للي ناوي علي هندسة

للي ناوي علي هندسة . … الكروكس اللي عليه واقي معدني .. فسنة كام هندسة ؟!

الفيديو اللي صورة البوست ده منه .. اللينك بتاعه فأول كومنت . لقناة يوتيوب من القنوات الرائعة اللي متابعها بقالي فترة .. إسمها ( Stuff Made Here ) . القناة عاملها مهندس رائع إسمه ( شين ) .. … في الفيديو الظريف بتاع الكروكس ده .. بيبدأ بإحتياج برئ جداً .. أنا باحب ألبس شبشب كروكس في الورشة بتاعتي .. بس لو وقع علي رجلي حاجة تقيلة حاعيط .. فمحتاج أعمل واقي معدني للشبشب . … و بيبدأ علي مدار الفيديو بيوريك إزاي جرب أكتر من 7 مرات مختلفين إنه يتني أسطح معدنية مختلفة .. بطرق تني و تشكيل مختلفة .. .. و كل مرة .. بيشوف النتيجة كانت عاملة إزاي .. و يحسن و يطور من الطريقة اللي إستخدمها .. لحد ما بيوصل للنتيجة النهائية . … … فاكر من سنتين تقريباً .. ولد برئ جداً فثانوي عام كان بيسألني عن وجهة نظري فإختياراته … و لما سألته إنت نفسك تدخل هندسة ليه .. رد عليا : ” عشان عايز أعمل مصنع هاردوير ” .. و لما سألته بإبتسامة مشفقة .. ” إنت فوجهة نظرك حاجة زي كده تتكلف كام ؟ ” .. رد عليا ببراءة .. ” أكيد مش مليون جنيه يعني ☺️ ” . … … أنا خريج هندسة جامعة إسكندرية .. قسم إتصالات و إلكترونيات . من طفولتي .. و أنا عاشق لتكسير و فك أى حاجة أمسكها .. و اللعب فيها .. و تركيب أجزاءها فبعضها .. و لحد مرحلة ثانوي عام .. ممارسة الهواية دي علي لعب الأطفال و الأجهزة البسيطة كان كافي .. و كان أغلي مغامرة ممكن أقدم عليها في الموضوع ده سنة 2004 مثلاً .. إني أجيب عربية بالريموت كنترول .. و أفكها .. و أركب مواتيرها و دوايرها الإلكترونية فحاجات تانية .. و أتحكم فيها بالريموت كنترول .. ( الكلام ده سنة 2004 .. الحاجات دي كانت لسة جديدة جداً أيامها و غالية ) . … … و لما دخلت هندسة .. و شفت إعدادي هندسة .. و درست إنتاج و ميكانيكا .. شفت مدي ضآلة إمكانياتي .. مقابل كل اللي عينيا شافته من أحلام .. .. لاحظ إني كنت من أسرة متوسطة و ميسورة الحال بفضل الله .. و لكن ده فمصر معناه إن مهما ورشتك كبرت .. حتفضل محددة إنها جوة ( أوضتك ) .. و إن مهما عدتك كبرت .. مستحيل مثلاً كنت تجيب ماكينة لحام مثلاً .. … … و لما دخلت قسم إتصالات و إلكترونيات .. و بدأت أدرس دوائر و برمجة و لوجيك .. و كل الحاجات الحلوة اللي ليها علاقة بالإلكترونيات دي .. إكتشفت مدي محدودية و ضآلة إمكانياتي أكتر … إكتشفت إني مثلاً عشان أجيب شوية مقاومات علي شوية مكثفات علي ملفات .. و كام بوردة لحام .. و ترانزيستورات … و محولات .. ألاقي نفسي محتاج ميزانية محترمة توصل ل 500 جنيه بسهولة .. .. و إن فكرة التجربة و الفشل .. فكرة مكلفة جداً جداً .. جداً .. .. خصوصاً إني كنت من دمنهور .. و أقرب محلات إلكترونيات كانت في إسكندرية .. علي بعد 70 كيلو … و ساعة نص سفر .. علي الأقل . … يعني لو شغال علي مشروع معين فدماغي مثلاً .. و حرقت مكثف .. أو ضرب مني ترانزيستور … حابقي محتاج مواصلات و سفر و وقت .. عشان أروح أجيب غيره .. و ارجع . … … لاحظ كمان إن حاجات زي ( الأردوينو , الرازبيري باي , … = كمبيوترات صغننة تقدر تبرمج وظايفها بسهولة ) .. أصبحت متاحة عالمياً أساساً علي آخر سنة تالتة و رابعة .. و ماكنتش موجودة قبل كده .. و لما بس فكرنا نستوردها .. أمن الدولة .. و الأمن الوطني .. و كل من كان ليه علاقة بالأمن حسسنا إننا كنا حنبني مفاعل نووي .. و نخصبه تسليح كمان . … و الوضع ده ما زال قائم جزئياً لحد دلوقتي بالمناسبة .. حاجات كتير أساسية عشان دراسة الإلكترونيات و الإتصالات … إنت ماتقدرش تحلم بيها فمصر أساساً .. عشان الجوانب الأمنية . … … كل ده .. بجانب الدراسة المرهقة جداً جداً أساساً … و العدييييييد و العديييييييد من الساعات و الأيام اللي بتبذلها فدراسة حاجات نظرية كتير مالهاش لازمة .. و رياضة كتييييييير .. حتي لو ممتعة .. و لكن كثافتها و كميتها الضخمة و الطريقة اللي بيتم إمتحانك بيها فيها … بتخليك مش طايق تشوف مسئلة تفاضل أو معادلات تفاضلية زيادة . … … … كل ده .. خلاني أدرك من بداية سنة أولي كهربا .. إن هوايتي اللي فضلت أحلم بهندسة سنين و سنين عشان أمارسها جوة الكلية .. للأسف مش حينفع أفضل متمسك بيها … و إني لازم ألاقي حاجة تانية .. أقدر أمارسها .. بدون التكلفة الغير ممكنة دي من ( وقت و مجهود و فلوس ) .. … … فبالتالي كان القرار .. و بداية من تانية و تالتة كلية .. عملت ال ( شيفت = تغيير ) للحلم .. و بدأت أركز في البرمجة .. و كل شيء ممكن أعمله علي كمبيوتر و أنا قاعد فأوضتي .. و اغلط كتير .. و أفشل كتير .. و أعيد من الأول .. بالظبط زي الراجل اللي في الفيديو ده .. بدون ما أحس بالندم علي ( فلوس ماكنتش معايا في الوقت ده .. أو إمكانيات ماكنتش أقدر أحصل عليها في الوقت ده ) .. … … فقط بإستخدام ( IDE = محرر برمجة يعني ) ظريف صغنن .. و شوية ماتلاب .. أقدر أبني و أكسر أفكار كتييييير جداً .. و أمارس هوايتي من الطفولة .. … … و عند مرحلة معينة .. لما إحتجت إني فعلاً أحول ده لبيزنس .. ماحتجتش إني أدور علي مساحة عشان أحولها مصنع أو ورشة .. و كل اللي كنت محتاجه هو : إني أحدد سعر للفكرة اللي بنيتها .. و ألاقي زبون ليها .. و هكذا . … … … الكلام اللي في البوست ده موجه لكل اللي مجموعه جاب هندسة .. و هوايته كانت تكسير اللعب و تركيبها فبعضها برضه .. أنا مش باحبطك .. و لكن زمنك دلوقتي أحسن بكتير من زمني زمان .. و تقدر دلوقتي تعرف الكلام اللي إنت بتقراه في البوست ده بسهولة .. بدل ما تعيشه بنفسك .. أسهل من إني زمان ( سنة 2005 -2006 ) .. ماكنش في غير ( ياهو ماسنجر 😅 ) .. … … … حالياً .. و بعد سنين و سنين .. أقدر إني أستغل هواياتي الجديدة اللي إتعلمتها لأنها كانت متاحة .. عشان أحسن من هواياتي القديمة اللي كانت غير متاحة .. و أكسر و أركب حاجات تانية كتييييير فبعضها .. ماكنتش عمري حاعرف عنها .. لو ماكنتش خدت قرار ( قبول الواقع ) ده من زمان .. … … و الله أعلم .