معاناة الأوبن بوفيه

معاناة الأوبن بوفيه .

في كل الفنادق اللي قعدت فيها ( ال4 و ال5 نجوم .. و ما فوقهم ) .. دايماً المطعم عبارة عن ( أوبن بوفيه ) .. وجبات الفطار و الغداء و العشاء .. كل واحدة فيهم عبارة عن عدد ضخم من الأصناف و الأنواع و الأشكال .. لحوم 6 أنواع علي الأقل .. طيور مشوية .. و طيور مخلية .. و طيور مع خضار .. و خضار من غير طيور .. و أطباق كتييييير جداً .. غير ما لا يقل عن 20 صنف حلويات مثلاً … و غيرهم من المعجنات .. و السلطات .. الكتيييييييير .. و الشوربات .. الأكتر .. … … شخصياً .. عمري ما كنت ( أكيل ) .. أو ( ذواقة) .. طول حياتي .. المتعة الأكبر في الأكل بالنسبة ليا .. هي الإنتهاء منه .. إني أخلص و أقوم أكمل اللي كنت باعمله .. أو بنسبة كبيرة باكل علي مكتبي .. أثناء ما باكون باعمل أى حاجة تانية أو باتفرج علي أى حاجة . … و مع ذلك .. رغبتي في إني أستطعم كل الأصناف دي .. و أكتشف .. و أجرب .. دايماً باحس إنها محدودة بحجم معدتي .. و حجم شهيتي .. … أصل حاكل قد إيه ؟! .. و لو حطيت قدامي مثلاً 20 صنف أو أكتر .. بعد فترة قصيرة .. بتبدأ حواس التذوق عندي تتبلد .. و ألاقي نفسي ماعرفتش أستمتع بأى طعم من الطعوم الكتير جداً اللي حطيتها قدامي دي . … … فبتكون النتيجة دايماً هي إحساس بالاقيه مسيطر عليا .. بإني متضايق .. مش مبسوط أو سعيد .. مقارنة بالسعادة اللي باحس بيها لما باطلب بيتزاية واحدة .. و توصلني و أفتحها و أنا قاعد علي مكتبي .. .. أو السعادة اللي باحس بيها لما أطلب ساندوتش شاورمة فراخ بس مثلاً .. و يوصلني لوحده .. و جنبه سلطة تومية أو بطاطس مقلية بالكتير . … … الإختيارات الكتييييييييييييييييييير أوي اللي في الأوبن بوفيه دي .. بتتعبني .. و بتخليني أحس قد إيه أنا محدود .. محدود المعدة .. مقارنة بالمعروض من كميات أكل .. محدود الشهية .. مقارنة بالمعروض من أصناف .. .. محدود . … … … … أول مرة قررت أشتري موبايل أندرويد فحياتي .. حددت ميزانية معينة .. كانت تعتبر أقل من المتوسط بحاجة بسيطة في الوقت ده .. كانت الميزانية دي في الوقت ده بتمثل بالنسبة ليا مبلغ محترم .. و كان المعروض قدامي في السوق في الوقت ده بالسعر ده .. هو نوعين بس من الموبايلات .. المقارنة بينهم خدت مني شوية وقت صغيرين .. و إشتريت الموبايل و انا سعيد و راضي و مبسوط جداً .. و كان في الوقت ده في فئات موبايلات تانية كتير .. في فئات سعرية أغلي بكتير .. حرفياً ماكنتش بابص عليهم أساساً و لا أشغل بالي بتفاصيلهم و إمكانياتهم … … لما قررت أغير موبايلي ده بعد فترة .. و إحتياجاتي تطلبت موبايل أندرويد ( فلاج شيب = يعني من أغلي الأنواع ) … حددت ميزانية تخليني أقدر أشتري أى موبايل في السوق .. فبالتالي أصبح الإختيار عندي معناه إني أختار من كل المعروض .. و لكن في الوقت ده كان في إختيارات كتير في الفئة السعرية دي .. كلها أحلي من بعض .. و لقيت عينيا بتشدني أعرف عن الآيفون اللي كان معروض في الوقت ده .. بالرغم من إني مش محتاج آيفون .. و لكن لأني كنت قادر علي إقتناءه .. لقيتني بافكر فيه .. بالرغم من عدم وجود الإحتياج .. الرغبة تواجدت .. بالرغم من عدم وجود إحتياج .. .. و لاقيت إني حاسس بشوية غضب و إني متضايق .. متضايق لأن ميزانيتي اللي كنت محددها مش حتسمح إني أجيب أعلي موبايل أندرويد في السوق .. و أعلي أيفون فنفس الوقت .. .. متضايق لأني حسيت إن ميزانيتي محدودة .. إني … محدود . … … … … أنا ممكن أدي أمثلة تانية كتير .. أوي .. بس أعتقد إن الفكرة الأساسية هنا وصلت .. فكل حاجة شفتها في الحياة .. كم المعروض لا ينتهي .. و مهما وصلت قدرتك … حتلاقي نفسك في النهاية محدود .. … طيب .. فرضاً إنك ورثت جيف بيزوس .. و بقيت أغني برنس في العالم .. و جبت أفضل فريق طباخين يعملوا لك أوبن بوفيه كل يوم .. و فكل وجبة ..

• حتخلص الطعوم اللي ربنا خلقها في الحياة ؟! . .. و إنك إشتريت أغلي 20 عربية في العالم .. و إشتريت مدن كاملة تسوق فيها براحتك بدون زحمة و مطبات … و تكاتك و العياذ بالله تزنق عليك .. .. و إنك إتجوزت أجمل/أجمد 40 بنت في العالم .. .. و إنك إمتلكت أجمد 100 بيت و قصر في العالم .. .. و أنك إمتلكت .. و إمتلكت .. و إمتلكت .. … حتلاقي نفسك برضو .. محدود .. بالوقت . … … كل ثانية بتعدي .. كل ما وقتك بيخلص .. و كل ما بيتعرض جديد .. لحد ما حتوصل إنك علي فراش الموت و بتحتضر .. و قدرتك علي الإمتلاك مش حتقدر تمتلك البنت الأجمل و الأجمد اللي لسة طالعة تريند علي الإنستاجرام مثلاً .. خلاص .. إنت حتموت و مش حتلحق توصل لها .. .. قدرتك علي الإمتلاك مش حتساعد إنك تموت / تنام علي 100 سرير مختلفين .. في 100 قصر مختلفين .. هو سرير واحد اللي محدوديتك حتسجنك فيه … .. قدرتك علي الإمتلاك مش حتساعد تمتلك العربية الأحدث اللي حتطلع قبل موتك ب 5 دقايق .. .. قدرتك علي الإمتلاك … مهما تضخمت … حتفضل محدودة … بمحدوديتك . يا محدود .. … … … … و حتكتشف في الآخر .. إنك في الحقيقة .. خسرت و مامتلكتش الحاجة اللي كنت بتدور عليها طول الوقت .. … الشبع ؟ كنت حتشبع فعلاً لو قدرت تفهم محدودية معدتك .. و كفيت عينك و نفسك عن النظر لكل المعروض من الأصناف .. و فهمت إن متعة الأكل الحقيقية .. هي فإنه يديك طاقة للحياة .. مش يستنزف طاقة حياتك . … الزواج ؟ كنت حتشبع فعلاً لو قدرت تفهم محدوديتك .. و كفيت عينك و نفسك عن النظر لكل المعروض من الأصناف .. و فهمت إن متعة الزواج الحقيقية هي فإنه يديك طاقة للحياة .. مش يستنزف طاقة حياتك . … السكن ؟ العربيات ؟ التكنولوجيا ؟ اللبس ؟ ال … دنيا ؟! .. كنت حتشبع منها فعلاً .. لو فهمت محدوديتك .. و كفيت عينك و نفسك عن كل المعروض .. و فهمت إن متعة الدنيا الحقيقية .. هي فإنك تعرف تقطم منها فقط .. علي قد ما تقدر تمضغ .. و تمضغ علي قد ما تقدر تبلع .. و تبلع .. علي قد ما تقدر تهضم .. و أى نظرة أو تطلع زيادة .. فوق محدوديتك الحالية .. حيخليك تحس بنقص و عجز يكرهك فمحدوديتك دي .. يكرهك في إنك محدود .. في إنك إنسان . … … … … نفس الموضوع بالمناسبة عن العلوم و المعارف و المحتوي .. و كل ما هو معروض بشكل لا ينتهي حالياً .. .. إفهم محدوديتك .. تصالح معاها .. و إستخدمها عشان تقدر تحقق الأهم .. ألا و هو : الإنتاجية .. .. و لكن الإنتاجية دي أتكلم عنها في بوست لاحق إن شاء الله .. ( لأن قدرتك علي القراءة برضو محدودة :) ) … و الله أعلم .