خلال حياتي , في فترات معينة متذكرها بشكل واضح إن

خلال حياتي , في فترات معينة متذكرها بشكل واضح إن ( إنتاجيتي = productivity ) فيها كانت عالية بشكل أكبر بكتير من غيرها . من أكثر الفترات اللي أتذكرها مثلاً , كانت السنين من 2009 ل 2011 .. خلال الفترة دي كنت عليت باقة الإنترنت ال ADSL اللي كنت مشترك فيها من 265 كيلو .. ل 512 كيلو 🤣🤣 .. اللي هو إنت أعلي سرعة تحميل ممكن توصل لها كانت : 52 كيلو في الثانية الواحدة .. يعني .. الفيلم ال 700 ميجا ( أيامها بقي .. قبل عصر البلوراي ) .. كان بينزل بالظبط في أربع ساعات علي أفضل تقدير . ( لو مافيش أى حاجة تانية بتستهلك الإنترنت ) . . سبب إنتاجيتي العالية جداً في الفترة دي أتذكر كان .. موضوع سرعة الإنترنت دي .. كل ثانية كانت بتعدي قدامي في الساعة و مايكونش مقابل لها ( تحميل ) .. كنت باحس إني بادفع فلوس الإنترنت الغالية جداً أيامها ( 95 جنيه شهرياً ) عالفاضي .. و الكلام ده قبل ما يكون في ( كووتا -Quota = باقة يعني ) .. . فبالتالي .. كان حياتي أيامها عبارة عن : إني باعمل داونلود لأى و كل كورس / كتاب / فيلم / مسلسل / لعبة أعرف أوصل لها .. و خلال فترة ال ( تحميل ) دي .. كنت باستهلك المحتوي ده ( الكورسات , الكتب , الأفلام , المسلسلات , اللعب ) . . بعد سنين طويلة .. عرفت إني كنت باستخدم ما عرفت إسمه بعد كده اللي هو ( تكنيك الطماطماية - pomodoro technique ) .. . و ده تكنيك للي زيي من معشر ال ADHD .. إنك تحط قدامك علي المكتب تايمر محدود الزمن ( اللي بدع التكنيك ده التايمر بتاعه كان علي شكل طماطماية .. عشان كده سمي التنكيك .. تكنيك الطماطماية ) . . و أثناء فترة التايمر / الطماطماية / التحميل علي ما يخلص … إنتباهي كان بيبقي عامل زي الحصان اللي إتحط له غمامة علي عينيه عشان يشوف قدامه بس . و بمجرد ما التحميل يخلص .. كنت أسيب أياً كان اللي باعمله .. و أدور بسرعة علي حاجة تانية أعمل لها تحميل . . خلال الفترة دي .. كان عندي إتنين هارد ديسك .. واحد 80 جيجا .. و واحد 160 جيجا .. اللي هو لما باشوف موبايلي حالياً ب 512 جيجا بابتسم إبتسامة مليانة مشاعر عجيبة . . فعشان ماكنش في مساحة تكفي كل اللي كنت باعمل له داونلود .. كان روتيني الشهري هو إني أشتري علبة ديفيديهات فاضية ( 40 أو 80 أو 160 ) .. و أفضل أملاهم واحد واحد .. كل ديفيديهاية كانت بتشيل 4.7 جيجا فقط .. فكنت لازم أعمل حساب و مخططات و خرائط لكل الكلام ده . … من يومين .. كنت إفتكرت فجأة إني ماشفتش فيلم سلام دانك اللي نزل سنة 2022 😳😳😳 .. و كنت متأكد إني كنت عملت له داونلود من سنة أو أكتر .. و إنه علي أحد هارداتي العديدة اللي قدامي علي مكتبي .. . و بعدين لمدة ثواني حسبت إن المجهود و الوقت اللي حابذله في توصيل كابل يو إس بي بهارد من هارداتي دي .. و أدور في الفولدرات .. أقل بكتير من إني أعمل داونلود للفيلم نسخة بلو راي خلال دقائق بالظبط .. . إبتسمت .. إفتكرت الليالي و الأيام اللي كنت باسيب فيها جهازي بدون ما ينطفي لحظة عشان الداونلود شغال .. إفتكرت كم الخناقات مع أهلي لو حد منهم طفي الكمبيوتر و أنا برة .. لأن الداونلود شغال .. إفتكرت كم الإهتمام و الأهمية و التقدير اللي كنت باديه لشنط الديفيديهات بتاعتي .. و اللي حالياً بقالها سنين مرمية في دولاب بتجمع تراب فوق تراب . إفتكرت كل ده .. و قبل ما أسرح دقائق أكتر في الأفكار دي .. كان الفيلم خلص تحميل .. و إتفرجت عليه بمزااااااااااااااااااااااج . … سبب إني إفتكرت كل الكلام ده دلوقتي .. هو إن في روتين يومي مستمر عليه بقالي فترة طويلة ( شهور دلوقتي ) .. و هو إني كل يوم باشتغل علي أدوات الذكاء الإصطناعي الخاصة بيا .. لحد ما حدها يخلص ( المجاني و المدفوع ) .. . كل يوم بيكون ليا عدد معين من الرسائل و كم معين من الإستخدام علي كل من ( شات جي بي تي , دييب سييك , كلود , جيميناي , … ) و غيرهم من الأدوات اللي مبنية عليهم . . و في عدد من المشاريع شغال عليه بقالي فترة .. . و لاحظت علي مدار الأيام اللي فاتت إني إنتاجيتي بتزيد بفضل الله .. و بعد ما كنت باخلص الحدود بتاعت الأدوات دي علي مدار 10 ساعات يومياً مثلاً .. بقي بيخلصوا مني دلوقتي خلال ساعتين .. و أقل كمان .. . و إني أصبحت بانتظر الميعاد اللي الأدوات دي بتفتح فيه يومياً .. . كل ده فكرني بسنين ( إني مستني الداونلود يخلص عشان أشتغل عالنت 🤣 ) . . و لقيت نفسي باتسائل … يا تري .. يا هل تري .. كمان كام سنة .. و لما يبقي ( حدود إستخدام أدوات الذكاء الإصطناعي ) ماضي سحيق نفتكره بحنين و نوستالجيا .. يا تري .. حاكون فين و باعمل إيه ؟! .. . و يا تري .. رؤيتي للثروة حتكون إختلفت قد إيه ؟! . سنة 2009 ل 2011 .. كان مفهوم الثروة بالنسبة ليا بيتلخص فقط في بضع جيجات زيادة في جهازي .. بضع ميجات زيادة في راماتي .. بضع كيلوات زيادة في إنترنتي .. . و دلوقتي .. أملك من كل هذا أكثر مما حلمت بيه أيامها .. و مما أحتاج الآن . . يا تري .. يا هل تري ؟! . … أرجع ألعب تيم فايت تاكتكس تاني بقي 😅 …

---

كان في جزء في البوست ده فدماغي كنت عايز أشرح فيه العلاقة بين الحدود اللي بتتوضع علي الإنسان .. و تؤدي لزيادة إنتاجيته .. و إني مثلاً أيام الجيش .. و أيام ما كان ممنوع إن يتشاف معانا كتب .. دي كانت من أكتر الفترات اللي قرأت فيها فحياتي الكتب اللي كنت باخبيها تحت الزي الميري بتاعي 🤣🤣 . . و لكن .. لهذا وقت آخر أعتقد . . و الله أعلم .