقريباً لقيت صندوق كرتون محطوط و ورقة فوقه مكتوب فيها شوية معلومات عن تاريخ إسكندرية و كده .. وقفت قريتها لثوانى و إبتسمت و كملت طريقى .. إبتسمت لفكرة إن حد خد جزء من وقته عشان يعمل صندوق و يلزق عليه ورقة و يكتب عليها معلومات بخط الإيد .. إحساس ممتع و مميز فعالم مليان بآلاف الطرق اللى ممكن تشد إنتباهك .. و بيتصرف عليها ملايين .. ورقة و قلم جاف و صندوق كرتون .. شدوا إنتباهى جداً .. فضلت موجودة أسبوع تقريباً .. و بعد كده إختفت ! .. النهاردة و أنا رايح أدى الكورس .. لقيت الورقة دى .. فرحت جداً و كأنها جواب مقصود ليا أنا شخصياً .. وقفت .. قريتها .. و قررت إنى لازم أصورها المرة دى .. و أنا راجع .. قررت إنى أعمل حاجة زيادة .. الورقة زى ما هو واضح متعلقة على شجرة قدام محل hand made . دخلت المحل أسأل .. ” إنتوا ليكو علاقة بالورقة دى ؟! ” لقيت راجل عجوز أبيض الشعر رقيق الروح .. كان ماسك فإيده كتاب بيقراه .. قفله و إبتسم و قالى “أيوة أنا اللى حاططها ” .. لما سألته عن السبب ؟ قال إنه فكر إن حاجة جميلة جداً لو إن كل واحد قرأ معلومة مفيدة قرر يشاركها .. و إنه دى الطريقة اللى هو قدر يشارك بيها المعلومات اللى هو بيقراها .. أستاذ / على محمد .. بيشتغل فى المحل اللى فى الصورة ده . المحل جواه تحس إنك جوة متحف صغنن .. و كتير لما باعدى عليه باقف أتفرج على اللوح الفنية اللى فيه و التحف . .. أنا إستأذنته إنى أكتب عنه و أنشر الموضوع ده .. يمكن أنا إتكلمت قبل كده عن العهد اللى كنت عهدته على نفسى إن كل يوم أحاول إنى (أعلم شخص واحد على الأقل معلومة جديدة .. و أتعلم معلومة جديدة ) .. شكراً أستاذ / على إنك ساعدتنى فده النهاردة .. .. يمكن فى ناس كتير حواليا أعرفهم يقدروا هما كمان يفيدوا ناس كتير بنفس المبدأ .. ليه لا ؟ .. دعوة أو تحدى للتلاتة التاليين إذن إنهم كل واحد منهم يكتب معلومة جديدة .. واحدة .. على الأقل .. و يتحدى تلاتة تانيين .. إحنا مش أقل من أستاذ / على . أحمد الجويلى Eslam O. Zahran Mahmoud Adam #شارك_معلومة