طالما كده كده فيها " هابى بيرث داى تو يو

طالما كده كده فيها ” هابى بيرث داى تو يو ” و كلام من ده .. فخلينا نجرب تغيير بسيط :

عيد ميلادى بكرة (1- ديسمبر) .. عارف .. لسة مفكرينى بيه النهاردة فى البيت .. و فضلت دلوقتى قدام الكيبورد بافكر لمدة ربع ساعة فكل البوستات و الكلام العميق اللى ممكن يتقال فعدم الإهتمام بحاجة زى كده .. أو الإهتمام بيه من منطلق يا جدع ما تسيب اللى عايز يفرح و يحتفل (بعيد ميلاده هو يعنى) .. يفرح و يحتفل .. … لكن حسيت إنى حابقى بأفور بشدة .. و إن الناس مش مجبرة تتعدى من طريقة التفكير بتاعتى دى .. .. و بعدين فكرت و قلت .. طب ليه لا ؟!! ما خلينا نجرب تعالوا أعديكوا شوية .. … لأى حد بيقرا البوست ده حالياً .. و كان ناوى .. أو كان حيستسلم للضغط المجتمعى اللى بيعضده الفيسبوك .. و يبعتلى ال happy birth day to u المعتاد .. رجاء .. أنا عايز هديتى من فضلك .. “حقى بقا ” .. و هديتى كالتالى : .. مهما كنت فين .. فمواصلات أو فى الشغل أو فى البيت أو … خد دقيقة واحدة بس … 60 ثانية .. رجع ضهرك لورا .. و خد نفس عميق … و غمض عينيك (بعد ما تكمل قراية طبعاً ) .. و فكر .. .. ** فكر فى : إنت مكانك فين فى العالم ده ؟ .. ** فكر فى : هل اللى إنت بتعمله حيوصلك للى بتحلم بيه ولا لا ؟ .. ** فكر فى : هل اللى إنت بتحلم بيه .. يستحق إنك تحلم بيه أساساً ؟! .. ** فكر فى : هل النهاردة بتاعك مختلف عن إمبارح .. و بكرة حيفرق عنه إيه ؟ .. ** فكر فى : مين اللى بيفرق معاك من البشر .. و بيفرق معاك ليه ؟ .. عشان من دمك ؟ .. عايش جنبك ؟ .. بيتكلم لغتك ؟ .. بيشجع فريق إنت بتشجعه ؟ .. لونه لونك ؟ .. مصلحتك معاه ؟ … ** فكر فى : لو حيدخلك فحسابك فى البنك عشرتلاف دولار شهرى من غير ما تعمل حاجة خالص … حتعمل إيه بوقتك ؟ .. ** فكر فى : لو لا قدر الله فقدت دراع .. رجل .. عين .. لسان … حتعمل إيه ؟ ** فكر … … و بعدين فتح عينيك .. و فكر بقى مرة تانية .. إنت عايز فعلاً تكتب الكلمتين بتوع (كل سنة و إنت طيب دول ) .. هنا ولا لا ؟ .. … مش لازم تقول فكرت ووصلت لإيه .. بس الأهم تسأل نفسك .. إنت مش عايز تفكر … ولا خايف تفكر ؟!! … والله أعلم .