بكام الراحة النهاردة يا برنس ؟ .. وصلت مليار دولار

بكام الراحة النهاردة يا برنس ؟ .. وصلت مليار دولار ولا لسة ؟ … واحد من المسلسلات الرائعة جداً للغاية أوي خالص .. و اللى بتابعه منذ لحظة نزوله السنة اللى فاتت .. هو مسلسل ( succession ) .. المسلسل بيتكلم عن واحد من أغني أغنياء العالم ( لوجان روي) .. صاحب واحدة من أضخم المؤسسات في عالم التسلية و الميديا ( روي ستار) .. لوجان عجوز جداً فوق ال70 سنة .. و عياله الأربعة .. كل واحد منهم عينه علي عرش لوجان ده .. و يا تري مين فيهم اللى حيعتلي العرش بعده .. و يتحكم فمؤسسة تعتبر من أقوي 5 مؤسسات إقتصادية في العالم . … المسلسل عبقريته بتتجلي فأكتر من ناحية :

• فمثلاً الشخصيات و الجوانب الإقتصادية اللى بيدور حواليها المسلسل .. فيها تشابه ضخم مقصود مع شخصيات و الجوانب الإقتصادية لعائلة ( ميردوك - murdoch ) .. و دي العيلة المتحكمة و المالكة لعدد من المؤسسات الإخبارية الضخمة زي ( fox news , new york post , … ) …
• التسلسل و البناء الدرامي فيه شكسبيرية ضخمة .. حتحسسك إنه واخد شوية من هاملت .. علي شوية من الملك لير .. علي شوية من ماكبث .. و كل شخصية في المسلسل ليها عمق نفسي كبير .. و ده اللي حاتكلم عنه في النقطة اللي جاية .. …
• و لكن قبل ما أقول النقطة اللي جاية .. لازم أحيي المسلسل علي إسقاطه القوي علي الأحداث السياسية و الإقتصادية اللى بتحصل في العالم دلوقتي .. و إستخدامه بذكاء جداً للأحداث دي عشان يدير الحوار و أفكار المسلسل .. ” مش حاتعمق في الجزء ده جداً لأنه حيطول البوست و يدخلني فتفاصيل كتير تانية .. و الناس بتتوه ” .. … … أحد أكتر الحاجات اللي باحب أتفرج عالمسلسل ده بسببها .. هو فكرة (ماذا تفعل بعد المليار دولار ؟! ) .. المسلسل بيوريك إزاي شخصية زي لوجان روي بيفكر و هو يعتبر واحد من أغني 10 في العالم .. و أولاده الأربعة ( 3 ولاد و بنت ) .. شباب زي الورد .. لو أى حد فيهم عجبته عربية مثلاً من موديل معين .. ممكن يروح يشتري الشركة ذاتها .. .. هل الناس دي سعيدة ؟ هل الناس دي مرتاحة ؟ هل قدرتك علي شراء أى شيء ” و أى شخص أحياناً ” بتديك سعادة ؟ أولوياتهم إيه ؟ أحلامهم ؟ أفكارهم ؟ مخاوفهم ؟ … .. الإبن الأكبر للوجان .. إسمه “كونور” .. بسبب شخصية أبوه المتسلطة الديكتاتورية المتحكمة الغاشمة دي .. قرر إنه يسيب كل ما له علاقة بإمبراطورية أبوه .. و يروح يعيش “بفلوس أبوه برضه ” حياة بعييييدة خالص في الصحرا .. في فيلا و تكييف و راحة و أنتخة و كل حاجة .. بس عزلة كاملة عن العالم .. و إختار بنت ” hooker - فتاة ليل يعني بالأدب ” و قرر إنه يشتريها مدي الحياة .. مقابل إنها تفضل معاه و ماتحسسوش بالوحدة .. و يوهم نفسه كده إنه فعلاقة حقيقية مع إنسانة إختارته لنفسه . و عايش فأوهام سطحية جداً لدرجة إنه لما لقي نفسه زهقان .. قرر يرشح نفسه لرئاسة أمريكا . … الإبن التاني .. إسمه ” كيندال” .. من أكتر الشخصيات اللى مكتوبة بعبقرية فوجهة نظري .. أكثر الولاد ذكاء و خبرة في عالم البيزنس و الإدارة .. بس مستقيم جداً و جد جداً .. و بيدخل فصراع ضخم مع أبوه علشان يستولي علي إدارة الإمبراطورية ” العرش” .. و … ( مش حاحرق الباقي ) .. و لكنه مدمن .. لكل أنواع المخدرات .. و علاقته الأسرية بايظة .. و مطلق .. و .. (مش حاحرق الباقي ) .. و .. … الإبن التالت .. ” روميولس ” .. الإسم لو غريب بالنسبالك .. فده من الأسامي التاريخية .. ( قصة الإسم سريعاً عن أخين .. واحد إسمه ريموس .. و التاني روميولس .. بنوا إمبراطورية مع بعض .. و بعدين إتخانقوا عليها .. فريموس مات ” و مختلفين علي أسباب موته لحد النهاردة .. واخد بالك ؟ ” .. و روميولس بقي هو الإمبراطور و سمي الإمبراطورية بالإمبراطورية ال .. رومانية … أيواااااان هو ده سبب تسميتها كده .. the roman empire ) .. المهم شخصية روميولوس دي من أكتر الشخصيات اللي كأنها طالعة من كتاب علم نفس بيشرح تأثير حياة المليارديرات السيئة علي أصحابها .. فكرة إن مافيش حاجة في العالم ده بتجيبلك سعادة .. لأنك عمرك ما حسيت إنك محتاج تتعب علشان أى شيء .. لدرجة إن الجنس نفسه بالنسبة له بمعظم أنواعه الطبيعية .. بيصبح غير ممتع و و غير مثير .. و بيصيبه ده بعجز نفسي فظيع .. … … في شخصيات تانية كتير في المسلسل .. و كلهم مكتوبين بنفس المهارة و العبقرية .. و لكن الفكرة الأساسية اللى حتشوفها فكل شخصية منهم .. هي الفلوس و السعادة و الراحة .. و إن بعد ما حتشتري كل اللي نفسك فيه من سلع ( موبايلات و إلكترونيات و لعب و عربيات و شقق و فلل و أشخاص و …) .. حتكتشف إنك برضه ( زهقان , تعبان , بتدور علي شيء ما .. و مش عارف هو إيه ) .. و بتبدأ أثناء بحثك عن الشيء اللى إنت مش عارفه ده .. تدور فكل ما هو طبيعي .. من أكل و شرب و متع و … فمتلاقيهوش .. فتبدأ تدور عليه فكل ما هو غير طبيعي من ( مخدرات و شرب و جنس و …) و برضه ماتلاقيهوش .. فتبدأ توصل لمرحلة التوهان اللى المسلسل مركز عليها جداً مع معظم الشخصيات دي .. توهان يخليك تفكر .. … هممم يعني ليه أى حد من الناس الأغنيا دول مياخدش بعضه .. و يطلع علي جزيرة يبني عليها فيلا خاصة بيه مجهزة بكل التجهيزات .. و يعيش حياته أنتخة بالكامل ؟ .. .. ببساطة لأنهم عملوا كده بالفعل .. و إشتروا جزائر كتير مش جزيرة واحدة .. و لكن برضه حالة التوهان و الألم الناتج عن جوع لا يشبعه أى متعه دنيوية بيفضل يعصرهم . … … ” جيم كاري” ليه جملة مشهورة بتاعت ” أتمني إن كل الناس تبقي أغنياء و مشهورين .. عشان يكتشفوا إن السعادة و الراحة مش في الفلوس أو الشهرة ” . “جيم كاري ” عاني كتير جداً مع أمراض نفسية مختلفة هو كمان .. ما علينا منها دلوقتي .. … … مؤخراً إنتشرت حقائق كتير عن ناس بتلعب بالملايين و المليارات .. و فعلاً أنا مستغرب إن الناس مستغربة !!! يعني البشرية منذ بدء التاريخ فيها أمثلة كتير عن ناس زي ” قارون ” .. أناس وصلوا من الثروة و القوة و النفوذ إنهم يكونوا أساطير .. أحياناً كتير الناس دي بيكونوا فاسدين و أشرار و … و مع ذلك .. مابيشبعوش .. من أى شيء.. فين الجديد ؟ .. إيه اللى يخلينا نستغرب من وجود ناس زي دول فوسطنا ؟ .. النوعية دي من البشر ” معظم البشر” حيفضلوا موجودين لحد نهاية الأرض .. عدم إدراكنا و فهمنا لده .. هو العجيب .. … عدم فهمنا و إدراكنا لكل ما في التراث البشري من شرح لإزاي إن الراحة النفسية و السعادة دي حاجات تقدر تحصل عليها بدون مليم .. و إن الفلوس دي عبارة عن آداة تستخدمها بشكل مستقل لآداء مهامك في الدنيا ( عمارة الأرض , عبادة الله ) بشكل أفضل .. و إنك أبداً مش المفروض تربط السعادة و الراحة النفسية .. برصيدك فبنك .. عدم إدراكنا لده .. هو الشيء العجيب .. … … اللي بيحصل إن أحيان كتير بيتم فهم الكام سطر اللى فاتوا علي إن الإنسان المفروض يزهد في الدنيا … أو إن الفلوس مابتجيبش سعادة !!! .. لأ طبعاً .. الفلوس بتجيب سعادة .. كتير .. أوي .. .. و نادراً جداً إن أى إنسان يقدر يكون سعيد أو مرتاح بدونها .. و أنا من أكتر المؤمنين بفكرة ( basic global income ) .. و دي يمكن أتكلم عنها فبوست قادم .. و هي فكرة إن المفروض يكون في دخل شهري ثابت لكل إنسان في العالم بغض النظر هو شغال أو لا .. أو شغال إيه .. أو بيعمل إيه .. يعني إنك يكون ليك مبلغ محترم شهرياً لمجرد إنك عايش .. و ده اللي يديك إمكانية إنك تحقق احتياجاتك الأساسية في الحياة من مأكل و ملبس و مشرب و زواج .. و يديك حرية إنك تفكر تكون مبدع في الحاجة اللى بتحبها .. بدون ما تكون عبد بيدور علي إنه بس يقدر يجيب “لقمة عيش” .. … … و لكن البوست ده عن العالم اللى ناس كتير بتشوفه إنه الحلم .. عالم ما بعد الملايين و المليارات .. العالم ده فعلاً ملئ بالمعاناة و الألم .. و إدراكنا لده .. بيساعدنا فتقييم حياتنا و أولوياتنا و أفكارنا بشكل أفضل بكتيييييير .. عشان نوجه طاقة حلمنا و آمالنا و سعينا .. تجاه الوجهة اللى فعلاً فيها الراحة و السعادة .. … و الله أعلم .