المبدأ الأولاني : هوميوستاسيس - homeostasis

المبدأ الأولاني : هوميوستاسيس - homeostasis

الرسالة اللى فى الصورة دى جات إمبارح تقريباً على صراحة , و الصراحة إني لقيت إني لو حاختار (5) مبادئ بس أتكلم عنهم .. و شايف إنهم (فوجهة نظري) أهم مبادئ فجعبتي .. يبقى أفضل لو إتكلمت عن كل واحد منهم لوحده … و ها هو الأولاني : … الكلمة المجعلصة دى (هوميوستاسيس ) .. أول مرة كانت تقابلني بشكل أكاديمي .. أيام ما كنت بادرس بايوإنفورماتيكس ( أحد الفروع اللى بتجمع الرياضة بالأحياء و علم الجينات) . و معناها هو : إن أى منظومة (و نقصد هنا الانسان كجسم و عقل و روح) .. بتسعى دايما إنها توصل لحالة من الإستقرار .. فمثلاً لو فضلت كل يوم تشيل أوزان تقيلة بإيدك اللمين بس .. عشان جسمك يسعي إنه يبقى مستقر و التحميل ده مايسببش تغير فظيع فحالتك الجسدية كل مرة تشيل فيها .. فجسمك بيكبر عضلات إيدك اللمين بحيث إنك كل مرة تيجي تشيل تقيل فيها .. تحس إن ده شىء عادي .. مابيخرجكش من حالة الإستقرار اللى إنت فيها . … الكتاب اللى باقراه حالياً (Peak: Secrets from the New Science of Expertise ) بيتكلم عن الموضوع ده بشكل مفصل جداً و أكثر من رائع فى الفصول الأولي فيه .. و إزاى إن أى شىء حاتدرب نفسك عليه .. بعد فترة حيبقى بالنسبة لك بسهولة المشي و التنفس و الحاجات اللى بتعملها بدون ما تفكر فيها . بس الفكرة هنا فى التدريب ( الواعي ) … و المتزايد . … يعنى : ماينفعش تبقى بتروح الجيم كل يوم .. و تقضي هناك ساعة أو ساعة و نص .. و تشيل أوزان .. بس كله فنفس المستوي اللى إنت فيه بقالك 6 شهور مثلاً .. يعنى عمرك ما عليت على نفسك أو زودت أحمال أو … جبت .. أخرك . النتيجة بتاعت إنك عمرك ما بتجيب أخرك .. .إن أخرك هو اللى حيقرب منك .. مش حيزيد .. و تلاقي نفسك حجم عضلاتك بيقل و قوتك بتقل . … نفس الموضوع فى الحياة بشكل عام .. لو فأى شىء إنت بتعمله .. مش بتجيب .. اخرك .. فى الدراسة ( الدراسة الصح مش بتاعت المدارس ) .. فى الشغل ( الشغل اللى يضيف لك .. مش الشغل اللى ممكن روبوت يعمله بدالك ) فى العبادة ( العبادة الصح .. مش مجرد حركات و ترديد أصوات و خلاص ) . لو مش بتجيب أخرك فأى حاجة من دول .. حتكتشف إن الوقت بيعدى .. و إنت مستواك بيقل فكل حاجة فيهم … حتدرس .. بس مش بيزيد علمك حتشتغل .. بس مش بيزيد خبرتك حتعبد .. بس مش بيزيد إيمانك … أعتقد إنى أول مرة أدركت معني (الهوميوستاسيس ) ده بعمق كده .. قبل حتى ما أعرف معنى الكلمة .. كان من أيام ما كنت باتنافس مع أحد أعز أصدقائي فى الشطرنج فسنة أولي كلية .. كنا بنلعب 5 أو 6 جيمات يومياً .. و مع ذلك مش دايماً كان مستوايا بيزيد .. بل إنى لقيت إنى مستوايا كان بيقل .. لأنى باكرر أفكار و إستراتيجيات و حركات .. هى هى من أيام أول ما إتعلمت اللعبة و أنا فإبتدائي .. في حين إن صديقي العزيز ده .. مستواه كان بيعلي بشكل ملحوظ .. مع إنه بدأ يتعلم و هو فأولي ثانوي . لحد ما بدأت أدرس اللعبة صح ( نسبياً يعنى أيامها ) .. و بدأت أقرا كتب فى الشطرنج .. و أتفرج على فيديوهات لعيبة محترفين .. و أذاكر اللعبة من البداية خالص .. ساعتها بس .. بدأ مستوايا يعلي تاني .. لأنى أيامها كنت باتدرب بشكل واعي على إنى ( أجيب أخري ) .. فمناطق معينة فى اللعبة .. مش بس أعتمد على المستوي المتوسط اللى كنت عليه من إبتدائي . … حالياً فأى حاجة باعملها فحياتي .. باكون واعي جداً لهل أنا باعلي على نفسي فكل مرة .. ولا لا .. الجملة اللى مؤمن بيها هى ( المبدأ الأول فى الخمس مبادئ أهه ) : ” لو حتهرب من نقطة الكسر بتاعتك .. نقطة الكسر بتاعتك دايماً حتلحقك و حتتكسر .. لكن لو حتطارد نقطة الكسر بتاعتك .. دايماً حتهرب منك و حتبعد عنك ” فأى حاجة فى الحياة .. حتى فضغوط الحياة . .. بس .. لما تكون واعي لده .. … و الله أعلم .