الشغل , و الحياة , و الشطرنج ... علي طريقة

الشغل , و الحياة , و الشطرنج … علي طريقة مقامرة الملكة ( Queen’s Gambit ) .

أمي ربنا يبارك لها علمتني الشطرنج أنا و أخويا أحمد .. لما كنا لسة فإبتدائي .. كنت في سنة تانية إبتدائي أيامها .. علمتنا حركة و إسم كل قطعة من القطع .. و كانت بتلاعبنا و تسيبنا نغلبها .. و كانت بتسيبنا نرجع في الحركات لما كنا بنعمل غلطة مثلاً .. أو ماناخدش بالنا من حركة .. .. و كانت بتسيب لنا الوزير بتاعنا و مابترضاش تاكله .. .. و أفتكر كويس إني أنا و أحمد فضلنا نلاعب بعض بالساعات و السنين .. و مستوانا يعلي إحنا الإتنين .. لحد ما وصلت لثانوي عام .. و كنت شايف إني لا يشق ليا غبار في الشطرنج .. و إني لعيب خطر و سهل إني أفوز ببطولات لو ركزت شوية .. بس أنا اللي مشغول حبتين بالدراسة . … … ربنا أكرمني بأصدقاء في مرحلة ثانوي .. شاركوني حبي للشطرنج .. و للمرة الأولي أبقي بالاعب حد غير أحمد أخويا بإستمرار .. و منين ما كنا بننزل نخرج .. كنا بناخد معانا شطرنج .. و بدأت أعرف إن مستوايا مش وحش … بس برضو مش رائع إطلاقاً .. و إني علي أفضل تقدير يادوب ( باعرف ألعب ) . … … لحد ما صديق عزيز ” عارف نفسه كويس ” .. جالنا في يوم من الأيام .. و أثناء ما كنا بنلعب .. بدأ يلقي تعويذات أول مرة أسمعها فحياتي في عالم الشطرنج .. حاجات زي :

• إفتتاحية روي لوبيز !!
• الدفاع الصقلي ( Sicilian defense ) !!
• نيمزوفيتش !!!!!! . … … الصديق العزيز ده قبل الكلام ده بسنة أو إتنين بالكتير .. كان لسة بيتعلم تقريباً الشطرنج .. و ماكنش قضي فيه سنين و سنين من طفولته زيي قبل كده .. .. و لكنه بمجرد ما بدأ يقول التعاويذ دي أثناء اللعب .. أصبح بيغلبني بمنتهي السهولة .. .. أنا اللي قضيت سنين و سنين بالعب مع أحمد اخويا و أغلبه .. أنا اللي كل الناس اللي في بيتي ( أبويا و أمي و أخويا و قرايبنا ) شهدت ليا إني ذكي و محترف شطرنج .. أنا اللي واثق جداً من قدراتي و حبي للشطرنج .. بقيت باتغلب بكل سهولة !!!! . … … ببساطة .. صديقي العزيز ده كان عمل حاجة بسيطة جداً .. إشتري كتاب للشطرنج .. و قرأه .. بس كده . … … هو ماخباش علينا مثلاً .. أو محاولش إنه يوهمنا إن التقدم السريع جداً فمهاراته ده كان ناتج عن ذكاءه أو إلهام رباني مثلاً … بل بالعكس .. من اللحظة الأولي اللي جاب فيها الكتاب .. و هو ماكنش بيتكلم تقريباً غير عليه .. و يحاول يشرح لنا مدي عظمته .. … و لكني .. عاندت كتير .. و فضلت بكبرياء لمدة طويلة رافض إني أقرا الكتاب ده أو غيره .. و فضلت أقول بعند إن : ” متعة الشطرنج هي فإني أفكر في الأوضاع اللي قدامي و أحاول أوصل لحلول ليها من دماغي … مش أكون حافظ إجابات من الكتاب و خلاص ” . … كنت ( غبي ) .. و دي فوجهة نظري من أكثر اللحظات اللي فاكرها لغبائي و عندي فحياتي . … … لأني فضلت علي كده تقريباً لمدة سنة .. صديقي أصبح نسبياً لا يُهزم بالنسبة ليا .. و باحمد ربنا فعلاً إنه إستحمل غبائي و عندي لمدة السنة دي .. .. لأن تحمله ده .. هو اللي دفعني إني أتغلب علي كل إنطباعاتي السابقة عن الشطرنج .. و علي عندي .. و علي غبائي .. .. و أبدأ أقرا و أتعلم عن الحاجة .. اللي كنت متوهم إني خبير فيها .. و أبدأ أتعلم عن الشطرنج .. الكلام ده كان سنة 2008 تقريباً … … … … الشطرنج لعبة قديمة جداً … و إتكتب فيها كتب كتير .. جداً .. و أكتر جزء تم دراسته فيها .. و معظم الكتب دي فيها جزء عن ال .. ( إفتتاحية ) .. يعني أول كام حركة بيتلعبوا .. و أصبحت حاجات محفوظة … تبدو للي مايعرفهاش إنها سحر أو خدع معقدة جداً … و لكنها مجرد خطط اللي سبقونا قضوا سنين و سنين فدراستها .. و قدموا نتايجها لنا علي أطباق من فضة .. … يعني مثلاً في خدعة مفضلة جداً بالنسبة ليا إسمها (هجوم تراكسلر المضاد - Traxler counter attack ) .. و دي عبارة عن تسلسل حركات للجيش الأسود .. بتلعب فيها ضد تسلسل إفتتاحية من أشهر إفتتاحيات الجيش الأبيض ( italian game ) .. اللي هو لما يطلع العسكري اللي قدام الملك الأبيض خطوتين … و بعدين يطلع الحصان اللي جنب الملك الأبيض … و بعدين الفيل الأبيض يطلع هو كمان لحد نص البورد ( C4 ) .. و هكذا .. .. التسلسل ده يبدو فيها إن الأبيض هو اللي بيغلب .. و لكن لو الأبيض ماكنش فاهمها أو عارفها .. حيتفاجئ إنه بالتدريج بياخد خازوق محترم جداً … … … خلال أول شهر بدأت فيه أتعلم الحاجات دي سنة 2008 ..
  و شفت 40 فيديو تقريباً عن أشهر الإفتتاحيات و الردود عليها .. و إتعلمت حاجات عن ال ( Common sense ) في الشطرنج و لغته .. زي ( files domination , center strategy , tempo domination … ) .. .. مستوايا كان إختلف بشكل جوهري .. أصبحت قادر إني أغلب صديقي تاني .. أو علي الأقل إني ماتغلبش منه بسهولة و يسر زي الأول .. … و إكتشفت إني ما زلت قادر علي الإستمتاع بالشطرنج .. و الإستمتاع بالتفكير فيه .. و لكني دلوقتي مش محتاج أعيد إختراع العجلة من أول و جديد كل مرة أتعرض لمشكلة فيه .. و إني دلوقتي قادر أستخدم اللي قبلي علموه ليا .. عشان أفكر في حاجات معقدة أكتر .. عمري ما كنت حاشوفها قبل كده . … … … نفس الفلسفة دي بالظبط … تقدر تشوفها في الحياة حواليك .. مش في شغلك أو دراستك بس حتي … … إحنا مش أول بشر تعيش علي الأرض .. مش أول ناس تحتاج .. مش أول ناس تتعب .. تحس .. تفكر .. تقلق … تخاف … مش أول ناس تتاجر .. مش أول ناس تنتج .. … اللي بنحس بيه .. مش جديد .. مش لوحدنا اللي بنعدي بيه .. … و اللي بنعدي بيه … غيرنا من اللي سبقونا .. عدي بالمشابه ليه جداً .. … … أيون اللي سبقونا ماكنش عندهم فيسبوك ..أو سوشيال ميديا .. أو نت .. أو تكنولوجي زي دي .. لكن المشاعر الناتجة عن الحاجات دي عندنا … هما كان عندهم مشاعر زيها .. .. يعني .. إنت شبعت لما كلت ( لوبستر ) .. و اللي سبقك شبع لما كل ( فول أو فتة مثلاً ) … إحساس الشبع واحد .. مهما كان الأكل متغير .. … إنت نفسك تشتري لامبورجيني .. اللي سبقك كان نفسه يشتري ناقة معينة مثلاً … إحساس الرغبة في الشراء واحدة .. مهما كانت السلعة متغيرة .. … إنت حاسس بالفشل و الخوف في كاريرك مثلاً .. اللي سبقك كان حاسس بالفشل و الخوف في زراعة أرضه .. أو تجارة بتخسر مثلاً .. إحساس الفشل و الخوف واحد … مهما كانت المسببات مختلفة . … … … اللي سبقوك كتبوا كتير .. شرحوا كتير .. وضحوا كتير … جداً … إزاي تتعامل مع 99% من المشاكل اللي ممكن تواجهها فحياتك .. و بالتفصيل .. بحيث إن دماغك تفضي و تروق إنها تتعامل مع ال1% الجديد .. عشان لما تنجح و تقدر تتعامل معاه صح إن شاء الله .. مسئوليتك تبقي إنك تشرح للي حييجي بعدك يعمل إيه لما يواجه المشكلة دي .. و هكذا … … لكن كتير مننا … كتير جداً جداً … أغبياء … كسالي .. بيعاندوا … و مصممين يفضلوا متجاهلين كل ما سبقهم من دروس و علم و حكمة .. و قاعدين يخسروا في مشاكل .. اللي سبقنا حلوها من زمان .. … و كل شوية يبصوا حواليهم .. و يحاولوا يلاقوا تفسيرات مختلفة عن ليه فلان بينجح و أنا لا .. ليه فلان بيكسب و أنا لا .. ليه فلان قدر يتغلب علي المشكلة دي و أنا لا ؟ … … … … … إفتكرت الكلام ده إمبارح و أنا بالعب جيم شطرنج أونلاين .. اللي قدامي عمل 3 أخطاء ورا بعض .. مشروحين تفصيلياً فكتب الإفتتاحيات .. و مشروح إزاي تتعامل معاهم .. و لما إستغليتهم و رديت عليهم حرفياً زي ما الكتاب بيقول .. لقيته باعت لي بيسألني : ” are you using a chess software ?! ” ” بتغش يعني ؟! ” … … … … أكتر نصيحة أعتقد إني ممكن أحب أقولها لنفسي لما كان عندي 10 سنين .. هي : ” بطل تحاول تخترع العجلة من جديد .. و شوف غيرك وصل فين .. و كمل بعده ” .. … و مع ذلك .. أنا فاكر كويس إن النصيحة دي معظم اللي حواليا كانوا بيكرروها ليا كتير … أوي … من أيام ما كان عندي 10 سنين و أقل كمان .. … و لكني كنت : عنيد .. غبي .. متكبر .. … إنسان . … … … و الله أعلم .