أول ما شفت الرسالة دي علي صراحة من كام يوم
- ليه في جواز و رومانسية بين فردين بس دلوقتي .. في حين إن ده ماكنش موجود تاريخياً ؟ " مونوجومي يعني " .
أول ما شفت الرسالة دي علي صراحة من كام يوم .. ضحكت بصوت عالي .. و كنت قاب قوسين أو أدني إني أرد ببوست سريع ظريف و أقول فيه إني ” بياع بطاطا ” .. أو أحياناً كمان ” بياع بليلة ” .. و ده رد باستخدمه كتير مع أصدقائي لما كل فترة كده حد منهم يسألني السؤال ده .. … و لكن .. و لأني إتعلمت من فترة طويلة أعد من 1 ل 10 قبل ما أعمل شير أو بوست لأي شيء علي الفيسبوك .. و أسأل نفسي .. هل في حد ممكن يستفيد من اللي حانزله ده .. و لو كانت الإجابة ب لا … في الغالب مابنزلش أو أشير البوست ده . … و لكن علي مدار اليومين اللي فاتوا .. إتفرجت علي سلسلة ( explained ) علي netflix .. و دي لو ماتعرفش عنها .. فهي سلسلة من الحلقات القصيرة .. كل حلقة بتشرح بشكل مختصر جداً .. و عبقري جداً .. حاجة معينة في الحياة اللي إحنا عايشينها دي .. حاجات زي :
- يعني إيه هندسة الجينات حالياً .
- ليه في جواز و رومانسية بين فردين بس دلوقتي .. في حين إن ده ماكنش موجود تاريخياً ؟ ” مونوجومي يعني ” .
- ليه bts و ال kpop جامدين فحت و مسيطرين حالياً ؟
- يعني إيه بورصة .. و علاقتها بالإقتصاد ؟!
- هل في كائنات فضائية ؟
- يعني إيه علامة التعجب ( ! ) .. أيون والله .. حلقة كاملة عن علامة التعجب ( ! ) .. و طلعت إمتي .. و إستخداماتها .. و كلام كتير عنها . … و غيرهم كتيييير . … … طبعاً أنا من أول حلقة شفتها .. إنبهرت .. و خلصت السلسلة علي مدار ال48 ساعة اللي فاتوا .. آخر حلقة لسة قافلها من ساعة … .. و دماغي إتجدد فيها شوية أفكار … منهم فكرة ليها علاقة بالسؤال بتاع حضرتك .. سؤال : أنا باشتغل إيه ؟! … … الفكرة الأولي :
- هل ممكن في خلال حياتي المحدودة .. ألم و أجمع كل العلوم دي و غيرها بالشكل اللي يرضي نهمي و جوعي للعلم ؟! . .. بمعني : أنا ربنا أنعم عليا بنعمة الفضول ..و جوع دائم للعلم .. و علي مدار حياتي .. جزء كبير جداً من اللي بيحركني بشكل يومي هو رغبتي فإني أفهم أكتر و أعرف أكتر .. يعني مابعرفش أعدي حاجات كتير حواليا كده مرور الكرام .. ( الكهربا شغالة إزاي ؟ , البوية بتتكون من إيه ؟ .. و الألوان بتتركب إزاي ؟ , الكمبيوتر ؟ , جسمي , عقلي , نيوروناتي , الذكاء يعني إيه , الإقتصاد , … ) … تخصصي في الكلية أساساً ( هندسة إتصالات و إلكترونيات ) .. حددته بناءاً علي تساؤل بسيط جداً .. و هو إيه أصعب علم ممكن أتعلمه برة الكلية .. و كانت النتيجة هي ( علم الإتصالات و الإلكترونيات ) .. فقررت إني أدرس العلم ده بشكل أكاديمي .. و أمارس هوايتي فجمع العلوم التانية فوقت فراغي .. ” طبعاً الكلية أثبتت ليا مدي خطأ تفكيري الطفولي ده .. و إن الكلية مش مكان تدرس فيه أى علم إطلاقاً .. بل مكان تتعلم فيه تمتحن إزاي ” . … المهم .. إني بعد ما إلتحمت بالإنترنت سنة 2008 .. و إكتشفت إن قدرتي علي التعلم مش متوقفة خلاص علي كم الكتب اللي ممكن أشتريها أو أستعيرها زي زمان من المكتبات .. و لكن متوقفة علي قدرتي علي إستيعاب قدرة الإنترنت الهائلة و الخرافية في ” تعليمي ” .. .. و إن بمجرد إمتلاكك للإنجليزي ( لغة العالم حالياً ) .. … التعليم بيتحول بالنسبة لك من إنك تحاول تدور علي إجابات .. و لكن إنك تتعلم تسأل صح . … لقيت نفسي واقف قدام حقيقة مؤلمة جداً .. و هي إن ( عمري محدود ) .. و إن مهما بذلت من مجهود و من وقت باتعلم … حيفضل دايماً أسئلة لسة عايز أعرف إجاباتها .. … … … الفكرة التانية هي :
- لما إكتشفت إن ال ” كارير ” .. مشابهة جداً فعقلي لكلمة ال ” كاررو = العربية اللي بيجرها حصان متلجم ” . .. يعني : بعد ما خلصت كلية .. و بدأت أواجه الفكرة القميئة بتاعت إنك محتاج يكون معاك فلوس .. بدأت أدور علي وظائف فعلاً ملائمة للشهادة اللي معايا دي ” مهندس إتصالات و إلكترونيات ” .. خلال مرحلة ما قبل الجيش . .. و كنت فعلاً برضه باحاول أقنع نفسي إن ” الوظيفة ” دي حتبقي شيء باعمله لمدة كام ساعة علي مدار اليوم … و بعدين أرجع أمارس حياتي اللي كنت باتمناها بقي بالشكل اللي كان نفسي فيه .. و أدرس اللي عايز أدرسه و أتعلم اللي عايز أتعلمه .. و هكذا . … بفضل الله و الحمد لله .. ربنا أنعم عليا إني ماتكملش محاولاتي دي مع أى شركة قدمت فيها .. و إن حتي الوظيفة اللي كنت حاتقبل فيها فعلاً خلاص ( فشركة بترول ) .. كانوا مشترطين إني إما أكون إعفاء من الجيش .. أو أدخل عسكري و ينتظروني لمدة سنة .. و بعدين أطلع عليهم مباشرة . .. و بالتالي .. لما طلعت نتيجة ال( إرجا ) بتاعتي في الجيش إني ( ظابط ) .. و إني حاكون منقطع عن المدنية لمدة 3 سنين … صرفوا النظر عني و عينوا ناس تانيين . … و سبحان الله .. بعد كام شهر من النتيجة دي .. يتم تعديل نتيجة ال (إرجا ) بتاعتي .. و أنزل عسكري . .. عشان أشوف الشكل الأصعب لحياة الموظف .. وظيفة ( عسكري ) في الجيش . .. بشكل خلاني أقسم بعد إنتهائي من الجيش .. إني مهما يحصل ليا فحياتي .. ماكونش موظف أو ( رقم ) تاني أبداً .. أو ( ترس ) فمكنة ضخمة أحس إني طول الوقت غير مالك لأي قرار من قراراتي مقارنة بقرارات الماكينة الضخمة دي . … … فبمجرد إنتهاء الجيش بالنسبة ليا … كان إنشائي لأول شركة ( ستارت أب ) ليا .. … … الفكرة التالتة هي :
- لما إتعلمت إن الإستثمار بدايته إني أستثمر … فأفكاري . … بمعني : بمجرد ما قررت إني حاكون مش موظف .. و أبدأ أدور إني أنفذ فكرة معينة طبخناها فدماغنا .. و نحاول نعمل منها بزنس .. بدأت أواجه سؤال بيواجهه أى حد حاول يعمل الحوار ده .. حناكل منين ؟! .. ك ( ستارت أب ) .. إنت قدامك شوية إختيارات أساسية عشان ( تاكل ) . 1- تروح تدور علي ( fund ) ( سلفة بقي .. فاميلي أند فريندز .. إستثمار ..) .. يعني تاخد فلوس من ناس مقتنعين إنك مش حتروح ترمي الفلوس دي عالأرض .. و إنهم ح ( يستثمروا ) فيك . .. بس ده معناه إنك تبقي ملتزم قدامهم و ليهم إنك تشرح و تبرر كل خطوة بتاخدها .. و إنك تبقي قلقان طول الوقت ب ( فلوس ) ناس تانيين . .. 2- إنك تدور تبقي ( cash flow positive ) من البداية خالص .. و ده معناه إنك تبقي لقيت طريقة سريعة عشان تعمل حاجة مفيدة للناس .. أو تبيع منتج مفيد للناس .. مقابل فلوس . و تشغل الحتة دي من البزنس بتاعك بكفاءة بحيث إنه يصرف علي كل اللي إنت نفسك تعمله بعد كده . … 3- طبعاً الإختيار التالت هو ( self fund ) يعني تبقي مكيش من قبل كده .. وارث مثلاً .. أو حتي خدت منحة لطيفة فمسابقة لطيفة عاملاها جهة لطيفة .. و يبقي معاك ( capital ) صغننة كده تبدأ بيها حياتك . … … أنا كنت رافض بكل الأشكال الإختيار الأول .. رافض أى فكرة إني أقلق بفلوس شخص ما أو ألتزم لشخص ما بإني أبرر له أنا ليه مثلاً قررت أغير النشاط و أبيع بليلة بدل بطاطا . .. و الإختيار التالت برضو ماكنش متاح .. و ماكنش في منح كتير أو مسابقات كتير بتتنظم جوة دمنهور 🤣 .. … … فبالتالي .. كان الإختيار التاني .. … نبيع إيه ؟! … عند السؤال ده .. بدأت فرحلة طويلة من إني أتعلم ال ( بيع ) .. لو دخلت علي الموقع بتاعي ( eslamosama.com ) حتلاقي 31 فيديو لسلسلة إسمها ( تعلم الفريلانس من البداية خااااالص ) .. بلخص فيهم بشكل مخل .. اللي إتعلمته لحد لحظة عمل الفيديوهات دي .. في ال ( بيع ) .. و إنك إما تبيع ( مهارة ) .. أو ( منتج ) .. و هكذا . إتفرج عليهم أسهل ما أقعد أكتب كل الكلام ده هنا تاني . … … و إتعلمت إن أغبي شيء ممكن أعمله .. هو إني أفضل أعرض ( فكرة ) معينة فدماغي .. بنفس الطريقة .. لنفس الجمهور .. بشكل يخسرني .. و إني أسأل نفسي بشكل مستمر .. إزاي ممكن أخلي إستثماري ( فأفكاري ) أفضل … فأدور علي ( منتج / فكرة ) أفضل .. أدور علي ( شراكة ) أفضل .. أدور علي وسيلة عرض أفضل .. و هكذا .. … لاحظ هنا إني باتكلم عن ( أفكار ) .. مش ( فلوس ) .. يعني أقصد إنك تفكر فوقتك و مجهودك .. بنفس الطريقة اللي بتفكر بيها في ( فلوسك ) .. و تصرفهم في اللي (يوفر ) ليك منهم أكتر .. … … … الفكرة الرابعة هي :
- جيلي هو أول جيل يحضر قوة الإنترنت الحقيقية أثناء بداية شبابه . … بمعني : أول جيل يبدأ يواجه حاجات زي :
- ممكن تتعلم أى حاجة فأى وقت .
- أياً كان وظيفتك أو شغلتك .. غالباً في شخص ما ( هندي / باكستاني / بنجلاديشي ) ممكن يعملها بشكل أفضل .. و بمقابل أقل .
- غالباً الشخص ال ( هندي باكستاني / بنجلاديشي ) ده نفسه حيتم الإستغناء عنه و الإستعانة ببرنامج كمبيوتر قريب جداً .
- أول مرة يبقي في سوق مفتوح في العالم .. منذ بداية عصر المحرك البخاري . .. يعني : زماااااااان .. كان ممكن تاخد فرشة بضاعتك أو ( مهارتك ) علي كتفك .. و تروح تفرش فأى مكان في الأرض جنب أى مدينة .. و تنادي علي بضاعتك / مهارتك .. .. جيل أجدادنا و آباءنا .. ماشافوش ده .. كان لازم بالنسبة لهم ( باسبور , رخصة , قوانين , … ) حاجات كتير تجبرهم يدوروا علي نظام أكبر و أقوي منهم يسمح لهم بإنهم ( يبيعوا ) منتجاتهم أو مهاراتهم . … دلوقتي الوضع رجع للوضع الأساسي للبشرية تاني .. عايز تبيع مهارتك / منتجك .. أياً كان هو إيه .. إعمل صفحة فيس .. و إعرض عليها اللي إنت عايزه .. .. و علي حسب قوة أدواتك .. و قوة منتجك .. و قوة مهارتك .. علي حسب قدرتك علي البقاء . … … أنا تعبت من الكتابة و ورايا مشاوير :) .. .. سلام عليكم 🤣