إزاي لقيط إبن حرام , يتيم , إبن بائعة هوي

إزاي لقيط إبن حرام , يتيم , إبن بائعة هوي و رجل إسكتلندي … إترمي فوسط خرابة في البحر الكاريبي .. فقير فحت .. يكبر و يبقي بطل أسطوري و عالم جامعي ؟! … اللي فات ده عبارة عن ترجمة حلمنتيشية لبداية واحدة من أروع العروض الموسيقية اللي شفتها علي مدار السنين اللي فاتت .. ( هاميلتون ) .. و اللي حافظ معظم أغانيها بالكامل و بالحرف .. بسبب تكراري لسماع العرض بالكامل عشرات المرات أثناء مشاويري الطويلة بين القاهرة و إسكندرية . … النص بالإنجليزي : How does a bastard, orphan, son of a whore and a Scotsman, dropped in the middle of a forgotten Spot in the Caribbean by providence, impoverished, in squalor Grow up to be a hero and a scholar? … … العرض الموسيقي ده .. من تأليف و إبداع ( لين مانويل ميراندا ) .. لو ماتعرفهوش .. فده يُعتبر أيقونة تأليف الأغاني في أمريكا عموماً و ديزني خصوصاً تقريباً علي مدار ال10 سنين اللي فاتوا .. و لو دورت .. غالباً حتلاقي أغاني كتير من اللي إنت نفسك سمعتها و بتحبها … هو اللي مألفها . … العرض الموسيقي ( هاميلتون ) بيتكلم عن أليكساندر هاميلتون .. واحد من اللي بيُعتبروا أسسوا أمريكا الحالية بشكلها المعروف .. و اللي شاركوا في تحرير المُستعمرات الأمريكية من السيطرة البريطانية .. و أهم إنجازاته هي : توحيد الكيان المالي و الإقتصادي للولايات المتحدة الأمريكية .. يعني : بدل ما كل ولاية كانت كيان إقتصادي منفصل عن التاني .. و لكن لما بيبقي في حرب بيحاربوا مع بعض تمام .. هاميلتون خلاهم كيان إقتصادي متحد .. و ده ماكنش ساهل إطلاقاً .. و خد لعب سياسي علي أعلي مستوي زمان .. و عشان كده بيتم إعتباره لحد النهاردة أحد الآباء المؤسسين لأمريكا .. بالرغم من إنه ماحكمش كرئيس أبداً . … … العرض الموسيقي هاميلتون نزل سنة 2015 .. و سبب نجاح ضخم جداً جداً جداً .. و لكن كان في أصوات كتير صوتها ماتسمعش أيامها .. أصوات كتير فضلت تسأل .. هو إحنا كده خلاص ؟! .. ماحدش حيتكلم أبداً عن اللي حصل لنا ؟! .. إتمحينا من التاريخ للأبد ؟! .. .. الأصوات دي كانت أصوات الساكنين الأصليين للأمريكتين .. ( أو اللي بيُقال عليهم الهنود الحمر ) . … أى بحث سريع عن تاريخ أمريكا .. حتعرف مدي الفظائع و الجرائم اللي تم إرتكابها علي المواطنين الأصليين دول .. و اللي لحد النهاردة ما زالوا بيتم قهرهم و إزالة تاريخهم بشكل مؤلم للغاية . … ببساطة .. الفلوس و قوة السلاح الأمريكي .. هو اللي سيطر .. و لكن بعد فترة .. سيطرة الفلوس و السلاح ماكنتش كافية .. و لازم كان يتم السيطرة علي النفوس و العقائد و التاريخ كمان .. .. و عشان كده .. علي مدار ال100 سنة اللي فاتوا و أكتر .. عملية إعادة كتابة التاريخ بتتم بشكل فج و مستفذ لأى حد عارف الحقيقة .. … و أسماء زي ( كريستوفر كولومبس ) بيتم الإحتفال بيهم لحد النهاردة فأعياد قومية .. في حين إنهم كانوا من أقذر الشخصيات اللي عاشت علي مدار التاريخ . … … مسرحية ( هاميلتون ) إتعرضت سنة 2015 .. و فضلت تتعرض علي مدار 6 سنين .. كانت من أنجح ما قدمه شارع ( برودواي = Broadway ) ..و ده الشارع اللي حلم أى ممثل / مغني في العالم إنه يقدم عروض فأحد مسارحه .. و بيتم إعتبار ( برودواي ) ده .. هو أيقونة الفن المسرحي في العالم .. .. مجرد حضورك لعرض مسرحي فيه .. بيخليك تتمنظر علي البشر إنك من طبقة عُليا و محترم و بتقدر الفن و السلام و الإنسانية .. … نوع الكائنات اللي حتشوفهم عايشين علي مسارح برودواي دول .. نفس نوع الكائنات اللي حتشوفهم يومياً علي ( نيتفليكس ) .. رجالة مش رجالة .. ستات مش ستات .. و بشر .. مش بشر .. و أى شيء و كل شيء مباح .. تحت مُسمي ( الإنسانية و حرية الفن و حرية التعبير عن الرأي ) . … من 4 سنين تقريباً بدأت تنتشر فضائح عدد من أباطرة العالم ده في أمريكا .. زي ( هارفي واينستين : المنتج الفني اللي كانت شركة إنتاجه مسئولة عن معظم الأفلام الناجحة جداً في التسعينات و خدت أوسكار ) .. و اللي إتضح بعد كده إنه إغتصب عدد كبير من الممثلات دول .. و إتحرش بعدد أكبر .. حتي اثناء ما كانوا لسة يُعتبروا أطفال . .. و ( جيفري إبستين ) .. رجل الإقتصاد و المال اللي كان أنتيم ( بيل جيتس و كلينتون و ملك بريطانيا الحالي و غيرهم ) .. و اللي كان يُعتبر من أكثر المشجعين للفن و الفنانين و الإنسانية و الحرية و الحاجات البمبي المسخسخ دي .. و اللي بعد كده إتضح إنه كان بيدير واحدة من أكبر منظمات تجارة الأطفال للجنس في العالم .. و إتقتل في السجن من كام سنة بعد سجنه بشهور . … … … لما تشوف عرض هاميلتون المسرحي .. حتفهم إن أقوي سلاح كان يمتلكه .. كان قلمه .. إبن اللذينا كان كاتب محنك .. و بيعرف يكتب مقالات تشكل الوعي و الرأي العام . و بالرغم من إن كان في حواليه ناس كتير أكفأ منه .. أو أصح منه .. إلا لأنه كان بيكتب حلو .. قدر يشكل إقتصاد أمريكا علي مزاجه حرفياً . … … علي مدار التاريخ … اللي بيقدروا يدخلوا للبشر من الحتة الناعمة البمبي المسخسخ دي .. هما اللي قدروا يشكلوا وعي شعوب .. .. و للأسف .. الناس مابتكتشفش حقيقة قُبح الوشوش الحقيقية دي للماسك البمبي المسخسخ ده .. غير بعد ما يبقوا ضحايا له .. .. حتي غاندي .. لو حد عمل سيرش بسيط علي تفاصيل حياته .. حيكتشف مصايب .. و ( أمهم تيريزا - Mother tereza ) مصايب تانية كتير جداً . … … مش معني كده بكل تأكيد إن مافيش خير و حاجات حلوة في البشرية .. إطلاقاً .. .. و لكن .. أى حد يحاول يوهمك إنك : ( سيب نفسك خالص .. و ريح و ريلاكس كده .. و بلاش تتعصب و تغضب .. و خليك عايش بالحب .. خليك عايش بالحنان .. و سيب نفسك و الإنسانية حتشيلك .. .. إعرف إنه بيطريك عشان ولامؤاخذة … @^#%^! … … … الهزيمة الأكبر اللي إتهزمها المواطنين الأصليين الأمريكيين .. ماحصلتش بسبب البطاطين اللي مليانة أوبئة اللي نشرها بينهم المُحتل الأمريكي .. ولا حصلت بسبب عمليات القتل و الإغتصاب اللي إستمرت علي مدار عشرات السنين .. .. الهزيمة الأكبر اللي إتهزمها المواطن الأمريكي الأصلي .. إنه صدق إنه لو فأى وقت من الأوقات حاول يشرح قد إيه ( كولومبس , هامليتون , جورج واشنطن , … و غيرهم ) عملوا مصايب قد إيه .. يبقي غلطان .. لأنه كده حيبقي بيحارب ( فن المسرح , و جمال تماثيل التاريخ , و روعة الجبل اللي منحوت عليه وشوشهم لحد النهاردة ) . … … … بس بكل أمانة .. المسرحية فيها أغاني حلوة 🙂