فوجهة نظري

فوجهة نظري :

1- مافيش حاجة إسمها مش عارف أتعلم إنجليزي .. حضرتك بتعرف تتكلم عربي لأنك بتستعمله كتير و بتسمع أغاني و مسلسلات كتير بيه .. بطل سماع مسلسلات و أفلام و أغاني عربي .. و حاول تستعمل الإنجليزي لمدة سنة . … 2- عايز تتعلم النطق … هات أى مقطع مقروء من أى كتاب علي اليوتيوب .. و سجل لنفسك علي موبايلك و إنت بتقراه .. و قارن بينه و بين نطقك .. و عيد .. بعد كام ميت مرة .. حتلاقي نفسك نطقك بيتحسن . … 3- ما يلي من كورسات و دورات و خبرات و شهادات و معارك و سلطات و بابا غنوج .. مابيأكلش عيش و ماعرفش أستخدمه إزاي فشغلي .. أو أى شغل كنت جزء منه علي مدار 12 سنة شغل .. أو أى شغل أسمع عنه الصراحة :

• تنمية بشرية
• إعداد قادة
• لغة جسد
• برمجة لغوية عصبية
• دورة إعداد بابلك سبيكرز .
• … و ما شابه منهم … و أمثالهم من العناوين التي لا تسمن و لا تغني من جوع … 4- مافيش شيء إسمه إني أشتغل مدير علي 10 أشخاص عندهم 10 مهارات مختلفة .. بدون ما أكون علي الأقل أقدر أشتغل 9 من ال10 مهارات دول بكفاءة متوسطة .. و علي الأقل عندي مهارة واحدة منهم بكفاءة عالية . لكن إني أقول إني مدير (أو ريس عمال) علي عدد من أشخاص عندهم مهارات و إني ( مابعرفش أشتغل بإيدي أى مهارة منهم ) .. فده مش صح … و مش حلو .. و مش جميل . … 5- مافيش حاجة إسمها مابعرفش أتعلم لوحدي أو أتعلم من الفرجة علي فيديوهات اليوتيوب .. حضرتك في حاجة إسمها إنك ماحاولتش .. او حاولت لمدة نص ساعة و زهقت و رحت تدور علي طريق مختصر .. من غير ما أقول ( ناس كتير أعرفهم ) .. أنا شخصياً باقضي بال15 ساعة أحياناً متواصل باشوف فيديوهات و أقرا مقالات عشان أعرف (أبتدي) أتعلم مجال معين أو مهارة معينة إزاي .. … 6- مافيش حاجة إسمها جربت آخد كورسات فمجال معين و ماعرفتش أشتغل بيه .. حضرتك يبقي الكورس اللى أخدته كان ناقص الجزء الأهم .. و هو التطلبيق العملي في السوق … و أى كورس خدته عشان تشتغل بيه .. و كنت مستني تتعين فشركة عشان تبدأ تجرب مشاريع بيه .. يبقي دي غلطتك .. أى كورس تاخده فأى مهارة و ناوي تشتغل بيه … إشتغل بيه .. علي أى مشاريع فخيالك .. بدون فلوس .. و لو تطوع … المهم إنك تفضل شغال بيه عشان يبقي ليك خبرة و سابقة أعمال . … 7- لو ( بتتفرج علي ماتشات , أو بتقعد علي قهوة , أو بتشيت علي الفيس و الإنستاجرام , أو … ) و بتقول إنك ماعندكش وقت تتعلم شيء ما … إنت بتخدع نفسك . … 8- لو بتستخدم أياً من التالي فكلامك :
• أصلي مابيجيليش مزاج أتعلم كذا أو أعمل كذا .
• ماليش نفس أتعلم كذا أو أشتغل كذا .
• بارجع مخنوق من (برة /الكلية / الشغل / .. ) و بابقي مش عايز أتعلم حاجة جديدة أو أشتغل حاجة جديدة .
• عندي مشاكل معكننة مزاجي .
• أو أياً من هذا القبيل … فحضرتك برضه بتخدع نفسك .. و مافيش حاجة حتغير ده .. إنت بس بتدور علي حجج عشان تلاقي حد يديلك طريق مختصر … و مافيش طرق مختصرة بتعمر بيوت . … 9- الإكتئاب و المرض النفسي .. أمراض حقيقية … إدعائك ليهم بدون تشخيص أو بدون ما تحاول كل الطرق الممكنة التانية … إستسهال . … 10 - مافيش حاجة إسمها لما بابص للي حواليا باحس إني فاشل … ماتبصش للي حواليك .. و بص إنت عايز تتعلم إيه أو ممكن تتعلم إيه … و بدل ما تفتح اكاونتات اللى حواليك علي الفيس أو إنستاجرام و تقارن نفسك بيهم .. إفتح يوتيوب و إتفرج علي فيديو تتعلم منه . … 11- ماينفعش .. ماينفعش .. و كمان مرة والله العظيم شيء مستفز .. لما يكون سنك حاجة و عشرين سنة .. و تقول إنك كبرت علي التعليم و إنك عايز تشتغل بقي لأنك خلصت تعليم خلاص .

---

الكلام ده يمكن يبدو منه إني مشحون أو متنرفز … ده حقيقي جداً ..
تلات مقابلات النهاردة ورا بعض في الشغل لناس بتقدم علي شغل .. عدت فيهم نفس الكلام .. لأسباب مختلفة لكل شخص .