عن كورونا و صن تزو و ما بينهما ... ماذا
عن كورونا و صن تزو و ما بينهما ... ماذا لو كان كورونا بيسبب أورجازم ؟!
عن كورونا و صن تزو و ما بينهما … ماذا لو كان كورونا بيسبب أورجازم ؟!
“When you surround an army, leave an outlet free. Do not press a desperate foe too hard.” ― sun tzu, The Art of War الترجمة الحلمنتيشي : ” لما تحاصر عدوك يابني , سيبله مخرج صغنن .. سيبله شوية أمل يتمسك بيهم .. ماتضغطش علي خصم محبط زيادة عن اللزوم "
" صن تزو ” ده يبقي جينيرال صيني و واحد من أشهر إستراتيجيين الحرب في التاريخ .. و كتابه ( فن الحرب - the art of war ) .. بيعتبر واحد من أسس الثقافة العالمية .
أول مرة قريت الكتاب ده بالكامل كان سنة 2009 , و وقفت مدة طويلة عند الجملة دي .. لأن في الكتاب بيقضي جزء كبير فشرحها .. و شرح نفسية و عقيدة الخصم المحاصر .. و إزاي إن أحياناً كتير بيكون من مصلحتك إنك تفضل تمتص خصمك .. بالبطئ .. جداً .. بدل ما تبذل مجهود و موارد فإنك تواجهه مواجهة مباشرة . … و إن أحد أفضل الطرق فإمتصاص الخصم .. هي الحصار .. و بيشرح إن إزاي لو إنك حاصرت خصمك حصار كامل .. بحيث إنه يحس إنه ميت ميت .. ساعتها بيتحول لأخطر نوع من الخصوم .. الخصوم اللي ماعندهاش أى شيء تخاف عليه ..
الدوشة اللي حاصله علي كورونا حالياً ممتعة جداً فإنك تشوف المبدأ بتاع صن تزو ده بوضوح للغاية . ببساطة .. حالة الهلع و الخوف اللى فيها معظم الناس حالياً .. لأن الفيروس يبدو من الهالة الإعلامية اللى محيطة بيه إنه لا فكاك منه .. و إنه جاي جاي .. و محاصرنا من كل إتجاه .. و خلاص بقي علي كده و إقرا سورة ياسين . … في حين إن علي مدار ال50 سنة اللي فاتوا .. و بعد ما تأكد بكل الوسائل و الأشكال إن السجائر أضرارها لا نهاية لها .. و مميتة .. و قاتلة .. و فيها كل البلاوي .. إلا إن الناس مستسلمين لحصارها لهم .. و متجاهلينه .. و متعايشين معاه .. و سايبينها تمص فيهم بدون مواجهة حقيقية ليها كعدو . … عد الخصوم بقي :
- السكر الأبيض
- البيبسي و الشيبسي و الكولا و ما شابه
- أنواع كتييير من المخدرات
- الكحوليات بأنواعها
- المواد الحافظة و ما شابه .. كل دول خصوم و أعداء أشد فتكاً بالبشرية من كورونا فعدد ضحاياهم سنوياً .. و لكن .. و لكنهم : 1- بيسببوا متعة جسدية مؤقتة (بالظبط زي ما كان الملوك بيبيعوا شعوبهم زمان مقابل رشوة مادية أو جنسية أو حتي شوية توابل ) . مش فاهم التشبيه اللى فات ده ؟ التاريخ مليان بأمثلة ملوك و قادة … باعوا شعوبهم و أوطانهم للعدو مقابل ( متعة مؤقتة ) .. بالظبط زي ما الناس حالياً بتبيع نفسها و جسمها و صحتها .. مقابل برضو ( متعة مؤقتة ) .. 2- الأنواع دي من الخصوم .. بتسيب لك مخرج … توهمك دايماً إنك عندك القدرة تبطل لما تحب . ( بكرة حابدأ الدايت , الشهر الجاي حاروح الجيم , السجاير باشربها بس عشان الهم و لكن أقدر أبطلها بمزاجي , لا يا عم دي سجارة واحدة بس مع الشلة عشان القعدة , يا عم ده هو كاس كل شهر , … ) .. أو ( أصلي حاكل إيه تاني غير الشيبسي ؟ , أصلي باحب أقزقز حاجة و أنا شغال , .. أصلها مش باكو شيبسي ولا قزازة بيبسي اللى حتبوظ الدنيا .. ) .. .. ببساطة .. عمرك ما حسيت إنك محاصر حصار كامل مع أى نوع من الخصوم دي .. و دايماً حاسس إنك عندك مخرج .. و بالتالي .. دايماً بتأجل و مستسلم .. و خايف تخسر المتعة اللى بتقدمها ليك .. الرشوة اللى بتقدمها ليك ..
أنا فعلاً باتسائل … إيه اللى كان حيحصل لو فيروس كورونا الحالي ده كان بيسبب (قمة المتعة الجنسية = الأورجازم = أقصي أنواع المتعة الجسدية اللى بيتعرض لها عقل الإنسان ) للمريض عدد مرات معين قبل القضاء عليه بالكامل ؟! … و تلاقي كل واحد من الناس اللى جالها الفيروس مثلاً علي وجهة أقصي علامات الإستمتاع قبل ما يموت ( بالظبط زي فيلم bird box ) … مع فرق إنه هنا حيكون واعي إنه حيموت .. و إنه الفيروس قاتل … العالم مليان بالفعل بحاجات كتير بتوضح إني مش محتاج أتسائل .. ناس كتير بتاكل أكلات إحتمال سميتها 50% .. و لكنها ممتعة بشكل ما .. ده غير متعة الخطر و الأدرينالين نفسها ..
دماغي برضه مخلياني أفكر فنوع تاني من الخصوم و الأعداء … أعداء مش بتستهدف الجسم الأول .. لا .. أعداء بتستهدف العقل زي : معظم اللي البشر بيقضوا ال24 ساعة بتوعهم بيعملوه حالياً علي السوشيال ميديا و عالتيليفزيون .. و بعدين يشتكوا إنهم فقرا و تعسا و تعبانين !! … و أعداء بتستهدف النفس و الروح إستهداف مباشر .. زي : كل ما هو تسبب فإقناع الإنسان إنه عنده أى نوع من أنواع السيطرة علي المستقبل عن طريق ( تكنيز الفلوس = wealth accumulation , أو الشراء = consumerism , أو … حاجات تانية كتير من نفس النوع ) .
كل الأنواع دي من الخصوم .. في قمة الذكاء و الدهاء .. كلهم سايبين لنا مخارج وهمية … تحسسنا بالأمان و إننا عندنا حاجة نخسرها لو حاولنا نتصدي لها . و بالتالي بيتم القضاء علينا منذ سنين .. و السيطرة علينا بشتي الأنواع و الأشكال .. و ما زلنا بنبيع كل ما نملك من غالي و نفيس … في سبيل الرشوة المؤقتة دي .
يحضر عقلي العديييييييد و العديييييييد من آيات القرآن اللي بتشرح الكلام ده .. و لكن هل سنتصدي ؟!!
و الله أعلم .