2019-0090

طيب .. بما إن الرسالة دى إتكررت كام مرة بكام أسلوب مختلف خلال الفترة اللى فاتت على صراحة :) .. .. فحجاوب هنا و ربنا يستر .. و سبب الإجابة إن : مش أنا لوحدى أكيد اللى بيتبعت له حاجات مشابهة حتى لو كان متزوج .. و كتير فوجهة نظري (من الجنسين ) بيخطأوا نفس الخطأ .. .كتير ..

1- أعتقد فى غلطة مطبعية ضخمة فى الرسالة … لأنها المفروض ( معجبة بيك , معجبة بيك ,معجبة بيك ,… ) و هكذا .. مش بحبك .. لأن بحبك دى كلمة كبيييييييييييييرة أوي .. مش المفروض تظهر فأى علاقة إلا بعد فترة طوييييييييلة من العشرة (الكاملة = زواج و حياة ) .. و للأسف فى وطننا المصري بيتم إستخدامها قبل السلاموعليكم حتى .

2- و حتى (معجبة بيك) دى .. برضو تبقى غلط مطبعي … لأن المفروض تبعتيلى ( معجبة باللى ظاهر منك عالسوشيال ميديا ,معجبة باللى ظاهر منك عالسوشيال ميديا ,معجبة باللى ظاهر منك عالسوشيال ميديا … و هكذا ) . لأنى (أنا و أى شخص تانى على السوشيال ميديا ) .. جزء بسيط اللى ظاهر مننا ( و اللى بنختار نبينه بنفسنا ) .. و جزء تاني كبييييييييييير ماحدش شايفه غير اللى عايشين معاه . و صورة الإنسان الكاملة .. دايماً مختلفة بالكامل و كلية عن الصورة البسيطة اللى فى البروفايل بيكتشر .

3- و حتى لو كنتي من المحيطين بيا بشكل ما .. و إتقابلنا عدد كافي من المرات (المفروض كتير) إني أبدأ أشغل جزء فتفكيرك .. فبرضو الشعور ده أبعد ما يكون عن ( الإعجاب الحقيقي ) .. (أو تكراشي ) عليا . الشعور ده ببساطة عبارة عن صورة ذهنك بيفضل يبنيها بالتدريج طول ما إنتى بتغذيها بشكل غير واعي . بمعني : شعورك تجاهي ده ما هو فى الأساس إلا إعجاب بذهنك إنتى … بعقلك إنتى .. بصورة معينة بناها عقلك و عملها إسقاط عليا .. ممكن يكون فى حاجات كتير ساهمت فإختياري أنا عشان تسقطي عليه ( projection) المشاعر دى .. زى (ملامحي الشكلية و الجسدية , نبرة صوتي , تفاصيل حياتية أخري ليا , .. و هكذا .. ) , و لكن كل الحاجات دى مش أنا .. دى الحاجات اللى إنتى إختارتيها مني عشان تكملي الصورة اللى فى خيالك عني .. و بتفضلي غالباً تفكري في الصورة دى .. و تظني بالغلط إنك كده بتفكري فيا ..

4- اللى بيحصل فى المعتاد ( لو أنا مثلاً مش متزوج أو مرتبط ) و حصل إننا إرتبطنا .. إن حيظهر كم فظيييييييييع من المشاكل من لا شيء .. و كلها حيبقى مشاكل تبدو تافهة و فى غاية التفاهة .. و لكنها حتكون بالنسبة لنا ضخمة و تسوء كل جزء فحياتنا .. ليه ؟

لأنى حابقى طول الوقت فى علاقة أنا طرف تالت فيها … علاقة بينك و بيني و بين الصورة اللى فذهنك عنى … الصورة اللى فضلتي تبنيها طول الفترة اللى كنتي بتكراشي عليا فيها .. و عمري ما حافوز فى الخناقة دى .. دايماً حاكون خسران .. لأنى أنسان .. ليا أخطاء و نواقص زى أى إنسان .. فى حين إن الصورة اللى فذهنك عني .. صورة لفتي أحلامك .. عمره ما زعلك ولا بدي أولوياته على أولوياتك أو أهملك أو …

5- طب إيه المشكلة يعنى ؟ .. مشاعر بريئة يا جدع … سيب البنية تعيش مراهقتها طالما ده مابيضرنيش فحاجة .. .. الصراحة لا .. لأنى لو ماكنتش كتبت بوست زي ده .. كنت ( و بعلمي ) باسمح و باتسبب للبنت دى .. و أى بنت تانية تلاقى نفسها بتكراش عليا .. إنهم يصرفوا مشاعر و مجهود فمكان مش مكانه .. و ده ليه ضرر كبير ..

بدون حتى الدخول فى الدين .. أى علاقة حتدخلي فيها (إن شاء الله ) .. الطرف التانى حيكون دايماً فمنافسة مع الصورة اللى فذهنك دى .. أنا بقى أو أى حد تاني .. ممثل أو لاعب كورة أو داعية أو أياً كان .. و كان حيعانى معاناة ضخمة فإنه يفوز ب(إعجابك ) ده ..

6- طيب .. إيه النكست أكشن يعنى فوجهة نظري ؟ يا سيدتى .. ما ترينه منى على الفيسبوك و السوشيال ميديا (أنا أو غيري) ما هو إلا جزء ضئيل جداً من شخصياتنا .. جزء منقح و بيتم مراجعته (فى بعض االأحيان من أكتر من شخص) .. و بيتعمل له فوتوشوب .. و بيتم وضعه بالظبط زي ما الهدوم اللى بتشوفيها على المانيكان فمحلات الهدوم دايماً مكوية و نضيفة و على المقاس بالظبط . . و لكن الهدوم فى الدولاب و لما بنلبسها .. ( بتتوسخ .. و تتكرمش .. و تحتاج مجهود عشان تبقى جاهزة نلبسها .. و برضو مابتطلعش زي الصورة اللى علي المانيكان .. أبداً ) .. .. إدراكك لده .. حيساعدك تكوني وجهة نظر أكثر عمقاً فحكمك على شخصي و على البشر اللى حواليكي بالكامل .. و إنك تدركي إن أى إنسان فيه مزايا .. و فيه عيوب .. .. أنا (و غيري من اللى على السوشيال ميديا ) .. بنحترف إظهار مزايانا .. و تلميعها .. و إخفاء عيوبنا أو طمسها .. لكن أى علاقة كاملة .. بتبدأ تبين كل العيوب دى .. و بتكتشفي إن ( كريس هايمزوورث ) مثلاً مش دايماً عنده سكس باكس أو شعر متسرح .. أو إن روبرت داوني جونيور مش دايماً كوول زي أيرون مان .. أو إن أى داعية إسلامية حتى .. مش بيواجه فتن نفسية و بيضعف إيمانه أحياناً .. و بيضطر إنه يعيد مراجعة نفسه ألف مرة فى اليوم .

7- و لما تقابلي شخص مناسب (فى الوقت المناسب إن شاء الله ) .. تبدأي تشوفيه بموضوعية … إنه مش كامل .. بس ممكن ييجي منه .. ممكن نستحمل السئ منه عشان نحصل على الجيد .. و إنه هو كمان حيكون شايفنا بموضوعية .. مش إنه حيرتبط بيكي بس مثلاً لمجرد إنك فيكي شبه من شاكيرا ..

… و الله أعلم .