من تلات سنين تقريباً تم دعوتي عشان أدي محاضرة فجامعة

من تلات سنين تقريباً تم دعوتي عشان أدي محاضرة فجامعة فاروس .. كان جزء من المحاضرة عن ( الوظائف اللي حتطلع في المستقبل .. و أجهز نفسي لها إزاي ) . .. و لمدة 10 دقايق تقريباً فضلت أشرح بس الوظيفة دي .. و أهميتها . ال ( talent manager ) . … أنا مثلاً طول عمري كنت بافضل أكون إنطوائي .. و نتيجة لكثير من العوامل التربوية و الجينية .. ماكنتش دايماً واثق فنفسي بما فيه الكفاية إني أعلن عن أنا باعمل إيه .. أو أنا كويس فإيه . فكانت النتيجة هي إني لفترة طويلة جداً .. كنت عبارة عن ( CV ) كبير ماشي علي الأرض .. و لكني ماكنتش دايماً باعرف أعمل ( Marketing ) لنفسي .. أو أحط ( سعر ) للخدمات اللي أقدر أقوم بتنفيذها . … و أحد أهم المهارات اللي أعتقد إني إتعلمتها علي مدار ال (10 ) سنين اللي فاتوا .. هو إني إتعلمت أجاوب علي أسئلة زي :

• أنا باعرف أعمل إيه ؟
• باعرف أعمله مع مين و مكاني في الفريق فين ؟
• باعرف أعمله بكام ؟ .. و وقتي قيمته السعرية كام ؟
• منافسيني مين ؟ .. و فين ؟ .. و أعرفهم إزاي ؟
• أطور من نفسي فأنهي مجال ؟ .. و ليه ؟ .. و إزاي ؟
• و أهم تلات أسئلة : ( أعلن عن نفسي و شغلي فين ؟ .. و إزاي ؟ .. و ليه ؟ ) … … و ها هو ( upwork ) بيثبت كلامي (نصاً ) بعد مرور 3 سنين من توقعي لوجود الوظيفة دي .. و إنها كان لابد من وجودها مع نمو المنصة دي و إنتشارها . … … دلوقتي أصبح (الفريلانسرز ) علي ( upwork) أربع طبقات بدل ما كانوا زمان طبقتين : 1- الموهبة الناشئة = rising talent .. و دي بتاخدها بعد ما بتخلص أول مشروع تاخده . 2- المصنف من الجامدين = top rated .. و دي اللي كنت بتاخدها لو فضلت علي مستوي عالي فتقييمك من عملاءك لمدة 6 شهور تقريباً فأكتر من عقد و مشروع . . الجداد بقي : 3- المصنف من الجامدين اوي = top rated plus … و دي دلوقتي بتاخدها لو فضل مستوي تقييمك عالي من عملاءك برضو .. بس المشاريع بتاعتك تقيلة و ميزانيتها كبيرة . .. ** يعني الخدعة اللي كنت بانصح بيها زمان دلوقتي مش حتنفعك عشان تاخد المرتبة دي … و هو لما كنت بانصح إنك تعمل مشاريع كتير صغننة ( تصميم لوجو سريع ,تعديل صور بسيط , تعديل فكود موقع صغنن مثلاً ) بميزانية قليلة عشان ترفع من تقييمك .. دلوقتي عشان تاخد التقييم الجامد أوي ده .. لازم تبقي ميزانية مشاريعك محترمة ( بس ماحددوش كام ) . … 4- المرتبة الأعلي : اللي تم إختيارهم عالفرازة = expert vetted . و بناءاً علي اللي تم الإعلان عنه .. هو إنه ( invite only ) .. يعني حيتوجه ليك دعوة إنك تمتحن فشوية حاجات معينة خاصة بمجالك .. و شوية مهارات تانية ( soft skills ) .. و لو عديت من الإمتحانات دي .. تاخد بادج ( expert vetted ) .. و شوية مزايا تانية .. … … أهم المزايا دي بقي .. هو إنك حيبقي لك ( talent manager ) مخصوص … يعني السمسار الخاص بسيادتك .. مدير أعمالك يعني .. ده حيبقي إنسان ( غالباً هندي أو باكستاني😅 ) . و ظيفته هو إنه يعرف :
• إنت كويس فإيه ..
• مش كويس فإيه ..
• محتاج إيه ..
• ممكن تتطور إزاي .. و يعيش هو مع نفسه بناءاً علي الداتا دي عشان يجيبلك عملاء و شغل ملاءم ليك .. … … … … البوست الطويل العريض ده بقي … عن الوظيفة دي بالذات .. وظيفة ال (talent manager ) .. لأني مؤمن جداً بإن ربنا خلقنا كلنا مختلفين .. و كل واحد فينا عنده حب لشيء معين .. و أفضل فمهارة معينة .. فمؤمن جداً إن في ناس ممكن تكون بتحب مجال التصميم .. بس مش مصمم موهوب مثلاً .. أو حد بيحب مجال البرمجة مثلاً .. بس مش coder .. أو مش كويس في الرياضيات .. .. فدعوتي لكل الناس اللي ممكن يكونوا شايفين نفسهم حابين مجال معين .. بس مش قادرين يكونوا مميزين فيه بما يكفي إنهم يشيلوا مشاريع لوحدهم مثلاً .. فكروا فموضوع إنكوا تكونوا ( talent managers ) … الإنترنت كل يوم بيتحول لإنه يصبح الإختيار الأول في البحث عن أى شيء ( سلعة … أو مهارة ) .. و معني كده هو إن التميز اللي كان مبني علي محدودية المكان = يعني إنك كنت أفضل نجار فحتتك أو فشارعك .. ده مش حيفضل مفيد ليك مدة طويلة .. لأن شارع و حتتك دلوقتي أصبح عندهم القدرة علي إنهم يشوفوا نجارين من العالم كله .. مش بس فشارعك أو حتتك .. .. و ده معناه إن في السوق المفتوح .. المنافسة بسلعة أضعف أو أقل كفاءة .. بدون وعي أو خطة واضحة إزاي تطور من سلعتك .. .. في النهاية .. حيإذيك . … … فنصيحتي مرة تانية هي : لو إنت نجار بس مش مميز أو مش موهوب .. و إنت عارف ده .. حاول تكون إنت حلقة الوصل بين النجار المحترف الموهوب في حرفته … و بين الزبون و العميل .. و خد نسبتك و عمولتك . .. ده أفضل ليك و لزميلك الموهوب .. و للزبون .. . آلاف المرات .. من إنك تنافس زميلك في الحصول علي الزبون لنفسك .. و تقدم له خدمة أقل كفاءة أو سلعة أقل جودة . … … … من الصعب جداً إن شخص غير ملم بتفاصيل مهارة أو مجال معين .. يشتغل سمسار فيه .. و حالياً .. و في المستقبل كمان فوجهة نظري .. سمسار الشغلانات = talent manager … المتخصص فمجال معين .. حيبقي أهم من ( الموهوبين أو المميزين ) في المجال ده . .. لأنك كسمسار .. حتكون عارف أكتر من (صنايعي = حرفي = فريلانسر ) .. و بالخبرة .. حتكون كمان عارف كل عميل .. محتاج فريلانسر من أنهي نوع .. … … … ** غالباً في الأيام المقبلة ناوي أكتب بوست طويل ( أو سلسلة بوستات ) إن شاء الله عن : إزاي بقي تبقي ( سمسار شغلانات = talent manager ) .. حالياً .. و تفتح وكالة صغننة … .. و الله أعلم .