( البوست التالت فسلسلة - الإنضباط و المتعة و السيطرة

( البوست التالت فسلسلة - الإنضباط و المتعة و السيطرة ) . عن المتعة اللي قالوا لك عليها ( عيب ) .. و خليك مؤدب و هادي و ساكت . عن البريك ثرو .. و أشياء أخري برضه .. و الله أعلم .

لسبب ما مش لاقي ترجمة للمصطلح ده في الثقافة الحلمنتيشية العربية حالياً !! . أقرب معني ممكن أفكر فيه لل ( بريك ثرو = break through ) .. هو ال ( جاب التايهة !؟ ) . … … من كام يوم .. أحد الزميلات معانا في الشغل ( غالباً هي بتقرا الكلام ده دلوقتي :) ) .. كانت بتكتب مقال عن أهمية المكياج للمرأة .. و سألتني عن أداة تمكنها من عمل ( face morphing gif ) .. يعني فيديو gif صغنن لوش بني آدم .. و هو بيتحول لوش بني آدم تاني . … بس سؤالها ماكنش كده .. لا .. سؤالها كان ( بادور علي طريقة أعمل بيها فيديو صغير لوش بيتحول لوش تاني .. كدهو ) .. ” و عملت بإيديها تعبير هوائي يدل علي الكدهوان ده ” .. عشان عايزة وش ( هنيدي و هو عامل واحدة ست ) .. يتحول لوش ( ريهانا ) .. … ردي عليها كان : 1- في طرق كتير في حد علمي لعمل التأثير ده في ( gif ) .. و لكنها كلها عن طريق برنامج ( adobe after effects ) . 2- بما إن لو إقترحت إنك تتعلمي أفتر إيفكتس .. ده حياخد وقت طويل عشان نقدر نحقق مهمة بسيطة زي دي .. 3- فبالتالي … يبقي السؤال هو : هل في آداة تعمل الموضوع ده بس .. و بسرعة .. و يا ريت لو كانت عبارة عن موقع صغنن أونلاين مثلاً ؟ 4- و لكن عشان ندور علي ( الموضوع ده ) .. أونلاين .. جوجل مش حيفهم إننا نقصد ( وش بيتحول لوش تاني كداهوان ) . 5- فبالتالي .. يبقي السؤال هو : إسم التأثير بتاع ( وش بيتحول لوش تاني كداهوان ) إيه ؟ 6- من ذاكرتي .. أقرب مثال إفتكرته للموضوع ده كان فيديو لمايكل جاكسون قديم إسمه ( black or white ) .. لينك الفيديو في الكومنت الأول .. و في الفيديو ده فآخره .. وشوش كتير بتفضل تتحول لبعضها ( كدهوان ) . 7- فدخلنا جوجل و كتبنا ( michael jackson black or white faces changing effect ) .. 8 - النتايج بتاعت جوجل كان فيها ( face morphing effect ) و كيفية عمله علي برنامج الأفتر إيفكت . 9 - رحت عامل سيرش تاني عن ( face morphing effect to gif online tool) . 10 - طلع ليا بتاع 10 نتايج لمواقع مختلفها كلهم بيأدوا نفس الشيء ( لينك أحد المواقع دي في الكومنت الأولاني برضه ) . عبارة عن إنك تحط الصورة الأولي .. و بعدين تحط الصورة التانية .. و هو بيطلع لك ال gif فثواني . … … ال10 خطوات دول خدوا مني بالظبط 10 دقايق تقريباً عشان نعملهم . و بعد ما وصلنا للنتيجة اللى عايزينها .. سألتها .. بفرض لو أنا ماكنتش موجود .. هل كانت حتوصل للنتيجة دي ؟ و كان ردها إنها كانت حتنتظرني .. او تتصرف بدون ال(gif ) .. فكان ردي عليها .. إنها تفتكر كويس تسلسل الخطوات اللى مشيت بيه عشان نوصل للنتيجة .. لأن ده اللي يهمني إنها تفهمه و تعرفه .. مش أنهي آداة بتمكنا من عمل ( face morphing gif ) .. و لكن كيفية تحويل ال( كداهوان ) .. لسؤال أقدر ألاقي ليه إجابة … … الجملة اللي كنت باكررها فكل محاضرة و كورس إديتهم فحياتي هي : my job as an instructor in the internet era,isn’t teaching you how to answer, but teaching you how to ask. دوري كمدرس فعصر الإنترنت .. مش تعليمك إزاي تجاوب .. و لكن تعليمك إزاي تسأل . … … المثال اللي فوق ده .. يمكن يكون مثال بسيييييييط جداً .. و ساهل جداً .. و لكنه أقرب حاجة حصلت فكرتني بالموضوع ده .. و النوع ده من المتع .. متعة ال( بريك ثرو ) . … أفتكر إن أول مرة حسيت بالمتعة دي بشكل واعي و واضح جداً … كان فتالتة إعدادي .. أيام ما بدأنا نسبياً ندرس هندسة في الرياضة بشكل يتطلب إننا نفكر شوية .. … كان في أنواع مسائل في الهندسة فتالتة إعدادي .. لمثلثات جوة دواير .. و متوازي أضلاع .. و ليلة كبيرة سيادتك .. و كان بيبقي المطلوب مثلاً إيجاد ( الزاوية س ) .. أو طول الضلع ( أ ب ) .. … أيامها فاكر إننا كنا بنبدأ بعمل الحسابات العادية بناءاً علي القواعد اللي كنا نعرفها ..

• مجموع زوايا المثلث = 180 درجة
• الزاوية الخارجة تساوي مجموع الزاويتين المقابلين للزاوية المكملة
• المثلث متساوي الضلعين زوايا قاعدته متساويين ..
• و هكذا من القواعد اللي باستمتع بمجرد تذكرها دي . … كنا بنفضل نستخدم في القواعد دي علي أمل إننا نوصل للإجابة .. و أحياناً كتير نوصل لإجابات من نوعية : لو وصلنا لقيمة الزاية ع .. نقدر نسحب منها طول الضلع الفلاني مثلاً .. و لو كمان وصلنا لقيمة الزاوية ص .. نقدر بسهولة نطلع قيمة المطلوب . … و بعد لف و دوران كتير … كنا كتير بنلاقي نفسنا لفينا و رجعنا لنقطة البداية تاني .. لحد ما كان عند لحظة معينة … تطرأ فدماغنا إننا نعمل عمل معين مثلاً .. و نمد خط مستقيم من مكان لمكان .. و ده يمكننا من الوصول لنقطة ماكناش قادرين نوصل لها في الحل علي مدار ساعات فاتت .. … نوصل ل ( بريك ثرو ) .. مش الحل .. لا .. ل ( بريك ثرو ) .. خطوة علي الطريق للحل . … … المتعة اللي كنت باحس بيها كل مرة أقدر أوصل ل( بريك ثرو ) فحاجة معينة .. أحياناً كتير كانت بتبقي أكتر من المتعة اللى باحس بيها لما أحل المسئلة .. أو أنجز المهمة بالكامل .. … و بالتدريج علي مدار حياتي .. بدأت أدور علي المشاكل و المسائل و المهام اللي من النوعية دي .. اللي من نوع بتاع ( حاولنا نحلها يا باشمهندس بكذا طريقة و ماوصلنا لحاجة ) .. اللي باعرف إني عشان أحلها .. محتاج أفكر بأى شكل غير الأشكال المعتادة اللي كل اللي قبل فكر بيها . … … الجريمة الضخمة اللي كنت إتكلمت عنها في البوست اللي فات ( رقم 2) .. عن إزاي كتير حالياً من الناس اللي بتقف قدام مشكلة .. أول شيء بتلجأ له إنها تدور علي جوجل علي ( حل ) المشكلة دي .. هو إن قدرتهم علي الوصول ( للبريك ثرو ) .. أو قدرتهم علي التعرف علي المشاكل الصعبة من الأساس .. بتضمحل .. بتتقتل .. و بالتدريج بيتحولوا لروبوتس .. كل اللي بيقدروا يعملوه هو ( جوجلنج - googling ) الإجابة .. و بنلاقي الهيستوري بتاعهم كله من نوعية ( كيفية عمل كذا , كيفية حل كذا , كيفية … ) . … … في حين إني بعد سنين .. إكتشفت إن أكتر الحاجات اللى إتعلمتها و ميزتني بفضل الله فمجالاتي بشكل أو بآخر .. هي كل الحاجات اللى إتعلمتها أثناء ما كنت بادور علي حل مشكلات معينة .. بمعني إني عشان ألاقي حل ل( ليه آداة معينة في الفوتوشوب مش ظاهرة مثلاً ) .. إكتشفت عشرات الحاجات المختلفة .. قبل ما أكتشف الإجابة ( إن الوورك سبيس بتاعي كان فوتوجرافي مش essentials ) . عشرات الحاجات المختلفة دي .. هما اللي بيميزوني في إستخدام الفوتوشوب بعد كده .. و غير ده كتير من أمثلة تانية . … و لكن لو كنت بمجرد ما لقيت الآداة دي مش ظاهرة .. دورت علي جوجل علي الإجابة .. عمري ما كنت حاتعلم ( الأكشنز مثلاً ) ” قصة حقيقية جداً بالمناسبة ” … … … … أول محاضرة فمادة ال ( micro processor ) في الكلية فترم أول سنة تالتة .. دخلت فيها الدكتورة و بدأت تشرح البروسيسور ( 8086) و الأوامر بتاعته و كيفية التعامل معاه !!!! كنت حتجنن .. حسيت إني دخلت فيلم فجأة فنصه .. بعد المحاضرة سألتها ” دكتور .. دي أول مرة ناخد فيها معلومات عن البروسيسورات أساساً .. هو البروسيسور إتعمل إزاي من الأساس ؟!! ” ردت عليا ” ده مش المنهج عليكم ” سألتها و أنا بدأت أتعصب ” أيون ماشي .. مش مشكلة المنهج .. عايز أعرف اللي فكر فبناء بروسيسور .. فكر فإنه حيعمل قاعدة أوامر و كوبي و بيست و كل ده من الأول ؟!! .. فجأة ؟!! .. من لا شيء قبل كده يعني ؟! ” ردت و هي بتلم حاجاتها : ” إنت ممكن تقرا عن البروسيسور ال 8080 لو عايز ” . رديت : ” هو ده البداية يعني ؟! ” .. ردت و هي طالعة من المدرج : ” لا .. كان في ال4044 , و ال 4040 ” .. كنت حاتشل و أنا باجري وراها و رديت : ” أيون .. دول بقي الناس فكروا فيهم إزاي ؟ .. سألوا إيه يعني عشان تبقي الإجابة هي ( تعالوا نبني بروسيسور ) ” .. ردت علي أحد الزملاء و هي نازلة السلم و بتتجاهل سؤالي بكل أريحية ” المعيد حيبقي يشرح لكم الأسئلة حتيجي إزاي في الإمتحان ” . وقفت مكاني و أنا حاسس إني مجنون و كراهيتي للكلية بتزداد !!!! … … أول مرة عرفت فيها يعني إيه بروسيسور كمبيوتر .. و جه منين .. و ليه .. و الناس فكروا فيه إزاي .. كان فمحاضرة مدتها 8 ساعات فمكتبة إسكندرية لدكتور / إسماعيل سراج الدين .. شرح فيها الكمبيوتر من أيام ما الناس إخترعت الأرقام أساساً … لحد intel .. لحد النهاردة أدين للراجل ده .. و للمحاضرة دي .. بأحد اسس فهمي للكمبيوتر و البرمجة .. … … لما كنت بتسأل زمان و ماكنش بيبقي عندهم إجابة كانوا بيقولوا لك ” عيب ” .. خليك هادي و أقعد مربع إيديك . ده كان زمان . إتعلم إسأل … مش تتعلم تجاوب .. الإجابات بقت مجاناً و فجيبك .. الأسئلة هي اللى كتير نسوا إزاي يسألوها . … و الله أعلم .