نتايج الكليات بتطلع .. و كله شغال "الحمد لله الذى

نتايج الكليات بتطلع .. و كله شغال “الحمد لله الذى تتم بنعمته الصالحات ” .. و إصحابك كلهم نجحوا و إنت لا .. أو إصحابك طلعوا نضيف و إنت شايل .. أو إصحابك جايبين تقديرات أعلى منك .. … و حاسس بالغصة و الألم و الأحاسيس السيئة دي كلها .. … تقدير سنة أولي كلية بتاعي ترم أول : أربعة مقبول و إتنين راسب تقدير سنة أولي كلية بتاعي ترم تاني : ستة مقبول تقدير سنة تانية بتاعي ترم أول : أربعة مقبول و إتنين ضعيف + مادة تخلف من سنة أولي تقدير سنة تانية بتاعي ترم تاني : كله مقبول . أخيراً دخلت تالتة نضيف . تقدير سنة تالتة بتاعي ترم أول : تلاتة مقبول إتنين ضعيف واحدة راسب تقدير سنة تالتة بتاعي ترم تاني : تلاتة راسب و إتنين ضعيف و واحدة مقبول عدت تالتة بالكامل .. مانجحتش و طلعت بأربع مواد عدت تالتة بالكامل تانى مرة .. نجحت و طلعت بمادتين . وصلت رابعة . تقدير رابعة ترم أول .. كله نضيف ماعدا واحدة ضعيف . تقدير رابعة بالكامل .. طالع بتلات مواد و حاعيد السنة .. عشت ليلة من أصعب 10 ليالي فحياتى ” لأنى يمكن عشت 9 ليالي أصعب منها ” .. لكن حصل تعديل فى النتيجة بالليل و إترفعلى مادة .. و أصبح ليا إنى أدخل دور تاني .. إمتحنت دور تانى و نجحت . … إنزل شوية فبروفايلي لو إنت مش متابعنى من فترة .. حتلاقينى باتكلم أحياناً عن حاجات باعملها ..أو باشتغلها .. أو خبرات أو ما شابه .. و حتلاقى فيديو باشرح فيه قد إيه ده أيامها كان صعب عليا و دفعنى إنى أفكر أنهى حياتى فعلاً .. … أنا إتخرجت 2012 .. و مافيش شغل دخلت فيه أو ناس إشتغلت معاهم عمر حد سألنى عن تقديرات الكلية .. إشتغلت مع شركات .. منهم اللى حجم إستثماراته يتخطي ال6 مليار دولار .. و شركات ( أو تقدر تقول أكشاك كبيرة شوية ) مالهاش أى إندكس يعبر عن حجم إستثماراتها أساساً .. و ماتسألتش لا فدول ولا فدول عن تقديرات الكلية .. … لو متضايق و البوستات بتاعت إصحابك - اللى ناجحين أو معديين نضيف أو إتخرجوا و إنت لسة - بتسبب لك أى ألم نفسي … فالبوست ده ليك إنت يا حاج .. قوم خد دش بالله عليك و إعملك فنجان قهوة نضيف و إفتح ورقة بيضة و قرر إنك تكون المتحكم فحياتك إنت … و ماتكونش مجرد .. رقم جلوس .