واحد زائد واحد ... لسة بتساوي إتنين
و هي لما كنت باطنش المحاضرات المملة .. و أقعد علي سلالم الكلية اللي قدام مستشفي جمال عبد الناصر ..
واحد زائد واحد … لسة بتساوي إتنين .
من كام يوم .. كنت باتمشي في إسكندرية .. و رحت لحد قدام الكلية ( هندسة ) .. و وقفت شوية .. أكتر ذكري لقيتها طغت علي عقلي و إحتلت المساحة الأكبر من مشاعري .. هي ذكري خاصة بيا لوحدي جداً .. سنة 2009 .. و هي لما كنت باطنش المحاضرات المملة .. و أقعد علي سلالم الكلية اللي قدام مستشفي جمال عبد الناصر .. و أحط سماعات الموبايل ال(n95 8g) فوداني .. و أسمع كتاب ( Fermat’s Last Theorem = نظرية فيرمات الأخيرة ) . … الكتاب ده من الكتب اللي فعلاً ليها تأثير كبير علي طريقة تفكيري تقريباً .. سمعته مرة أوديو بوك … و قريته بعدها مباشرة ( لأنه كان بالعظمة دي ) .. … الكتاب بإختصار شديد و مخل .. ( و بناءاً علي ذاكرتي اللي مش قوية إطلاقاً ). بيتكلم علي واحد إسمه ( بيير دي فيرمات ) .. راجل عادي خالص ( مش متخصص أو دارس محترف للرياضيات إطلاقاً ).. و لكنه وقع فإيده كتاب من مجموعة كتب ( العناصر ) .. بتوع ( إقليدس ) .. أيون ( إقليدس ) اللي إنت درست نظريته في أولي إعدادي ده .. … المهم .. (فيرمات ) قرأ الكتاب .. بس كان أثناء قراءته .. بيكتب شوية ملاحظات في الهوامش .. و بعد فترة .. بدأ يراسل دكاترة جامعات و باحثين رياضيات في ملاحظاته دي .. و كان دايماً بيطلع صح .. و بدأ صيته يعلو إنه واضح إنه دماغه نضيفة في الرياضيات . … لحد ما مات .. و بعد موته … مش فاكر مين لقي نسخة الكتاب اللي كان بيير دي فيرمات بيكتب فهوامشها .. و لقي 12 ملاحظة .. 12 ملاحظة مكتوبين علي مدار الكتاب .. ماكنش ناقش فيهم حد أو بعت لحد عنهم .. 12 إفتراضية أوجدها فيرمات .. و ماكنش بيكتب إزاي لقي الإفتراضية دي .. ماكنش فاضي تقريباً يشرح إزاي يثبتهم . … ال 12 ملاحظة دول .. بدأوا الناس يدرسوهم .. و يشوفوا .. هل فيرمات ده كان بيهبد مثلاً ؟!!! . ولا الراجل دماغه كانت جامدة جداً .. لدرجة إنه فعلاً إفتراضياته دي كانت سابقة عصره بزمن . … و علي مدار السنين اللي بتتلو .. الناس فعلاً بتقدر تثبت 11 فرضية من ال 12 دول .. .. 11 فرضية مش سهلين .. 11 فرضية بيثبتوا إن فيرمات مش بيهبد .. إلا الفرضية ال 12 .. الفرضية الأخيرة .. فرضية فيرمات الأخيرة - Fermat’s Last Theorem … … الفرضية دي بتمشي كالتالي : ( و معلش إستحمل شوية لو الرياضة بتخوفك ) . … عارف إنت قاعدة ( فيثاغورس - pythagorus ) ؟! بتاعت إن ( س تربيع + ص تربيع = ع تربيع ) ؟! سهلة صح ؟ و في أرقام كتير بتمشي مع الموضوع ده .. زي تلاتة تربيع + أربعة تربيع = خمسة تربيع . أو خمسة تربيع + إتناشر تربيع = 13 تربيع . … … علي هامش الصفحة اللي مكتوب فيها قاعد فيثاغورس دي … بيكتب بيير دي فيرمات فرضيته الأصعب .. بيكتب : إن المعادلة دي ( أ مرفوعة لأس س + ب مرفوعة لأس س = ج مرفوعة لأس س ) بالإنجليزي يعني : a^n + b^n = c ^n مافيش أى تلات أرقام تمشيها أبداً .. لو ( n ) دي أكبر من 2 . يعني مثلاً .. مستحيل تلاقي تلات أرقام ( أ , ب , ج ) يمشوا المعادلة : أ^3 + ب^3 = ج^3 أو أ^4 + ب^4 = ج^4 أو حتي : أ^66 + ب^66 = ج^66 … و بدل بقي أرقام ال( أس ) .. بأى رقم تحبه .. و برضو حيبقي مستحيل تلاقي تلات أرقام يحققوا المعادلة دي .
الفرضية علي الرغم من بساطتها … إلا إنها عذبت الناس لأكتر من 300 سنة .. أكتر من 300 سنة .. من بعد موت بيير دي فيرمات … و الناس بتحاول تثبت نظريته الأخيرة … و مش عارفين .. ناس كتير إدعت إنه كان بيهبد … بس الراجل عمره ما طلع غلط قبل كده … ليه حييجي في دي و يهبد ؟! .. طب عرف إزاي ؟! يعني 300 سنة .. كل علماء و فطاحل الرياضة و التنانين المجنحة في عوالم الرياضيات بيحاولوا يثبتوا شيء ما … بيير دي فيرمات كتبه بكل بساطة و أريحية في هامش صفحة فكتاب . … و ماقدروش .. و في قصص عجيبة جداً للبحث المضني في الموضوع ده .. و منها مثلاً .. إن كان في شخص ما ناوي ينتحر .. خلاص رستأ كل أموره و ظبط كل حاجة إنه الساعة 12 بالليل يموت نفسه .. و بعدين علي الساعة 10 بالليل كده .. لقي إنه خلاص خلص كل اللي كان عايز يعمله قبل ما يموت نفسه .. و ماكنش عايز يموت نفسه قبل الميعاد اللي هو محدده .. فكان قدامه ساعتين فاضي فيهم .. و زهقان .. فقرر يفتح كتاب قديم من مكتبته .. الكتاب ده كان بيتكلم عن فرضية فيرمات الأخيرة .. .. بدأ يقرأ .. و بعدين الموضوع شده .. جاب ورقة و قلم و حاول يفكر في الموضوع بنفسه .. و شوية لقي الباب بيخبط و الخادم بتاعه بيدخل عليه .. بص في الساعة .. لقاها الساعة 6 الصبح .. الموضوع شده لدرجة إنه نسي إنه كان عايز ينتحر .. و لغي موضوع الإنتحار من دماغه و قرر يقضي باقي عمره يدور علي حل .. و ماعرفش 😅 … عالم ياباني تاني مثلاً .. فضل يدور علي حل .. و فعلاً قرب جداً … بل إن أثناء بحثه عن الحل .. تقريباً وصل لحاجات متقدمة جداً في علم الرياضيات ( مش وقت ذكرها دلوقتي ) .. بس علي آخر لحظة .. لقي نفسه غلط .. و الحل مانفعش .. ماستحملش الصدمة و إنتحر 😭 … … و غيرهم كتير … لحد سنة 1993 … واحد إسمه : أندرو وايلز .. بعد بحث طوييييييل … قدر يوصل للحل .. و يقدمه فمحاضرة .. تعتبر من العلامات المميزة للقرن العشرين .. و بعدين كان في شوية تفاصيل تانية كده مش وقتها دلوقتي .. المهم إن : فرضية فيرمات الأخيرة .. أحد ألغاز القرن العشرين .. تم إثباتها .. أخيراً .
طب إيه اللي فكرني بالحدوتة دي دلوقتي ؟! … الحقيقة هي إني عمري ما نسيتها .. و هي من ضمن قصص و حاجات كتير دايماً شغالة بإستمرار في عقلي .. و بتشاور علي حاجة أساسية جداً .. ألا و هي : ((( الأساسيااااات ))) . … يعني إيه ؟؛ ببساطة .. عالمنا الحالي .. مليان بالكثير و الكثير جداً من التفاصيل اللي ممكن تتوه أى إنسان .. تتوهك … للدرجة اللي أحياناً تخليك تنسي .. إن الثوابت نفسها .. لسة ماتغيرتش . … إحنا لسة بشر .. نفس البشر اللي مشوا علي الأرض دي منذ بدء الخليقة .. فينا نفس الأمراض النفسية اللي كانت فأول 100 إنسان مشي علي الأرض .. فينا ( غل و حسد و غرور و كبرياء و نرجسية و شره و … ) .. .. و فينا نفس الفضائل اللي كانت موجودة برضو فأول 100 إنسان .. فينا ( تضحية و نبل و فروسية و حب و رحمة و … ) . … … القواعد اللي حكمت عقول و أنفس البشر الأوائل دول .. هي نفس القواعد اللي بتحكم عقولنا و أنفسنا دلوقتي .. .. لكن من اللحظة الأولي .. و الوسيلة إن الإنسان يبوظ .. يتهزم .. هي إنه يتوه .. يتوه وسط التفاصيل .. يتوه وسط متاهات كتير تخلي بوصلته تختل .. تخليه فلحظة معينة ياخد قرارات عكس الفطرة .. عكس الطبيعي .. و بعد قرار غلط … ييجي قرار غلط أكبر عشان يداري علي الغلط اللي قبله .. و هكذا و هكذا .. … … و حتي لو توهان الإنسان ده ماوصلوش إنه ياخد قرارات غلط .. توهانه فحد ذاته هزيمة .. … … و من رحمة ربنا علينا … هي وجود بعض الثوابت … اللي ماتغيرتش منذ البداية .. ثوابت ربنا ذكر لنا في القرآن إننا نقدر نتأمل فيها عشان نفتكر .. نفتكر إن الثوابت .. و الأساسيات … فيهم دايماً بداية الحل .. بداية الطريق .. … … من لحظة بداية الرياضة … واحد زائد واحد = إتنين .. … علي مدار ألاف السنين من الرياضة .. و الفروع .. و التعقيد .. في ( axioms - حقائق ) .. ثابتة و أساسية .. بيتبني عليها أى شيء في الرياضة . و بالتالي في العلوم (فيزياء و كيمياء و أحياء ) .. .. الإنسان كمان فيه ( axioms - حقائق ) … ماتغيرتش منذ لحظة خلقه .. .. نصيحتي ليك .. منين ما تحس بالتوهان .. منين ما تحس إن الموضوع عقد منك .. منين ما تحس إنك دخلت فمتاهة و تايه وسط تفاصيل و تكنولوجيا و أحداث كتير بتحتل كل ثانية في اليوم بتاعك .. .. إفتكر إن ثوابت الدنيا ماتغيرتش من لحظة بداية الخلق .. و مش حتتغير إلا بنهاية الخلق .. إلا لما تشرق الشمس من مغربها .. .. و سمي الله .. و هات ورقة و قلم … و إبدأ الحل من جديد .. … … أندرو وايلز في حله لفرضية فيرمات الاخيرة .. مابدأش من الصفر … و لكن ساعده كل من حاول في الموضوع علي مدار ال300 سنة اللي فاتوا .. … … و الله أعلم .