لسة مخلص آخر حلقة من ناروتو شيبودين حالاً

لسة مخلص آخر حلقة من ناروتو شيبودين حالاً . و اللي حاكتبه دلوقتي هنا أعتقد مالوش معني أو قيمة زي اللي عندي عند أى حد غيري أكيد. و لكن … و لكن حاكتبه و أشوف أنا محتاج أكتبه ليه في الآخر .. و لو فهمت له في الآخر معني يستحق إني أكتبه هنا … حاسيبه . …

أنا بدأت ناروتو سنة 2007 أتذكر .. قبل ده بسنة .. كنت خلصت عدد محترم من الأنميات التانية .. و علي رأسها طبعاً عدد كبير من حلقات ( bleach ) أيامها .. و حاجات تانية من الكلاسيكيات زي ( إنوياشا , كونان , رانما , دراجون بول , فول ميتال ألكيميست القديم , … و حاجات تانية كتير من اللي مش مشهورة أوي ) . .. و علي مدار السنة دي .. كنت شفت أكتر من إعلان لناروتو في الأنميات التانية دي .. ( أيام ما كان لسة في بداياته و بيعلنوا ليه في الأنميات التانية ) . و زيه زي ( one piece ) بالنسبة ليا .. كنت عارف إنهم جامدين جداً .. و لكن كنت مأجلهم لوقت ما أفضي لهم . . علي 2007 .. بدأت ناروتو .. و بدأ يتحفر في ذكرياتي و عقلي مكان أساسي ليه .. بالظبط زي الأماكن اللي محفورة لأعمال أساسية كونت جزء كبير من ثقافتي و شخصيتي أعتقد ( زي رجل المستحيل , ملف المستقبل , أعمال أحمد خالد توفيق , بليتش , … و حاجات تانية ممكن أعددها بعدين ) . . في الوقت اللي بدأت ناروتو فيه .. كان الأنيمي الأساسي مقارب علي الإنتهاء .. ال ( 235 حلقة ) . و خلصتهم تقريباً في حدود شهرين .. و متذكر كويس إن بمجرد ما خلصتهم .. كان عندي حلقتين بالعدد من ناروتو شيبودين . إتفرجت عليهم ورا بعض .. و فاكر قمت إزاي فرحان و باتنطط في الصالة .. . و علي مدار الشهرين اللي بعد كده .. فاكر كويس جداً جداً إزاي كنت بانزل السايبر اللي علي بعد شارعين من بيتي .. عشان أحمل كل يوم عدد 3 حلقات بالكتير من ناروتو شيبودين . لحد ما وصلت للحلقة 23 تقريباً .. و لقيت إني مضطر أنتظر بقي أسبوع كامل عشان الحلقة اللي بعدها .. و هكذا .. لأن الأنميات بتنزل حلقة كل أسبوع . . ماقدرتش أنتظر بكل تأكيد .. و رحت داخل علي المانجا .. و علي مدار الشهرين اللي بعد كده .. جزء كبير من حياتي كان عبارة عن إني بانزل السايبر يومياً تقريباً .. أقرأ مانجا ناروتو .. لأن في المعتاد المانجا بتبقي سابقة الأنيمي بشوية حلوين … و فضلت علي كده مدة طويلة .. لحد ما وصلت أفتكر للفصول اللي فيها ساسكي بيقاتل إيتاتشي .. و بيقتله .. عند الجزء ده أنا فاكر وقفت ناروتو .. و قررت إني حاكمل بعدين .. … … بعدين ده .. جه من أسبوعين .. بعد أكتر من 12 سنة .. و علي مدار الأسبوعين اللي فاتوا .. كملت ناروتو شيبودين بالكامل . .. بس المختلف هنا .. هو إني كل حلقة كنت بابص علي تاريخ نزولها .. و أفتكر أنا كنت فين في رحلة حياتي في الفترة دي .. . ذكريات كتير جداً صحت في عقلي .. و إفتكرتها .. . ذكريات كلية .. و جيش .. و شغل … و أفكار و مشاعر و حياة كاملة .. … … زماااااان .. أول ما بدأت أدمن أنيمي و مانجا .. كنت باعاني بشدة من الوحدة .. مش وحدة إني وحيد و مالياش أصحاب أو أهل … لا .. و لكن وحدة إني ( مش فاهم ) . وحدة معناها مختلف .. إني حاسس إني فجأة صحيت من النوم .. لقيت كل الناس اللي حواليا فاهمين كل حاجة هما محتاجين يعملوها .. و فاهمين يعملوها إزاي .. إلا أنا . . مش فاهم أنا بادرس هندسة ليه ! مش فاهم ليه حبي للرياضة و العلوم و الفيزياء عموماً مش مخليني حابب دراسة الهندسة بالشكل ده ! مش فاهم الناس حواليا مش بيسألوا ليه ! ( ماقصدش أسئلة في الكلية أو الدراسة .. و لكن عموماً .. في الحياة ) . مش فاهم هما متخيلين حياتهم إزاي ! مش فاهم هو اللي حواليا أساساً بيفكروا إزاي ! . الأنيمي قدم ليا عوالم جاهزة مش محتاجة المعاناة دي كلها .. كل مسلسل و قصة .. كانوا بيقدموا ليا عالم كامل بشخصيات و أحداث و مشاعر و أفكار .. مش محتاجة مني إني أتفاعل معاها بشكل إيجابي . و لكن أتفاعل معاها بشكل سلبي فقط … ( يعني أتلقي و أتفرج عليها بس .. و الأحداث حتحصل لوحدها ) . . و أصبحت باخرج من مسلسل أو إتنين .. أدخل في خمس أو ست مسلسلات تانيين .. و أطلع من لعبة ( video game ) .. ل لعبة تانية .. و هكذا . المهم إني كنت ماسيبش لعقلي أى لحظة عشان ماحسش الإحساس المؤلم بتاع الوحدة ده … كمية الأعمال و الأفلام و المسلسلات و اللعب اللي إستهلكتها علي مدار الفترة من 2006 ل 2013 أعتقد .. ممكن تكفي عدد كبير من البشر لعشرات السنين . أنا ماكنتش باتفرج علي مسلسل واحد مثلاً أو فيلم واحد في المرة الواحدة .. لا .. أنا كان عندي شاشتين من سنة 2009 .. و من سنة 2009 و أنا مقسم الشاشتين لعدد 8 شاشات مختلفة ( كل شاشة أربع أقسام ) . و علي كل قسم كنت باشغل حاجة .. الموضوع ده مستمر لحد النهاردة .. الكمبيوتر الأساسي بتاعي فيه 3 شاشات .. و ماعرفش أتفرج علي حاجة واحدة عليه .. في المعتاد باشوف 4 أو 5 حاجات في نفس الوقت .. و بعضهم بيكون علي سرعة 2x أو 1.5x السينيما بالنسبة ليا مثلاً عبارة عن نشاط ذهني محبب جداً .. لأني مابقدرش أركز في الفيلم ك فيلم .. بالنسبة ليا كل كادر عبارة عن صورة باحاول أقسم تركيزي اللي بيتنطط في كل حتة بين كل جزء في الكادر .. و باسلي نفسي بده ..

… … أنا باحمد ربنا إن ده هو الإدمان اللي تم إبتلائي بيه .. لأني متأكد إني لو كنت دخلت فأى سكة إدمان تانية تهربني من الواقع … كنت أدمنتها بكفاءة و بشدة .. … … نرجع لناروتو ..

بعد عدد بسيط من المسلسلات الأنيمي المختلفة اللي ممكن تشوفها .. بتفهم إنك لازم تعتنق القاعدة الأساسية اللي قرأتها لدكتور أحمد خالد توفيق عن مفهوم الرواية بتاع : دعني أخدعك .. دعني أنخدع .

يعني .. ماتحاولش تمنطق كل شيء لمرجعية في عقلك .. و فأحيان كتير تانية برضو ماتحاولش تمنطق كل شيء لمرجعية الكاتب حاول يثبتها في الأساس .

و لكن دع نفسك تستمتع باللي الكاتب بيحاول يركز الضوء عليه . .. و في ناروتو .. ( و بالرغم من إنها بتوسع من ماساشي كيشيموتو جداً .. و بتبهوأ بهوأة السنين .. و هو نفسه واضح إنه في أجزاء كتير من القصة كان بيصحي من النوم يعيد تكوين أفكاره و يرش مية حوالين الرواية .. و يبدأ من جديد ) .. إلا إن الفكرة الأساسية اللي هو مركز عليها من الأساس جداً .. ثابتة و متغيرتش . .. و هي فكرة الوحدة دي .. إحساس إنك وحيد .. و الألم الناتج عن ده .. و تتعامل مع ده إزاي . … علي مدار الحلقات ( 235 حلقة جزء أول , و 500 حلقة جزء تاني ) .. الفكرة دي ماتغيرتش . و أعتقد إنه نجح بنسبة كبيرة إنه ينقل ليا أفكاره و مشاعره كمشاهد . … … و يمكن هو ده السبب إني دلوقتي باكتب البوست ده … زماااااااااااااااااااان .. لما كنت باقرأ روايات رجل المستحيل .. و أتخيل إني لما أكبر حابقي أدهم صبري فنفسي .. كنت دايماً باتخيل نفسي إني مش حاسمح إن أى واحدة حتدخل العالم بتاعي و تكون نقطة ضعف ( زي مني توفيق ) 😅😅 . . لما كبرت شوية .. و فهمت إني مني توفيق مجرد رمز .. رمز لحاجات أكتر بكتير المفروض تكون عند الإنسان و تحركه ( زي مصر يا أدهم .. أو مصر يا رأفت 😅😅😅 ) . فهمت إن من غير نقاط الضعف دي .. الإنسان مش بيكون عنده نقاط قوة أساساً . . و بعدين كبرت شوية .. و فهمت إن الحاجات اللي بتحرك الإنسان دي .. و تخليه يقاوم لحد آخر قطرة دم .. مش المفروض تكون حاجات خارجية .. و لكن حاجات داخلية جواه .. قناعات .. عقيدة . . و بعدين كبرت شوية .. و فهمت إن المحركات الأساسية للإنسان دي .. لو تعددت أو إختلفت .. حيتشتت الإنسان .. و عمره ما حيقدر يوحد مجهوده أو أفكاره .. و ده وصلني لإقتناعي بمفهوم ( عقيدة التوحيد ) . . و بعدين كبرت شوية .. و فهمت إن الجزء الأكبر من الحياة هو عبارة عن قدرتك إنك تفضل فاكر الإتجاه ده لأفكارك .. بالرغم من كل الخوازيق و المطبات و العقبات اللي بتقابلك في حياتك . . و أعتقد إني لما فهمت ده .. مابقتش حاسس بالوحدة زي زمان .. بقيت حاسس إني كنت بس مركز علي بعض العقبات و الخوازيق و المطبات اللي قابلتني في حياتي .. و كنت نسيت إني حتي لو حاخد منحني أحياناً عشان أتفادي خازوق .. أو أوطي عشان أعدي عقبة .. أو أهدي عشان أعدي مطب .. حتي لو عملت كل ده .. الموتور مش المفروض يقف إطلاقاً .. المحرك الأساسي جوايا مالوش علاقة بالطريق فيه إيه ..

و عقلي هو اللي مسئول ينقل طاقة المحرك اللي المفروض دايماً شغال و مايقفش .. و علي حسب اللي قدامي .. أقرر أكون أسرع ولا أبطأ .. أقوي ولا أضعف .. أقسي ولا أحن .. و هكذا .

لكن فأى لحظة .. المحرك مايبطلش .. قوة المحرك اللي جوايا مرتبطة بشكل أساسي بالسبب اللي هو بيشتغل عشانه .. السبب ده كل ما كان أضعف و أتفه .. كل ما القوة اللي باحس بيها جوايا بتكون أضعف و أتفه .. و العكس .. كل ما كان السبب أقوي و أكبر .. كل ما كانت القوة اللي بتساعدني أتحرك أقوي و أكبر . … … … في ناروتو .. نفس المفاهيم تقريباً تم وصفها .. و لكن ب لغة تفتقد لمرجعية فيها الإجابات .

و عشان كده أنا سعيد بناروتو كعمل فني .. .لأنه كان ماهر جداً في إنه يوصف مفاهيم الوحدة الحقيقية دي .. .. كل اللي إنت محتاجه عشان تلاقي إجابات .. هو لغة فيها مرجعية الإجابات دي … كل تاريخ شفته لحلقة من الحلقات اللي إتفرجت عليها خلال الأسبوعين اللي فاتوا .. كنت بافتكر جزء من أفكاري و مشاعري و ذكرياتي .. و باكرر .. اللهم لك الحمد و الشكر و الرضا كما ينبغي لجلال وجهك و عظيم سلطانك . . الحمد لله رب العالمين .