5 إقتراحات بسيطة .. و عرض ... و رجاء ...

5 إقتراحات بسيطة .. و عرض … و رجاء … بمناسبة الإنتحار بسبب الكلية .

الإقتراحات :

1- هل ممكن إن الكليات .. و القمة خصوصاً ( هندسة , طب , صيدلة , … ) .. ترتب محاضرات و إيفنتات مجمعة ضخمة .. ييجي فيها محاضرين متمكنين .. يتكلموا فيها عن الضغط النفسي و كيفية التعامل معاه .. و يتم زيادة و تكثيف الإيفنتات دي فأوقات الإمتحانات . … 2- هل ممكن إن الكليات .. و القمة خصوصاً برضو .. ترتب محاضرات و إيفنتات .. يتكلم فيها المحاضرين عن الحلول البديلة الكتيييييير اللى بتنجح بيها بدون الإعتماد علي شهادة الكلية . … 3- هل ممكن إن الكليات .. و القمة خصوصاً برضو .. تعمل إحصائيات عن الخريجين آخر 10 سنين .. و تقارن نجاحهم العملي و المادي و الإجتماعي .. بتقديراتهم خلال الكلية .. و تشارك ده و تنشره مع الطلبة . … 4- هل ممكن إن الكليات .. و القمة خصوصاً برضو .. يتعمل فيها إجتماعات زي ( AA - addicts anonymous ) .. بس تكون مثلاً ( SA - suicidal anonymous ) .. يتجمع فيها الناس اللي عندهم ميول إنتحارية .. و يشاركوا أفكارهم و مشاعرهم و تجاربهم .. و يقووا بعض .. و كل حد يبدأ كلمته مثلاً ب ( أهلا .. أنا إسلام .. أنا فكرت في الإنتحار .. ) . … 5- هل ممكن إن الكليات .. و القمة خصوصاً برضو .. يتعمل فيها إحصائيات بناءاً علي الإجتماعات المقترحة في النقطة 4 دي .. و يتم النظر فإحتياجات الناس اللى بتوصل إنها تفكر في الإنتحار .. و يتم التواصل مع جهات و أشخاص كتير عندهم الرغبة في مساعدة الناس دي .

العرض :

أنا علي أتم الإستعداد فأى وقت إني أكون متواجد فأى مكان بدون أى مقابل .. و أتكلم عن تجربتي الخاصة فكلية هندسة إسكندرية .. و إزاي إني فعلاً فكرت في الإنتحار كتير بسبب الكلية .. و فشلي الدراسي فيها . و كيفية تعاملي مع المرحلة دي فحياتي بفضل الله .. و إزاي ربنا أكرمني بنجاحات كتير مادية و عملية و إجتماعية لحد النهاردة .. و ماحتجتش أطلع شهادتي من الدرج اللى حطيتها فيه بمجرد إستلامي لها من 8 سنين . ( أنا آخر دفعتي .. و دور تاني .. و شلت سنة تالتة سنتين ) .

الرجاء :

الترحم علي نادر محمد .. و الدعاء له إن ربنا يرحمه و يغفر له .