البامبو ... من تحت "ولامؤاخذة " : (السبب التانى للكمانجا

البامبو … من تحت “ولامؤاخذة ” : (السبب التانى للكمانجا )

فى ناس كده بتلاقيهم دايماً قاعدين فآخر الفصل .. ساكتين معظم الوقت .. و لما بييجى جرس الفسحة .. كنت بتلاقيهم بهدوء طلعوا الساندويتش .. و مسكوه بالكيس .. و كلوه .. و غالباً كانوا بيعملوا ده فى المكتبة … الناس دى إنطوائيين . بغض النظر عن أسباب إنطوائيتهم إلا إن جزء كبير منهم بعد كده فجأة الناس بتكتشفه ناجح فمجال ما .. أو بيطلع من الأوائل مثلاً .. و بعدين ناس كتير بتبتدى تسأل .. إزاى عملوا كده .. و يحاولوا يشوفوا مثلاً بيذاكروا إزاى أو بيشتغلوا إزاى أو بيشتغلوا فإيه … و هكذا .. بحيث إن من أفضل و أسهل وسائل النجاح .. إنك تمشى فطريق غيرك نجح فيه .. أو بيه . أنا كنت من الناس دى .. لفترة طويلة أوى .. و أعتقد مازلت نسبياً فى الأعماق نفس الطفل الصغير اللى قاعد فآخر الفصل . لكن من بضع سنين .. و لما قررت إن شغلى يبقى أكثر من مجرد شغل على الكمبيوتر و إنه يبقى ليه علاقة بالناس .. و جزء من ده كان التدريس و التدريب . لقيت ناس كتيييير بتسأل أسئلة زى :

• إيه أفضل طريقة عشان أتعلم ( لغة , برمجة , تصميم , رياضة , … ) ؟
• إيه أفضل شغلانة ممكن أشتغلها عالنت ؟

و لما كنت باجاوب بالطرق اللى جربتها شخصياً .. منهم اللى كان بيتنهد و يكأنه تعدى الستين سنة .. و يقول يااااه .. هو مين فيه عمر إنه يعمل كده … ” غالباً بيبقى تحت ال 25 سنة ” . و منهم اللى كان بيبصلى بخبث و يقول ” أيون أيون .. أنا عارف الكلام ده .. سيبك منه .. أنا عايز الشورتكات اللى إنت ظبطت منه ”

… باولو كويلو فمعظم كتبه إستخدم تشبيه نبات البامبو … إنه نبات بيفضل فترة طويلة جداً فأوائل زرعه مجرد شتلة صغننة لا يبدو أنها ستؤول لأى شىء .. و فجأة بعد الفترة الطويلة دى .. بينطر لفووووق .. و ففترة صغيرة جداً بيوصل طوله لأكثر من 10 أمتار و أكثر أحياناً . و إن خلال الفترة الطويلة اللى فضل فيها النبات بيتغذى بدون ما يبدو عليه أى نمو فوق الأرض .. كان بيمد جذور كتييير تحت الأرض تشيل النمو الضخم اللى حيحصل بعد كده . …

الإنطوائية مش حاجة حلوة .. لكنها بتدى ميزة لصاحبها و هى وقت طويل بعيد عن الضوء .. بعيد عن عنين الناس .. بعيد عن تقييم الناس .. وقت بيقضيه فحاجات كتير .. و لو ركزه نسبياً .. و إعتماداً على مبدأ القيمة المضافة (إقرا عنه رجاء) … بيوصل إنه بيتعلم حاجات كتيييييير و يوصل فيها لمستويات ممتازة .. بدون ما حد ياخد باله من الفترة الضخمة اللى قضاها بيفشل فى الحاجات دى .

كام مرة نطق إنجليزى غلط لحد ما نطق صح كام ساعة قضاها بيدور على قواميس تساعده يقرا كتيب صغنن كام ساعة قضاها بيدور على حل مشكلة تكنولوجية واجهته كام ساعة قضاها بيلاعب الكمبيوتر شطرنج و يتغلب من أقل مستويات كام ساعة قضاها بيدور على طريقة عمل برنامج معين كام ساعة فشل و كام ساعة محاولة . … ( ابراهام والد- ده عالم رياضة .. إقرا عنه - ) ليه مبدأ مشهور جداً : و مفاده هنا إنك لما بتقرا عن قصص الناجحين فأى مجال .. فإنت بتخدع نفسك بشدة لأن الناجحين بالطبيعة الإحصائية نسبة قليلة جداً من كل اللى حاولوا .. و تجاربهم بالتالى مش حاتفيدك فإنك تعرف المفروض تحصن نفسك فإيه أو إزاى ماتفشلش فتجربتك إنت .. فبالتالى .. الأصح دايماً هو إنك تدور على تجارب الفاشلين .. و تقرا عنهم بنهم .

و لكن .. أى فاشل يستمر فى المحاولة عدد كافى من المرات .. حينجح .. أو على الأقل .. حيبقى أفضل بكتير و أعلم بكتير من اللى محاولش .. إقرا عن دول كمان . …

خلال السنتين اللى فاتوا .. درست و دربت عدد لا بأس به فى مجالات (التصميم , أدوبى , البرمجة ) .. و أكثر شىء كان نفسى إن غالبيتهم يصدقوه .. هو إنى إمكانياتى عقليا إطلاقاً مش أعلى من أى حد فيهم .. أنا بس .. فشلت كتير جداً فى كل مجال من المجالات دى .. و فضلت أدور و أقضى ساعات تحت الأرض .. لحد ما إتبنى جذر ينمو فوقه النتيجة اللى هما شايفنها ..

فى منهم صدق .. و منهم ماصدقش .

… خلال سنين عمرى .. حاولت أتعلم مجالات كتيير فعلاً .. و يمكن ده بيبان لناس من اللى حواليا .. لكن دايماً كان مجال الموسيقى هو أبعد مجال عن إهتمامى .. و كان علاقتى بيه هى مجرد مستمع لا أكثر .

و أول مرة فحياتى أمسك فيولين كان من شهر .. و أعتقد فشلى واضح بشدة لكل اللى شاف الفيديوهين التلاتة ليا و أنا باتعلم .. الفيديوهات دى .. و التجربة دى لتعلم الفيولين .. أحد أهم أهدافها هو تدوين الفشل ده .. تدوين قد إيه أنا باحاول و بافشل و باحاول و بافشل و باحاول و بافشل … لحد الله أعلم إمتى حابقى عامل إزاى ..

عشان بعد فترة ربنا اللى يعلمها .. لما إن شاء الله أقدر أعزف على الكمانجا بشكل أفضل بكتير من اللى عمره ما مسكها .. و حد ييجى يسألنى .. أنا عايز أتعلم كمانجا بس عايز “الشورطكاط ” … أشير له البوست ده و الفيديوهات بتاعت المرحلة دى .. و أقول له إقرا عن البامبو .. من تحت ولا مؤاخذة .