إمتي بنقول إن ال( إنسان ) .. باظ ؟ ..

إمتي بنقول إن ال( إنسان ) .. باظ ؟ .. و بيبوظ إزاي ؟

بالعب ( GTA V) بقالي كام يوم .. و في غاية الإنبهار باللعبة و كل تفاصيلها .. بس أكتر شخصية معجب بيها .. إسمه ( Trevor ) .. تقدر تقول إنه عبارة عن نسخة دسمة من شخصية الجوكر بتاع باتمان .. و التاتتو العبقري اللي حوالين رقبته ده .. خلاني أنفجر في الضحك أساساً أول ما شفته .. … المهم .. تريفور ده شخصية ماعندوش أى شيء غلط أو ممنوع .. عبارة عن المادة الخام بتاع الإنحراف و الصياعة و الفجور .. و طول اللعبة اساساً ماشي بهدوم معفنة و مقطعة .. و أي مكان بيستخدمه بيتحول لخرابة .. … و لكن لسة كنت بالعب من شوية .. و وسيلة الإتصال بين أفراد اللعبة هي الموبايلات .. فلما جاتله مكالمة من ( مايكل - أحد شخصيات اللعبة التانيين ) .. طلع موبايله من جيبه .. و رد عليه .. و دخله جيبه تاني .. … … حاجة تافهة ممكن ماقفش عندها كتير في المعتاد .. بس نتيجة كتير من تريندات الفيس الحالية … فجأة لقيتني بافكر … ليه ؟ ليه تريفور اللي بيدمر كل حاجة بتاعته و فيه و حواليه .. ليه موبايله سليم ؟! ليه ماكسرش موبايله لدرجة إن يكون ( باظ ) .. أو ( لا يصلح للإستخدام ) ؟! … … الإجابة علي الرغم من إنها في قمة البساطة .. إلا إنها في قمة الأهمية .. تريفور ماكسرش و مأسأش إستخدام موبايله … عشان يفضل قابل و صالح للإستخدام … بالنسبة ليه .. … … و نفس الشيء مع كل حاجة تانية فحياتنا .. بنكون عايزينها دايماً بمستوي معين من ” صلاحية ” الإستخدام … و لما بتنتهي ال” صلاحية” دي بالنسبة لنا … بنوديها تتصلح .. أو نرميها .. و نستبدلها . … … حرفياً .. كل حاجة في الدنيا .. بينطبق عليها الكلام ده .. كل حاجة و ليها ” صلاحية ” .. حتي البشر .. … … و لكن .. الموبايلات حالياً .. أصبحت ” متعددة ” الإستخدامات .. فيها كاميرا , راديو , كمبيوتر , … و .. و موبايل .. بيتصل . .. أحياناً لما الكامير بتبوظ .. بيفضل الموبايل موبايل صالح للإستخدام بيأدي الغرض الأساسي من وجوده .. إنه يتصل .. أحياناً لو الشاشة إتشرخت .. بيفضل يأدي الغرض من وجوده .. حتي لو بطلنا نشوف عليه فيديوهات و أفلام .. … لكن لما بيبطل ( يتصل) .. مباشرة بندور علي ( موبايل ) جديد .. قبل حتي ما نحاول نصلحه .. … … … كبشر .. كإنسان .. إحنا متعددين الإستخدامات بشكل خرافي .. بنعمل كل حاجة و أى حاجة .. و بنخترع حاجات تعملنا حاجات تانية .. .. و لما أجزاء فينا بتبوظ .. بنعالجها .. و نصلحها .. و أحياناً نبترها .. او نبدلها .. … … سؤالي هو .. إيه الجزء اللي فينا .. الوظيفة الأساسية .. الأهم .. الأولوية .. اللي لو باظ .. بنبقي غير صالحين للإستخدام .. و يبقي ( بوظنا ) .. و يا تري .. نحافظ علي الجزء ده إزاي .. و نحميه .. و يا تري .. إيه اللي بيبوظ الجزء ده ؟! .. … … … آخر البوست ده لقيتني بشكل تلقائي إفتكرت : عن النعمان بن بشير رضي الله عنهما قال: سمعت رسول الله صلى الله عليه وسلم يقول: «أَلَا وَإِنَّ فِي الْجَسَدِ مُضْغَةً إِذَا صَلَحَتْ صَلَحَ الْجَسَدُ كُلُّهُ، وَإِذَا فَسَدَتْ فَسَدَ الْجَسَدُ كُلُّهُ، أَلَا وَهِيَ الْقَلْبُ». متفق عليه