10 نصايح

10 نصايح ..

1- ماتسخدمش جمل زي ( مزاجي قال كده , هو كده و خلاص , .. و ما شابههم ) . .. 2- إسأل نفسك كتير ( ليه ؟! ) ..

• ليه بتحب الزمالك ؟ .. ليه بتحب الأهلي ؟ .. ليه بتحب ممثل معين ؟ .. ليه بتحب فيلم معين ؟
• ماتكتفيش بإجابة سؤال ( ليه ؟ ) ده .. بإنك ترد علي نفسك ( باحبه و خلاص ) .. … 3- إسمع آراء ناس إنت بتكرههم و بتشتمهم .. و حاول تتخيل إنك بتحبهم و إنهم يهموك و إنت تهمهم .. و بعدين فكر في الآراء و الكلام بتاعهم ده تاني .. لو حسيت إنك ممكن تقبل كلامهم و آراءهم .. فقط عشان هما بقوا حبايبك .. عيد التفكير كتيييييير فكلامهم . … 4- إعكس الخطوة اللي فاتت .. إسمع آراء و كلام ناس إنت بتحبهم و واثق فيهم … و حاول تتخيل إنك بتكرههم و بتكره اليوم اللي عرفتهم فيه … و بعدين فكر في الآراء و الكلام بتاعهم ده تاني .. لو حسيت إنك ممكن تكره كلامهم و ترفضه … فقط عشان هما بقوا أعداءك .. عيد التفكير كتييييييييير فكلامهم .. … 5- بطل تشتم أى حد مش عاجبك .. و عيد تقييم وضعه تاني .. الشتيمة سهلة .. و بتقلل منك إنت .. كتير ..
• لو كان اللي مش عاجبك ده أقوي منك و ماتقدرش تنصحه يتعلم الصح … يبقي إزعل من نفسك إنت و حاول تبقي أقوي .. مش تزعل منه هو .
• لو كان اللي مش عاجبك ده فنفس قوتك .. و تقدر تنصحه يتعلم الصح … يبقي إنصحه و واجهه و خليك شجاع … و حاول برضو تبقي أقوي عشان تبقي واثق فنفسك شوية أكتر .
• لو كان اللي مش عاجبك ده أضعف منك … و تقدر تمشي كلمتك عليه … يبقي إنصحه و إنت متطمن .. و علمه إزاي يكون أقوي .. ماتجبرهوش علي شيء إلا لو كان وصل إنه خطر علي نفسه أو غيره . … 6- حاول دايماً يكون في تسلسل أفكار معين يوصلك لأرض ثابتة مافيش عليها خلاف جواك .. يعني لو حد سألك تختار أنهي كورن فليكس تفطر بيه الصبح ؟ ( فروت لوبس , ولا شوكو بوبس ) .. حاول تفكر في الإجابة كالتالي مثلاً : أ- هل أنا مضطر أختار أساساً ؟ .. و لا ممكن أختار حاجة تالتة مش معروضة قدامي ( فول مثلاً ) . ب- الإختيار ده .. حاصرف مقابله نفس القيمة من ( المجهود و الوقت ) ؟ ج - هل السؤال نفسه يستحق الهرتلة دي كلها ؟ .. و لا السؤال معروض عليا لمجرد تضييع وقتي و خلاص ؟ .. بنسبة كبيرة .. حتلاقي أسئلة كتير من اللي معروضة عليك في الحياة .. معروضة عليك لتضييع وقتك و مجهودك بس في الهرتلة فيها .. و إن لو عندك أرض ثابتة ( عقيدة ثابتة ) .. يبقي عشان أحيرك لازم أبعدك عنها بإني أدخلك فمتاهات مالهاش أى لازمة .. متاهات من نوعية ( أى فتنة أو أى سؤال حلال ولا حرام اللي بييجوا علي قنوات الشيوخ اللي بتدور علي مشاهدات عالية ) . … … 7- حب الدنيا .. و إسعي إنك تمتلكها .. كلها .. بس عشان تستخدمها .. ربنا سخر لنا الكون بما فيه .. مش عشان نمتلكه و نكنزه … و لكن عشان نستخدمه ..
• عايز قصر ضخم بحمامات سباحة كبيرة و جنينة واسعة ؟! .. حتسكن فيه مين معاك ؟! .. و تشغل فيه مين ؟! ..
• عايز عربية حديثة فتاكة ؟! … حتروح بيها فين ؟! .. ليه ؟!
• عايز موبايل أحدث موديل ؟! … حتعمل بيه إيه ؟!
• عايز فلوس كتير أوي ؟! .. حتصرفها فإيه ؟! .. ليه ؟! .
• عايز هدوم ماحدش غيرك لبسها ؟ .. و تتميز بيها ؟ … ليه ؟! .. … … 8- جرب تتعامل مع الدنيا حواليك .. كإنها بنك .. عشان تاخد منه فلوس .. لازم تديله أسباب .. و ضمانات .. يعني لو عايز فلوس كتير عشان تعمل شركة فيها 100 موظف مثلاً .. إثبت للبنك إنك عندك القدرة علي إدارة موظف واحد علي الأقل ( نفسك يعني ) .. و إضمن للبنك إنك عندك القدرة علي ترتيب أولويات الثروة اللي إنت طالبها .. يعني لو عايز مبلغ ضخم و بتوعد البنك إنك حتديره صح عشان مستقبل شركتك .. مش حاتصرفه علي الرفاهيات المختلفة .. يبقي وري البنك من دلوقتي إن المبلغ البسيط اللي معاك ( أياً كان هو كام ) .. إنت قادرتديره صح .. و مش بتصرفه علي الرفاهيات المختلفة ( حتي لو قعدة قهوة ) . .. إضمن للبنك حقه .. بإنك توريه إنك بتحسن التصرف فأكبر ثروة عندك دلوقتي ( وقتك و مجهودك ) .. … … … 9- عمرك شفت راجل ضخم و عضلات .. إتضايق إن طفل صغير عنده ست سنين ضربه ؟!
• عمرك شفت راجل ضخم و عضلات .. واقف بيتخانق مع طفل عنده ست سنين و بيقوله ” إنت أقل مني و أنا أكبر منك يبقي لازم تعتذر لي ” ؟!
• عمرك شفت راجل ضخم و عضلات … بيكلمك و هو بينفخ و غضبان و يقول لك و هو بيشاور علي الطفل اللي عنده ست سنين من بعيد ” أنا حاوريه .. انا حاعلمه .. أنا حاطلع تربتتييت أهله ” ؟!! .. كل الصور اللي فوق ده هزلية ليه ؟! لأن الراجل الضخم العضلات ده .. مش محتاج يثبت أى شيء لأى حد .. و بالتأكيد مش محتاج يثبت إنه أقوي من الطفل اللي عنده ست سنين .. … القوة .. مش إنك تضايق .. القوة .. مش إنك تزعق و تقول ( أنا قوي , إنت عارف إنت بتكلم مين ؟! ) .. القوة .. مش إنك تتوعد و تهدد بغضب و حماقة .. … القوة إنك تبقي شخص الطفل اللي عنده ست سنين ده يحب يلعب معاه .. و لما يضربك بكل طاقته و قوته .. تضحك و تعلمه إزاي يكون أقوي .. و إنه ( الطفل اللي عنده ست سنين ) يحس معاك بالأمان .. … و لو .. و لو فأى وقت حسيت إن ضربة الطفل اللي عنده ست سنين دي وجعتك .. يبقي تشتغل علي نفسك .. و تتمرن كتير .. لحد ما تبقي أقوي من إن الضربة توجعك .. … عمرك حسيت إنك خايف تعتذر لطفل عنده 6 سنين ؟!!! فهمت يعني إيه بقي ( كبر دماغك ؟! ) . … … … 10 - اللحظة اللي تبقي ماشي فيها و حاسس إنك دماغك هي مرجعيتك .. إركن علي جنب .. و أقف .. و إفتح كبوت دماغك .. و شوف إيه اللي باظ . .. دماغك .. عقلك .. أفكارك .. مزاجك .. مشاعرك .. أحاسيسك .. كل الحاجات دي .. إسمها ( هواك ) .. و ( هواك ) اللحظة اللي حيتمكن منك فيها .. حيدمرك .. …
• هواك عايزك تاكل كتير .. أوي ..
• هواك عايزك تمارس كل انواع المتع و الملذات .. بدون أى حدود .. و حيوهمك إن ده حقك ..
• هواك عايزك ماتسمعش غير ليه .. و حيقنعك طول الوقت إنك لو سمعت لأى صوت تاني .. تبقي إنت قليل و ضعيف ..
• اللعبة دي ( بتاعت ماتسمعش لصوت تاني عشان ماتبقاش قليل و ضعيف ) .. لعبة ( الكبر و الغرور ) .. هي اللعبة الوحيدة اللي (هواك ) بيعرف يلعبها .. لأنه أشطر واحد بيلعبها .. لأنه أقدم واحد بيلعبها .. من أيام خلق سيدنا آدم نفسه .. لما ( الشيطان رفض يطيع أمر الله .. لأنه شاف إنه لو أطاع يبقي قليل ) .. لأنه شاف إنه كان مخلوق من نار .. و إستكبر إنه يسجد لمخلوق من طين . … … الغضب اللي بتحس بيه 99% من الوقت .. سببه الأساسي .. إنك حاسس بالكبر .. لو غضبان لأنك شايف حاجات غلط حواليك مثلاً .. هواك بيشحن غضبك ده زيادة أكتر .. بإنه يحسسك إنك ( أفضل .. و أحسن ) .. و إنك تستحق ( الأفضل و الأحسن ) .. و يعميك عن ( واجباتك و أدوارك و مكانك ) في الحياة .. عشان تتصرف بشكل ( غبي و أحمق ) .. بالظبط زي الشيطان . … … الندم و الألم و النقصان اللي بتحس بيه 99% من الوقت .. سببه الأساسي .. إنك حاسس بالكبر .. لأنك شايف إنك كنت تقدر تبقي ( أفضل و أحسن ) .. و إنك كان نفسك تبقي ( أفضل و أحسن ) .. و هواك يفضل يشحن إحساس النقص ده جواك .. لحد ما تفقد الأمل و ( تقنط = تيأس ) .. … و غير الغضب و الندم … حاجات تانية كتير .. … تتبع كل مشاعرك و افكارك .. و إفحصهم كويس جداً .. لو لقيت ( ذرة من كبر ).. إعمل الحاجة اللي ( أول واحد كابر و إستكبر ) رفض يعملها … … أسجد . … … … السجود مش بإنك تحني جسمك .. و تلمس جبهتك للأرض بس … لمس عقلك و أفكارك و روحك كمان .. للأرض .. تطلعاتك .. آمالك .. أحلامك .. مخاوفك .. قلقك .. مشاعرك .. رجعها كلها لأوطي نقطة تحت جبتهك .. و ردد ثلاث : ” سبحان ربي الأعلي ” .. أعلي من كل ده .. ” سبحان ربي الأعلي ” .. أقوي من كل ده .. ” سبحان ربي الأعلي ” .. سخر لي كل ده .. … … قوم من سجودك .. و شوف بقي .. إزاي تستخدم الموارد اللي ربنا ” سخرها ” لك حواليك صح .. بدون ” كبر ” .. … و الله أعلم .