بافكر أعمل حاجة تضم عدد من الناس اللي تحب تبتدي
حد حابب يدخل في حاجة زي كدة ؟
بافكر أعمل حاجة تضم عدد من الناس اللي تحب تبتدي تعمل كونتنت و تقدم فيديوهات و كدة .. حنقدم لهم الإنتاج و التدريب و التنظيم.. حد حابب يدخل في حاجة زي كدة ؟ كمقدم كونتنت و محتوي يعني
تعديل : طااااااايب … طالما الفكرة عاجبة الناس ..
تم إنشاء الصفحة .. و حيتم إنشاء الموقع .. الفكرة كالتالى بالظبط فدماغى ( و رتبت دلوقتى مع اللى صاحيين من التيم عندي و هما متحمسين ) : 1- حيبقى بلاتفورم يجمع أكتر من مقدم محتوى … 2- كل فترة حنفتح باب التقديم لمقدمين جدد .. 3- اللى حيتم إختيارهم ( جاري تحديد العدد ) .. حيتم إعتمادهم كمقدمين محتوى فى البلاتفورم ده .. 4- حنشتغل معاهم و نتعاون فى كيفية الشكل اللى حابين يطلعوا بيه ( و لو فى إمكانية لتقديم تدريب أو دعم تقنى أو فنى مش حنتأخر ) إن شاء الله . 5- لو الموضوع ربنا بارك له إبتدى يكون فى شغل فعلاً .. حافتح الباب لعدد من ال(إيديتورز) و نشغل الناس الكتير اللى بعتت ليا بناء على البوست اللى كنت طلبت فيه (إنترن إيديتور) . 6- الإستفادة اللى شايفها للي حيدخل فى حاجة زى كده كالتالى : أ - لو هو نفسه من فترة يبتدى يقدم محتوى بس كان متردد .. ده ممكن يشجعه إنه داخل مع مجموعة من البداية .. مش حيقف قدام الناس فجأة لوحده . ب - اللى كان حابب يبتدى و كان ناقصه أى معلومات أو دعم .. إن شاء الله نساعده . ج - اللى حابب يجرب نفسه كإنفلونسر مثلاً .. بس لسة متردد .. يقدر يجرب .
مادياً كالتالى : مش حادفع مرتبات لحد ( فى الأول على الأقل) ولا حاخد فلوس من حد .. بس حاشغلها أفيلييتس و سبونسورز بالكامل .. (لو مش فاهم يعنى إيه ده .. رجاء سيرش) … و حيكون كل شىء بالنسب بيننا و بين مقدم المحتوى .
ملاحظتين مهمين :
1- quick and dirty أنا مش حابتديها زى ال عربي +AJ من أول شهر أكيد .. فمش عايز اللى يشوف الكلام ده و يقرر يقدم .. يبدأ يستثمر فكاميرات أو معدات صوت أو أياً كان .. أنا عايز الشغل كله (سريع جداً ) .. بالظبط زى فيديوهات اللايف اللى باعملها .. يعنى الكاميرا بتاعت موبايلك أكثر من كفاية .. و بعد كده لو الموضوع إحتاج أى بروداكشن نضيف .. أنا و التيم بتاعى كفيلين إن شاء الله .. .. 2- إنت اللى تحدد نوع المحتوى . يعنى أنا مش محدد تعليمى أو كوميدى أو أياً كان .. اللى إنت شايف نفسك فيه و حابه .. هو ده اللى أنا عايزه .
التقديم إزاى ؟ :
إبعت لي فيديو واحد على الأقل ليك من النوعية اللى إنت حابب تقدمها .. من نوعية … لو إبتدينا إن شاء الله … تقدر تقدم منها مرتين فى الأسبوع .. على الماسنجر هنا (خلال أسبوع ينتهى يوم الثلاثاء 25 يونيو إن شاء الله ) .. …
- مش حابب تطلع بوشك قدام الكاميرا .. مش مشكلة .. يكفينى لو مصور ورقة و قلم و بتشرح أو بتبين المحتوى بتاعك عليها .
- مش حابب تطلع بصوتك ولا بوشك .. ما علينا .. إبعتلى رجاء عرض كامل إذن لتصورك عن نوع المحتوى اللى تقدر تقدمه .. و لو يستحق .. ممكن نعمل لك فويس أوفر و بروداكشن بنفسنا .
حنشوف كل اللى حيوصل إن شاء الله .. و حيتم الإختيار و التواصل مع اللى تم إختيارهم و ترتيب التفاصيل .. لو بعت بعد 25 يونيو .. ممكن يتم إعتبارك .. و لكن فى الدفعة التالية إن شاء الله .
اللى حابب يشترك فى الموضوع .. بس مش كمقدم كونتنت .. حنحتاج متدربين فى التالى : 1- editors 2- content writers, researchers 3- voice over 4- graphic designers 5- لو شايف إنك تقدر تفيد بشكل أنا مش موضحه .. برضه إبعتلى . على : job.applications@hand-is.com و الsubject يكون : “Bo22ain”
تعديل :2 تم اختيار الأول.. Ahmed r.farrag
تعديل : 3 تم إختيار الثانى .. Hagar Ibrahim