تسريب من الأسئلة اللى باسئلها في أى إنترفيو باقعد فيه

تسريب من الأسئلة اللى باسئلها في أى إنترفيو باقعد فيه … … من الجمل الجميلة في كتاب ( Tim Cook: The Genius Who Took Apple to the Next Level ) اللي صقفت لما سمعتها و أنا ماشي في الشارع .. لبساطتها .. جملة قالها فحفل تخرج جامعة أوبورن .. : “In business as in sports, the vast majority of victories are determined before the beginning of the game. We rarely control the timing of opportunities, but we can control our preparation” ” في البيزنس .. زي في الرياضات عموماً .. معظم الإنتصارات بيتم تحديدها قبل بداية المباراة أساساً , إحنا نادراً لما بنقدر نتحكم في الوقت اللى بتحصل لنا فيه الفرص , بس إحنا نقدر نتحكم فمدي إستعدادنا ليها ” . … … علي مدار الكتاب … بيتم شرح جزء كبير من شخصية ( تيم كوك) .. و مدي تأثير مبدأ زي ده علي نجاحاته و طريقة إدارته لعقله .. قبل إدارته لشركة زي شركة ( أبل ) . … فمثلاً أحد الحركات الصايعة اللى حسستني إنها طالعة من فيلم (سلام يا صاحبي) .. لما كانت (أبل ) قررت تطلق ( آي ماك ) .. ف(تيم كوك ) قرر قبل فترة طويلة جداً من تاريخ الإطلاق .. اللي كان مقرر ليه إنه يكون قريب من الكريسماس .. قرر إنه يحجز خطوط الطيران الممكنة كلها من قبل حتي ما يتم حجز جهاز واحد .. .. و بالتالي .. أحد الحاجات اللى قدرت تعملها (أبل) أثناء الإعلان عن الجهاز بتاعها .. إنها أعلنت إنك لو حجزت الجهاز أونلاين أو من المحلات النهاردة .. تقدر تحصل عليه خلال أسرع وقت ممكن في الوقت ده ( تلات أيام ) .. و بالتالي .. و لأن الجهاز ده فعلاً كان إمكانياته رائعة في الوقت ده .. و إتعمل له إعلانات محترمة .. كل اللى كان عايز يجيب جهاز كهدية لنفسه أو لحد تاني في الأعياد .. كان يقدر ياخد أكشن مباشرة .. … فحققت (أبل ) بده قوة ضخمة جداً .. و حققت مبيعات خرافية في الإطلاق ده .. .. و مش بس كده .. لا … ده لأن (تيم كوك) كان حجز الرحلات و خطوط الطيران دي كلها من قبل الأجازات دي أساساً بشهور طويلة .. باقي الشركات ( ديل , مايكروسوفت , كومباك , … ) لما جات تدور علي رحلات عشان تشحن أجهزتها عليها للعملاء اللي طالبين و حاجزين .. مالقوش ولا رحلة طيران فاضية .. لأن (تيم كوك) حجزهم بالكامل .. … و أصبح فيما بعد الحركة الصايعة دي .. الشحن و النقل .. أحد أهم الحاجات اللى أى شركة ( أبل, سامسونج , ديل , …) بتفكر فيها .. قبل حتي ما تفكر فتصنيع منتج جديد . … … أى حد بيسألني سؤال قريب من الصيغة التالية : ” أنا باعرف أعمل كذا ( تصميم , فويس أوفر, موشن , …) و مش لاقي شغل .. تقدر تساعدني ؟ ” .. مباشرة باجاوبه ب :

• إعمل شغل مجاني .. كتييير .. أوي .. … لو إنت مصمم مثلاً .. إختار أى براند تعجبك .. و إعمل لها حملة كاملة ( بوسترات , إعلانات فيس , … ) . لو إنت بتاع موشن .. إختار أى براند تعجبك .. و إعمل لهم فيديو مجاناً .. لو إنت بتاع فويس .. إختار أى براند تعجبك .. و إعمل لهم فويس مجاناً .. .. مافيش أى حاجة في الحياة تمنعك إنك تبتدي تشتغل لأى براند .. رقم واحد : ده حيديك حاجة تمسكها فإيدك و إنت بتسألهم عشان تشتغل معاهم رقم إتنين : ده حيديك حاجة توريهاني تعرفني مستوي شغلك رقم تلاتة : ده حيديك خبرة بتزيد مع كل بروجكت حتعمله مجاناً رقم أربعة : ده حيديك حاجة تحطها أونلاين تعمل بيها دعاية لنفسك … … الجملة قد تكون بسيطة , .. و قد يكون في جمل كتير بتتقال ليها نفس المعني قالها ناس تانية كتير .. زي : “the harder i work, the luckier i find myself ” Samuel Goldwyn كل ما إشتغلت أكتر و فحت نفسي أكتر , كل ما بلاقي إن حظي أحسن .. … … رجاء .. كل يوم إسأل نفسك نفس التلات أسئلة .. ضمن روتينك اليومي الصباحي “أنا باسأل نفسي الأسئلة دي يومياً من 2008 , و إختلاف إجاباتي بيساعدني فتحديد خطوات كتير فحياتي ” : … 1- لو إتعرض عليك 10 آلاف دولار شهرياً حتاخدهم مهما عملت .. مدي الحياة .. و إنك خلاص مش محتاج تشتغل أو تقضي وقت تدور علي فلوس .. حتعمل إيه فوقتك و يومك ؟ … 2- لو حاستثمر معاك مليون دولار .. حترجعهم ليا و فوقيهم ربحي ( أياً كان هو إيه ) كام .. و خلال وقت قد إيه .. و إزاي ؟ … 3- لو إتعرض عليك إنك تقدر تشتغل أي شغلانة تتمناها .. فأي شركة تتمناها .. و تحقق فائدة من أول يوم في شغلك هناك .. حتشتغل إيه ؟ .. فين؟ .. و إيه الفائدة اللى حتحققها فأول يوم ؟ .. … فعلاً منتظر إجابات .