1- أحد الأصدقاء اللي إتعرفت عليهم في الجيش .. كان

1- أحد الأصدقاء اللي إتعرفت عليهم في الجيش .. كان مهنته برة الجيش صبي جزار .. و فأحد المرات اللي كنت باتكلم معاه فيها عن إني بافكر أشتري رغيف حواوشي من الكافيتيريا .. كوسيلة إني أزود كمية البروتين في وجباتي عشان كنت باروح الجيم يومياً في الجيش 😅 .. و لكني كنت مش متأكد من جودة اللحمة أو جودة الرغيف نفسه .. و باحاول أستفيد من خبراته .. شرح لي إن عدد كبير من محلات الحواوشي اللي منتشرة ( و مناطق شعبية بالذات ) .. الرغيف بيكون معظمه ( أو كله ) عبارة عن ورق كرتون ملون .. و عليه توابل و بصل .. تخليك تحس إنك بتاكل لحمة .. كتير .. و إن أكتر زباين بيستهلكوا الحواوشي ده .. هو اللي بيلعبوا جيم في المناطق دي و عايزين يزودوا بروتين 🙂 .. من الآخر كان بيقول ليا ” كل و ماتفكرش و معدة الشعب المصري بتهضم الزلط 😁 ” … 2- أيام لما كنت لسة جاهل فحت بكل ما له علاقة بالعربيات و بافكر أشتري .. و باتمشي مع أحد أصدقائي اللي بيتكلم عن العربيات بنفس العشق و الشغف اللي أنا باتكلم بيه عن الأنيمي مثلاً .. وقفت و شاورت له علي عربية راكنة جنب السوبرماركت .. ما شاء الله علي المنظر .. شكلها زي العربيات اللي في لعبة (Need for speed ) مثلاً .. و قلت له .. يعني دي تعمل لها كام مليون ؟ رد عليا و قال لي : دي تعمل لها قد تمن توكتوك تقريباً .. و يبقي لك باقي كمان !! .. مافهمتش كتير .. شرح لي إنها مجرد كماليات و إكسسوارات فقط .. و إنها لو حد بص لها بصة مش كويسة و هي ماشية ممكن تتقلب .. في حين إن عربية تانية زي دي مثلاً ( و راح مشاور علي بيجو 504 .. اللي هي العربية التسعيناتي أوي دي ) .. ماحدش بيفرط فيها .. و إنها لو مشت جنب العربية الجامدة أوي دي .. غالباً حتخليها حامل 🤣 . … 3- مؤخراً .. جات لي رسالة تسألني عن مُحتوي شخص مُعين .. كنت سمعت إسمه مرة أو مرتين بالكتير قبل كده .. و طلبت مني إني أشوف 4 فيديوهات له .. عشان أقدر أجاوب علي سؤال متعلق بالفيديوهات دي .. شفت ال4 فيديوهات ( كل فيديو ساعتين تقريباً ) .. و جزء كبير جداً من محتوي الفيديوهات عجبني فعلاً .. كلام كتير جداً عن ( الطاقة , التأمل , التفكير , … ) .. و إزاي كل ده أساسه موجود في الدين .. و في الإسلام .. .. رديت بما معناه : أنا ماعرفش عن الشخص ده غير ال4 فيديوهات دول بس .. و عملت سيرش سريع جداً أحاول أفهم أكتر .. لكن لسة ماكونتش وجهة نظر كفاية .. و اللي شفته في الفيديوهات لم يُخالف أى شيء أساسي في معلوماتي ( المحدودة ) عن العقيدة و الشرع .. و إني غير أهل للفتوي .. و إن ( و ده الأهم ) .. طالما الأساس مش مختلف .. الخلافات الصغيرة مش بالضرورة نقف عندها .. خصوصاً لو ماعندناش علم أو أهلية كافية . يعني .. التركيز علي الأهم هو المهم … علي مدار الكام يوم اللي فاتوا .. عملت سيرش أكتر شوية عن الشخص ده .. شفت فيديوهات تانية له .. و شفت فيديوهات تانية بتتكلم عنه .. بهجوم يصل لأقصي الدرجات و وصفه بالشيطنة .. و بمديح .. و ناقشت أخويا ( و هو كان علي علم أكتر مني بمحتواه ) .. و شرح ليا موقفه منه ( هو ضده جداً ) .. و ناقشت أهلي .. و سمعت وجهة نظرهم .. .. و علي مدار الأيام اللي فاتت .. كنت بافكر في موضوع الشخص ده و عايز أكون رأيي عنه .. و أعتقد و الله أعلم .. إن البوست ده بيشرح وجهة نظري تقريباً ( لحد دلوقتي ) .. … 4- في التسعينات و بداية الألفينات .. كان في مشكلة ضخمة و مشهورة في مباني و بيوت كتير جداً تم بناءها في إسكندرية .. و ما زالت تبعات المشكلة الضخمة دي مستمرة لحد النهاردة .. و هي مشكلة ال ( أساسات المضروبة ) .. .. البيت يتبني عمارة ضخمة 14 دور مثلاً .. و لكن المسلح و الأساسات كلها كانت أى كلام .. التشطيب من برة شكله جميل جداً .. و الديكورات من جوة ممتازة .. و مدخل البيت تحفة معمارية .. و لكن العمارة دي معرضة للسقوط فأى لحظة … و أى هزة بسيطة .. لا قدر الله بتؤدي لمصيبة .. ضخمة . … 5- أعتقد إن مشكلتي ( لحد دلوقتي ) مع محتوي الشخص ده .. إنه كلامه عبارة عن 90% توابل و ديكورات و كماليات .. حاجات جميلة جداً .. لو الأساس ( substance ) موجود و سليم … و لكنها خطر جداً جداً جداً .. لو كان ال( أساس ) فيه مشكلة .. أو مشاكل .. .. و الأخطر .. هو توجيه الكلام ده ( المحتوي ده ) .. كحلول جاهزة لل ” زباين ” .. بدون شرح أو توضيح ( نوع الأساس ) بتاعه .. … بالظبط زي الدواء ال( placebo = المعتمد علي الإيحاء ) .. كبسولة من السكر .. و محتواها .. فاضي .. مش بيعالج أى شيء .. و فأحيان كتير بيضر و بيؤذي .. و الأخطر هو لما يتباع علي إنه ( علاج ) كافي .. أو بديل .. … 6- ال ( يوجا ) .. ال ( تأمل ) .. ال ( mindfulness ) .. حاجات حقيقية .. و لكن كل واحدة فيهم مختلفة بالكامل عن التانية .. جداً .. و إستخداماتهم نفسها حالياً .. أصبحت مختلفة بالكامل عن اللي تم إبتكارهم عشانه .. يعني : في مئات ال (yoga studios = ستوديوهات يوجا ) .. اللي بيتمارس فيهم مجرد إطالات و ( Pilates ) .. و مالوش أى علاقة بأى شيء عن ال ( يوجا ) أساساً إتعملت ليه .. … ال( تأمل ) .. عبادة عقلية و جسدية و نفسية .. بكل تأكيد .. ده لو بتعملها بالنية دي .. و دي حاجة إنت مش محتاج تقعد مربع قدام شمعة عشان تعملها إطلاقاً .. دي حاجة يكفي إنك لما تشوف أى شيء قدامك في الحياة … تفتكر إعجاز الله سبحانه و تعالي .. و تقول سبحان الله .. خطر جداً جداً .. إنك تفهم إن دي هي ال ( يوجا ) .. مثلاً .. و لكن لو بتعملها بنية إنك ( تتعلم تطير مثلاً ) .. يبقي إنت فعلاً ( زبون ) .. … ال ( mindfulness ) ده مفهوم بسيط جداً في شرحه .. صعب جداً في تطبيقه .. شرحه : be in the moment = يعني هاكونا متاتا .. يعني مابلاش تتكلم في الماضي .. الماضي ده كان كله جراح … و بلاش تشغل بالك بالمستقبل .. لأنه لسة ماجاش … و عيش و إستمتع باللحظة .. كل ده كلام جميل .. لكن إنك تطبقه بشكل مستمر .. صعب جداً .. و محتاج تدريب .. و مفيد فعلاً في حالات كتير … خصوصاً ال (anxiety = التوتر ) .. … 7- لكن .. لما أبدأ أستغل تسريحة شعري و كاريزمتي .. في إني أبدأ أتكلم عن ال ( يوجا و التأمل و الطاقات و الشاكرا و الشحنات السلبية و الموجبة ) .. و أقول من كل علم جملة .. و من كل موضوع آية .. ده بيبقي عبارة عن رغيف حواوشي كبير أوي … مليان ورق كرتون فقط .. و توابل .. كتير .. جداً .. … اللي قدامي .. حيفترض فيا إني فاهم أنا باتكلم فإيه .. لما يسمعني باقول حاجات زي : ” فكر و ماتكتفيش باللي باقول لك عليه ” .. اللي قدامي مش حيفكر .. و لكن حيظن إني ” فكرت ” له .. و حيثق فيا .. … لما يسمعني باقول حاجات زي مثلاً : ” و موضوع الشحنات الإيجابية و السلبية و إزاي ممكن ننظمها عن طريق عٌقد الشاكرا ده موضوع كبير .. حابقي أشرحه فوقت تاني ” .. اللي قدامي مش حيتسائل إطلاقاً عن الهري اللي إتقال في الجملة دي .. و لكن حيكتفي بإنه ” يصدق ” إن في حاجة إسمها ( عٌقد شاكرا .. و شحنات سلبية و إيجابية ) .. … 8- النتيجة هي ال : وهم . .. و ده خطر فظيع جداً جداً .. … ( وهم العلم ) : و ده أعتي مراتب الجهل و الحماقة .. لأن اللي مش عارف .. و عارف إنه مش عارف .. ده جاهل ممكن يتعلم . اللي عارف .. و عارف إنه عارف .. ده عالم .. نتعلم منه . لكن اللي مش عارف … و يظن إنه يعلم … ده أحمق .. نجتنبه . … و الأخطر من ( وهم العلم ) … هو ( وهم العقيدة ) .. و ده بيؤدي لأسوء شخصية ممكن تتعامل معاها .. علي الإطلاق .. لأنه مش بس أحمق .. لأ .. ده إنسان أصبح معتنق الحماقة كدين و عقيدة .. و بيسعي إنه ينشرها .. بل .. و يحارب و يموت من أجلها .. … العالم منذ بداية التاريخ .. و فكل مكان .. فيه النوعية دي من البشر .. ربنا ينجينا منهم . … 9- طيب نعمل إيه ؟! .. نفرّق إزاي بين الحواوشي الأصلي .. و الحواوشي المضروب ؟! أكيد مش حنتعلم طبخ و جزارة .. أنا جعان و عايز آكل و أكمل حياتي .. .. نفرّق إزاي بين العربية اللي شكلها حلو بس خُردة من جوة .. و بين العربية المتينة الجامدة أوي بس إحنا اللي مش فاهمين ؟! أكيد مش حنفضل نتعلم ميكانيكا .. أنا مستعجل و عايز أشتري عربية و أسوق أخلص مشاويري . … نفرّق إزاي بين الدواء الحقيقي .. و الدواء البلاسيبو ؟! .. أكيد مش حادخل صيدلة أدرس .. أنا تعبان و عايز الدوا دلوقتي حالاً .. … و نفرّق إزاي بين اللي بيتكلم في الدين بغير علم .. و بين اللي عالم في الدين و يؤخذ العلم منه ؟!.. أكيد مش حادرس لغة عربية و أزهر و سنين فقه و شريعة .. أنا عايز الفتوي و الحل دلوقتي حالاً . … الإجابة هي : إخلص قلبك .. و بعدين إستفتيه .. يعني : إخلص النية لله .. و بعدين فكّر بالمنطق و العقل .. … يعني ماتجيش تقول أنا حاسمع كلام اللي طلع يفتي في التيليفزيون و قال إن ( كذا و كذا ) حلال .. لمجرد إن ده بيتماشي مع ( مزاجك أو رغبتك ) دلوقتي .. و بعدين تقول ( ما هو أنا إستفتيت قلبي ) .. لا يا جميل .. إنت كده ماستفتتش قلبك .. إنت كده إستفتيت هواك .. و في فرق ضخم بين القلب .. و الهوي . … يعني ماتجيش تقول أنا حاكل رغيف الحواوشي أبو 3 جنيه .. أصل كل الناس اللي بتاكل دي أكيد مش مجانين .. لا يا جميل .. إنت كده مش بتفكر بالمنطق .. إنت كده بتفكر بمعدتك و لسانك .. … 10 - إخلاص القلب و النية معناهم : إنك لو النهاردة كنت مضطر تحتار بين كلام مش فاهم معناه .. بكرة حتحاول تتعلم معلومة جديدة علي الأقل ( في الإتجاه الصح ) .. مش الإتجاه اللي علي مزاجك .. .. يعني : لو النهاردة سمعت حد بيفسر آيات قرآن بشكل عجيب … إخلاص قلبك و نيتك معناهم إنك بكرة حتبذل مجهود إنك تتعلم لغة صح .. و تبحث عن التفاسير الاولي .. و تفهم سبب نزول الآيات .. و بعدين تبحث عن الأحاديث اللي لها علاقة بالآيات .. و بعدين لو لقيت اللغة صعبة عليك .. تسأل حد أعلم باللغة منك .. و بعدين لو نفسك خاطبتك بشكوك في الأحاديث .. تقرا عن علم الحديث .. و بعد كل ده .. ترجع تستفتي قلبك . … 11- الحديث الشريف اللي بيستخدمه الناس بما معناه ( إستفت قلبك و لو أفتوك ) بالكامل في الكومنت الأول .. مع لينك شرحه . … …

أنا مش حاقول مين هو الشخص اللي باتكلم عنه في البوست .. و رجاء لو تعرف هو مين ماتقولش في الكومنتات .. لأكتر من سبب .. و يمكن أولهم ( فوجهة نظري ) هو إنه خطر جداً جداً جداً .. لأي شخص حيسمع له بدون أساس و علم حقيقي .. زي ما شرحت . .. و سبب تاني .. هو إن كلامي عام .. و بيعبر عن وجهة نظري فكل ما هو مشابه لنفس الموضوع .. حتي لو كان حاجات زي اللي بيوقفوك في المول و يقولوا لك : ( مبروك حضرتك كسبت معانا شاليه في السخنة لأن ملامحك حلوة و مسمسمة 🤣) ..