آر باكمنستر فولر .. و و داروين .. و المجتمع

آر باكمنستر فولر .. و و داروين .. و المجتمع الولامؤاخذة .

بقالى فترة مابكتبش بوستات .. صح ؟ غلط .. بقالى فترة مابنشرش بوستات .. هو ده الصح .. الحقيقى إنى بشكل يومى تقريباً بعد ما بافطر (شوفان بالتمر بالحمص بالعنب بالقرفة و الجنزبيل .. مع رشة بن صغننة .. بالمية مش اللبن ) … مباشرة و أنا باشرب فنجان القهوة .. و بالقى نظرة على الفيس … بانفعل بكام حاجة سريعاً .. و أفتح بروفايلى .. وأبدأ أكتب بوست .. طويل … و بعد ما بوصل لقبل نهايته بحاجة بسيطة … ctrl+a ctrl+x open onenote/drafts ctrl+v و بعدين أبدأ شغلى عادى و أنا حاسس إنى أحسن بكتير .. … السبب فده مش خوفى من إنى أنشر اللى كتبته مثلاً .. أو إنى عايز أكتب أحسن .. إطلاقاً .. السبب هو إحساسى إنى بابقى عامل زى اللى ماسك مقشة و طالع يكنس الصحرا !! .. هو مابيريحش أى حد .. غير نفسه .. بيحسس ضميره إنه عمل اللى عليه .. و عمل مجهود .. و راح يكنس !! و بابص حواليا .. بلاقى ناس بيكنسوا هما كمان .. بحماس .. بس عاصفة رملية واحدة بتيجى .. و كله يصبح .. هباء . … أمثلة كتير أوى على ده .. يعنى لما كتبت (كتير ) قبل كده عن أهمية إنك تتعلم أونلاين .. و تبطل الإعتماد كلياً على التعليم الجامعى .. و لو فكلية .. إنجز نفسك بس فى الدرجات (لو تقدر) .. و ركز على سيناريو واقعى لشغلك بعد الكلية و دراستك بعدها و كارير تقدر تتحكم فيه .. مش يتحكم فيك . و بعدين ربنا يرزقنى بمكالمة مع صديق جديد فسنة رابعة ميكاترونكس … يفكرنى بأيام الوهم اللى عاشها كتير من الدفعات قبله لحد دفعتى .. و قبلها كمان … و إزاى إنهم بيصرفوا قصارى جهدهم و وقتهم و جهد و وقت أهاليهم عشان يتحصلوا على درجات .. لا تغنى ولا تسمن من جوع فى عالم ما بعد الكلية ! . . و إن مهما كتبت أنا أو غيرى .. عمر تأثيرنا ما حيكون بقوة تأثير الكلية و المجتمع على عقول الشباب دول . … نكتب (أنا و غيرى ) كتيير عن غباء المجتمع و القواعد الفاسدة المفسدة اللى بتقيد العلاقات الطبيعية بين البشر و بتعقد الجواز و بتكره البنت فحياتها .. و بتذل الولد .. و بتتسبب فتخلف المجتمع ككل زيادة .. و بعدين أسمع عن أربع قصص فأربع أيام ورا بعض .. عن بنات و ولاد .. قضى و بيقضى عليهم غباء أهاليهم و غباء المجتمع .. و يتحرق دمى إن مثلاً واحدة منهم .. بتحمد ربنا إنها أخيراً أصبحت سعيدة بعد ما تخطت عمر ال 60 !!!!! لأن قبل كده كانت دائماً محاطة بقيود و جدران من مجتمع غبى إتسبب إنها تعيش تجارب من أتعس و أقبح ما يكون … و أخيراً أصبحت حرة .. بعد ما تخطت ال 60 !!!!! . … … كتاب باسمعه حالياً إسمه : mastery للبرنس الكبير أوى أوى robert greene .. الكتاب بيتكلم عن مرحلة ال (أستذة) .. اللى هو إنت تخطيت مرحلة إنك فاهم فشىء ما .. و بقيت برنس فيه و أستاذ و رئيس قسم .. زى عمار الشريعى فى الموسيقى مثلاً .. ليوناردو دافنشى فى الرسم و الهندسة .. بروس لى فى الفنون القتالية .. .. و أمثلة تانية كتير .. و بيشرح إزاى ناس معنين وصلوا لده … و نوصل لده إحنا إزاى .. … من ضمن اللى قصصهم بتتحكى فى الكتاب ده .. واحد إسمه ( آر باكمنستر فولر ) .. دور عليه .. قصته بإختصار ( ذكى و عبقرى .. فشل كتير .. فكر ينتحر .. راح يغرق نفسه .. لقى إنه بدل ما يموت نفسه يقدر يعيش بمزاجه أحسن و يضرب الدنيا و آراء الناس بالصرمة … رجع من البحيرة اللى كان حيرمى نفسه فيها .. و عاش يعمل اللى على مزاجه .. بقى ناجح فحت و غنى جداً ) . .. و واحد تانى إسمه ( تشارلز داروين) .. سمعت عنه قبل كده ؟ .. قصته بإختصار ( أبو تشارلز خلف إتنين … تشارلز و أخوه الكبير .. ابوه كان ناجح .. و أخوه كان ناجح … و الإتنين كان المفروض حيبقوا مشهورين و جامدين و كده … و تشارلز هو الفاشل اللى ماحدش فاهم هو عايز إيه فحياته .. فشل لفشل لعصيان لضياع … تشارلز قرر يغير حياته بالكامل و راح ركب سفينة حيقضى فيها 5 سنين فى البحر … رجع من السفينة دى بنى آدم تانى و كتب نظرية مشهورة و بقى عالم مشهور لحد النهاردة فى جزء “متخلف” فى العالم بيحب يشتم فيها و فيه … نظرية التطور و النشوء ) . … شايف عامل مشترك بين القصتين ؟ أنا لسة فى الفصل التالت فى الكتاب .. بس كل اللى سمعته فيه لحد دلوقتى .. زى اللى سمعته فكتب كتيييييييير قبله .. زى اللى لو قريت القرآن حتلاقيه مذكور كتير : قُلْ إِنَّمَا عِلْمُهَا عِنْدَ اللَّهِ وَلَٰكِنَّ أَكْثَرَ النَّاسِ لَا يَعْلَمُونَ ﴿١٨٧ الأعراف﴾ إِنَّ اللَّهَ لَذُو فَضْلٍ عَلَى النَّاسِ وَلَٰكِنَّ أَكْثَرَهُمْ لَا يَشْكُرُونَ ﴿٦٠ يونس﴾ إِنَّهُ الْحَقُّ مِنْ رَبِّكَ وَلَٰكِنَّ أَكْثَرَ النَّاسِ لَا يُؤْمِنُونَ ﴿١٧ هود﴾ وَاللَّهُ غَالِبٌ عَلَىٰ أَمْرِهِ وَلَٰكِنَّ أَكْثَرَ النَّاسِ لَا يَعْلَمُونَ ﴿٢١ يوسف﴾ ذَٰلِكَ الدِّينُ الْقَيِّمُ وَلَٰكِنَّ أَكْثَرَ النَّاسِ لَا يَعْلَمُونَ ﴿٤٠ يوسف﴾ وَإِنَّهُ لَذُو عِلْمٍ لِمَا عَلَّمْنَاهُ وَلَٰكِنَّ أَكْثَرَ النَّاسِ لَا يَعْلَمُونَ ﴿٦٨ يوسف﴾ وَلَٰكِنَّ أَكْثَرَ النَّاسِ لَا يُؤْمِنُونَ ﴿١ الرعد﴾ بَلَىٰ وَعْدًا عَلَيْهِ حَقًّا وَلَٰكِنَّ أَكْثَرَ النَّاسِ لَا يَعْلَمُونَ ﴿٣٨ النحل﴾ وَإِنَّ رَبَّكَ لَذُو فَضْلٍ عَلَى النَّاسِ وَلَٰكِنَّ أَكْثَرَهُمْ لَا يَشْكُرُونَ ﴿٧٣ النمل﴾ و فى أكتر كمان … … … الخلاصة كالتالى : شوف أكثر الناس ماشيين فين و بيقولوا إيه و بينصحوا بإيه و بيفكروا فإيه و حاشيين عقولهم بإيه … و فكر كويس جداً جداً جداً .. قبل ما تدى رأيهم أو كلامهم أى أهمية . … و الله أعلم .