بص يا حاج و بصي يا حاجة .. يا اللي

بص يا حاج و بصي يا حاجة .. يا اللي نتيجتكم النهاردة في الثانوية من ( 50% ل 96% ) ..

البوست ده أنا بقالي كام سنة دلوقتي .. كل سنة فنفس الميعاد و مع ظهور النتيجة أكتب نفس الأفكار اللي فيه .. ألف ألف … و كمان ألف مليون مبروك .. و لو أعرف أزغرت و أعمل لكل واحد فيكم هيصة و هولليلة … أعملكم .. إحتفال زي اللي إنت سامعه دلوقتي أو إتعمل لواحد جاب النتيجة اللي كان بيحلم بيها .. … 1- يا إبن و يا بنت الحلال .. و الله العظيم ربنا ماخلقناش في الدنيا بنسابق بعض في الدنيا .. خاااااااالص .. يا إبن و يا بنت الحلال .. نظام السبق و الدرجات و إنك تشوف صاحبك جاب كام و إنت جبت كام و تزعل علي الدرجة .. ده نظام تربية و تسمين مواشي يا حبيبي .. مش بشر .. يا إبن و يا بنت الحلال .. النظام ده إثبت فشله بجدارة من سنين طويلة جداً .. بس ماتمش تغييره لأن مافيش بديل ليه .. … 2- عارف إنك دلوقتي كبرت و شايف النت و اللي عليه و بقيت فاهم الكلام ده … بس أبوك و أمك و عمتك و خالتك مش فاهمين الكلام ده .. و زعلانين لك .. او عليك .. إقرا بقي الجملة اللي جاية دي عشان مهمة جداً : بر الوالدين … مش طاعة الوالدين .. مرة كمان بس بين قوسين : ( بر الوالدين … مش هو طاعة الوالدين ) .. و زعلهم هما و باقي كبار السن اللي في عيلتك علي شوية حبر مكتوبين علي ورق … لازم تتعلم إنك ( تفكك ) منه كويس جداً .. و تبلع اللي حيقولوه ليك .. و تتبسم في وشهم ( بحنية مش إستفذاذ ) .. و تطمنهم إنك حتبقي كويس إن شاء الله . .. خليني أشرح : أبوك و أمك مع إحترامي ليهم .. بشر .. و غالباً العالم بتاعهم كان لسة معتمد علي فكرة إن اللي بيدخل طب أو هندسة بيبقي وصل إنه حدد مصيره و مستقبله .. .. يا سيدي الفاضل .. الكلام ده .. بلح .. بتنجان .. رجاء إطلع بكرة علي كلية طب .. و كلية هندسة .. و أقعد مع طلبة سنة تالتة و رابعة هندسة اللي غالباً حتلاقيهم قاعدين في الكلية بدون سبب .. بس هما إتعودوا خلاص . و طلبة سنة سادسة طب و إمتياز .. و إسألهم .. حياتهم و مستقبلهم و مصيرهم .. عامل إزاي .. … يا سيدي الفاضل .. أقسم بالله العظيم إن نسبة كبيرة من خريجي هندسة بيطلعوا مش عارفين هما المفروض يذاكروا إيه .. عشان يشتغلوا إيه .. … فإنت معلش .. إستحمل و تقبل الدوشة و الزعل اللي حيحصل شوية من أهلك لو هما مش فاهمين الكلام ده .. و ماتحاولش تجادلهم و تقنعهم لو المجادلة و النقاش حيبقي صعب … سيبهم يهدوا و يتقبلوا الأمر الواقع .. و بعدين إبقي ناقشهم براحتك . … … 3- لو إنت بقي أبوك و أمك من الطبقة المتوسطة .. الطبقة اللي ممكن تتحمل مصاريف كلية خاصة .. بس ده معناه إنكوا تنسوا أى رفاهيات .. أو إنكوا تصرفوا مدخراتكم و تحويشة العمر .. أرجوك فكر كويس جداً في الكلام اللي جاي ده .. .. غير إني أعرف شخصياً كتير من دواخل الجامعات الخاصة .. و إنها سبوبة محترمة جداً للقائمين عليها .. و لكنها لا تعبأ بالطالب إطلااااااقاً .. صدقني .. لو الفكرة من الجامعة الخاصة إنك تحصل علي برستيج اللقب ( دكتور أو مهندس ) .. أحب أبلغك بالخبر المؤسف و هو إن البرستيج حالياً مالوش أى علاقة باللقب .. و إن البرستيج حالياً للأسف أغلب الوقت معتمد علي إنت معاك فلوس قد إيه .. مش شهاداتك إيه .. .. فشيء غير منطقي إطلاقاً إنك تدفع تحويشة عمر أهلك .. عشان تحصل علي مجرد لقب .. … … بالنسبة للدراسة .. لو إنت كان حلم حياتك هو ( هندسة , طب , صيدلة , أسنان , .. ) حاجة من الحاجات اللي ممكن تلاقيها في الجامعات الخاصة الغالية دي .. و عايز تدخلها عشان تحقق حلمك ده .. رجااااااااااااء .. إتأكد إن حلمك موجود في الجامعات دي .. .. أنا ماقدرش أتكلم عن طب و صيدلة و أسنان .. لكن أقدر أتكلم عن هندسة .. رجاء .. كمان مرة رجاااااء .. أوصل لأقرب كلية هندسة لبيتكم .. و قضي هناك كام يوم .. فكل قسم .. و إسأل ناس كتير جوة كل قسم .. و إتأكد إن فعلاً العالم ده .. هو اللي إنت عايز تصرف فيه تحويشة عمر أهلك .. لأن غالباً .. و الله أعلم .. إنت بتحلم بشيء .. و الحقيقة مختلفة بالكااااامل . … … 4- عايز تحدد حياتك ؟ .. مصيرك ؟ .. مستقبلك ؟ ركز كويس في النقط اللي جاية دي : 1- إنجليزي .. دي الخطوة الأولي و الإجبارية و الأساسية .. إلا لو كنت ناوي علي منحة فدولة معينة لغتها الأساسية مش إنجليزي .. يبقي ركز علي لغة الدولة دي . 2- منح فدول مختلفة .. ( عالم ضخم .. كل اللي بذل فيه مجهود .. لقي ناتج لمجهوده ده ) . 3- الإنترنت .. ثم الإنترنت .. ثم الإنترنت . لو كل حلمك من الكلية .. هو تأمين وظيفة عشان تجيب فلوس .. و ماعندكش أى تفضيلات للوظيفة دي تكون إيه .. يبقي أنصحك تبتدي تذاكر ( كورسات جوجل اللي منزلاها جديد ) .. و تذاكر ( كورسات الإيكوميرس و الفريلانس ) اللي موجودين فكل مكان أونلاين . خلال سنة واحدة لو بذلت مجهود في ده قد اللي بذلته فثانوي عام … ممكن جداً يكون مرتبك كافي إنك تطلب تخطب و تتجوز كمان . … … 5- الكارير .. و الماجستير .. و الدكتوراة .. لو إنت بتحب الحياة الأكاديمية .. و عايز تعيش في الماجستير و الدكتوراة و ما شابه .. صدقني .. إنك تدخل كلية سهلة نسبياً .. و تقدر توفر لنفسك شغل من بدايتها .. بحيث يكون عندك دخل يوفر لك وقت عشان تذاكر للماجستير و الدكتوراة بعد كده .. أحسن بكتير جداً من إنك تدخل كلية صعبة .. تاكل كل وقتك .. و تلاقي نفسك عشان توصل للدكتوراة محتاج تشحت . .. يا سيدي .. العالم حالياً .. صعب إنك تلاقي حد يصرف عليك عشان تاخد ماجستير .. و بعدين دكتوراة .. حتي فأعرق جامعات العالم .. لو المشروع أو القسم اللي إنت فيه ماخدش ( تمويل ) يكفيه إنه يديلك مرتب .. حيضطروا يشقلطوك بسرعة .. او مش حتاخد فلوس أساساً .. .. فرجاء .. ماتتوقعش إنك تلاقي المكان اللي يصرف عليك عشان تمارس حبك للأكاديميا .. لأنه حتي لو صرف عليك .. حيكون مش صرف كافي إنك تكون مكتفي .. أغلب الوقت . … … 6- رضا أهلك و جيرانك و عيلتك و عشيرتك و شارعك .. حلو مش وحش .. بس حتعمل إيه لو كان رضاهم .. يحصل بالغلط ؟ .. كام جوازة باظت بمصايب عشان كانت بإجبار من الأهل ؟ كام واحد إنتحر بسبب كلية صعبة أجبره أهله عليها ؟ كام واحد و واحدة بيعانوا بسبب أهاليهم اللي مش شايفين غير كلامهم و دماغهم و بس ؟ … بر الوالدين .. مش طاعة الوالدين .. .. بس إتحمل المسئولية .. أنا عارف إن ده صعب .. و لكنه دلوقتي أسهل مئات المرات من زمان .. زمان .. ماكنش في نت .. ماكنش في حرية المذاكرة و الدراسة و الشغل دي .. دلوقتي .. إنت معاك إمكانيات .. تمكنك إنك تستقل من الشهر الجاي .. … بس إبذل مجهود .. كتير .. اوي .. .. و إفصل دماغك عن كل الدوشة و اليأس و السباقات و كل الكلام ده … … … … 7- اللي صدق إن نجاحه في ثانوي عام نجاح … بعد فترة مش بعيدة .. صدقني خد قلم محترم عرفه إنه الحياة مش مواد و إمتحانات و درجات .. و لو ماتعلمش من القلم ده .. بياخد قلم أشد منه … و أشد .. و أشد .. و حيفضل ياخد إقلام لحد ما يتعلم .. او حتلاقيه قاعد علي أى قهوة ( بلقبه ) كدكتور أو مهندس أو .. و بيشتكي من الحياة و الزمن . .. اللي صدق إن فشله فثانوي عام فشل .. بعد فترة مش بعيدة .. صدقني خد قلم محترم عرفه إنه الحياة مش مواد و إمتحانات و درجات .. و لو ماتعلمش من القلم ده .. بياخد قلم أشد منه … و أشد .. و أشد .. و حيفضل ياخد إقلام لحد ما يتعلم .. او حتلاقيه قاعد علي أى قهوة .. بيندب حظه من أيام ثانوي .. و ندمان .. و حاسس إن حياته كلها متعلقة بدرجات حبر علي ورق . … … اللي فهم من أيام ثانوي .. إن نجاحه أو فشله فيها .. لا يعني أى بلح فأى بتنجان.. حالياً برنس .. قدر يفهم من بدري إن نجاحه أو فشله مابيحددهمش شوية حبر علي ورق .. و لما بيواجهه مشاكل .. مش بيزعق و يقول أنا كنت جايب 99% فثانوي .. أو يقول .. ( التقدير خسرنا كتير ) .. لا .. .. لما بيواجهه مشاكل .. بيفكر فيها .. و يحلها .. بحلول حقيقية غيره ماقدرش يفكر فيها .. .. لأن غيره ..الفاشل الحقيقي .. بيقف و يقول ( ماخدناهاش في المنهج ) .. أو( ماعليهاش درجات ) .. … … و الله أعلم .