في تجربة إجتماعية مشهورة و تقدر تجربها بكل سهولة جداً
متخيل تقدر تبقي ملياردير خلال قد إيه ؟! .
في تجربة إجتماعية مشهورة و تقدر تجربها بكل سهولة جداً .. روح أى مكان مليان بشر ( عيادة مليانة , قهوة زحمة , مصلحة حكومية , … ) و أقف فوسط المكان .. و فجأة .. زعّق بأعلي صوتك . مش مهم حتزعق تقول إيه .. المهم إنك فجأة تزعق .. بشكل تلقائي حتلاقي كل العيون فجأة إتوجهت لك .. و الناس حتغير من مكانها و قعدتها عشان تشوفك و تبص عليك .. خلال ثواني بسيطة .. إنت حتكون محل إنتباه و فضول جميع اللي موجودين .. في عقلهم خلال الثواني المعدودة دي .. إنت حتكون السؤال رقم (1) .. و الإهتمام رقم ( 1) .. و الهدف رقم (1) . … لو قلت لك بقي .. إن مقابل كل شخص وجه بصره لك .. و إنتبه لك .. و ركز معاك لمدة ثواني .. حاديلك 10 دولار مثلاً .. متخيل تقدر تبقي ملياردير خلال قد إيه ؟! . … التجربة الإجتماعية دي مشهورة من مئات بل آلاف السنين .. و تم إستخدامها بطرق كتير جداً علي مدار التاريخ .. و لكن حالياً .. أصبحت بيتم إستخدامها بشكل مستمر .. و طول الوقت .. لكن مهم .. مهم جداً جداً جداً .. إنك تفهمها و تعيد التفكير فيها . … خليني أشرح : … الناس مابتشوفش المعتاد .. إن الشمس بتطلع كل يوم من الشرق .. و تغرب في الغرب .. دي معجزة بكل مقاييس العقل البشري المحدود .. لكنك مش بتلاحظ ده لأنه معتاد و متكرر منذ بداية التاريخ . . جارك اللي كل يوم بيفتح محله الصبح فنفس الميعاد .. إنت مش بتلاحظه غير لما مايفتحش محله .. و تبدأ تتسائل .. يا تري السبب إيه ؟! .. في حين إن كل يوم كنت بتعدي عليه و هو بيفتح محله الصبح .. إنت ممكن ماتنتبهش له إطلاقاً . . كل تفصيله صغيرة و كبيرة من تفاصيل حياتك .. طول ما هي معتادة و متكررة .. إنت بتعتاد عليها لدرجة إنك بتعمي عنها بالكامل .. . ذهنك و إنتباهك و عينيك طول الوقت في بحث مستمر عن ال : ( مثير ). … و اللي بيفهم ده من البشر .. بيفهم قدرة و قوة جبارة عنده ممكن ناس تعيش طول عمرها ماتستخدمهاش .. القدرة و القوة دي هي : إنك تتحكم في إنتباهك و إيه اللي بتركز عليه .. و إنك إنت اللي تحرك إنتباهك .. مش تسيب أى متغيرات عشوائية حواليك هي اللي تحركه . … ك إنسان عشت الجزء الأكبر من عمري بدون ما أفهم أو أعرف يعني إيه ( ADHD ) .. ده خلاني واعي بشكل أكبر بكتير من باقي البشر العاديين بالقوة دي و أهميتها . ببساطة لأني : مفتقدها . … بالظبط زي الإنسان القعيد اللي إتولد بدون قدرة علي المشي مثلاً .. بيكون أكثر وعي بأهمية و قيمة الرجلين اللي شغالة .. … و لكن .. إفتقادي لقدرتي علي التحكم في إنتباهي و تركيزي .. إداني حساسية عالية جداً لل ( مثيرات ) بكل أنواعها .. . بال ( مثيرات ) هنا .. ماقصدش البنات المثيرة 🤣 أقصد أى شيء له القدرة علي إثارة الإنتباه .. . أنا و غيري من معشر ال ( ADHD ) .. حساسيتنا تجاه أى تغير و لو بسيط فأى شيء حوالينا عالية جداً من طفولتنا .. فبالتالي .. مهن زي ال ( صياد ) مثلاً .. كانت بتبقي المهن المثالية لأمثالنا .. . و لما بنكبر .. الحساسية العالية دي بتخلينا قادرين علي تمييز مسببات الإثارة أكتر من غيرنا .. و عقلنا بيدور علي أسباب و إجابات غير اللي غيرنا بيركز عليها . … يعني .. في التجربة الإجتماعية اللي إتكلمت عنها في أول البوست .. حتلاقي إن أى حد عنده ( adhd ) في المجموعة اللي إنت زعقت فوسطها .. تركيزه مش حيقف عندك .. لأنه ماكنش مستنيك تزعق عشان يركز معاك .. هو غالباً ركز معاك بمجرد ما إنت دخلت المكان .. ضمن آلاف الحاجات التانية اللي هو تركيزه مشتت بينها . و ده بيديله قدرة أعلي إنه يفهم تسلسل الأحداث اللي أدي بيك للزعيق أو إثارة الإنتباه . … … سبب إني كتبت المقدمة دي كلها .. ( و أيون .. كل ما سبق هو لسة المقدمة 🤣🤣 ) .. هو إني عايز أوضح شكل الفيسبوك عندي مؤخراً .. و اللي متأكد إنه مشابه للفيسبوك عند كتير من اللي حواليا .. .
- تريند إنتحار .
- تريند قتل .
- تريند حادثة .
- تريند إبتزاز .
- تريند نصب . و هكذا و هكذا .. . كأني فاتح جرنان علي صفحات الحوادث فقط .. . و قبل التريندات دي .. كان هيجان ما قبل رمضان بدأ يجتاح الفيس عندي برضو … اللي هو أخبار عن مسلسلات و ممثلين و ممثلات بلا توقف .. لحد ما بدأت أعمل حذف و إخفاء لأى خبر مشابه .. فإختفوا بالكامل .. و حل محلهم الحوادث السابق ذكرها . . و بكل تأكيد جزء كبير من اللوم يقع عليا في الموضوع ده .. لأني قرأت أول بوست أو أول خبر عن حادثة معينة .. فخوارزمية الفيسبوك قررت إني ( مهتم ) بالنوع ده من المحتوي .. و بدأت في ( تزغيطي ) أنواع أخري منه . … و لكن .. أنا واعي إن الحوادث دي ما هي إلا القليل جداً و ( مثير ) للإنتباه ضمن الكثير جداً و ( معتاد ) .. . يعني .. من ضمن كل ألف حالة زواج مثلاً .. بيحصل إن زوج يضرب زوجته . . لكن أخبار الأزواج و الزوجات اللي صحوا من النوم الصبح بدون ما يضربوا بعض بالجزم .. أخبار مملة جداً .. . متخيل الملل ؟! .. النهاردة الصبح .. صحي الزوج من النوم .. فطر .. نزل الشغل .. رجع .. باس راس زوجته .. أكل .. نام .. و شكراً .. فين الإثارة ؟! فين الخبر ؟! فين التعليقات و اللايك و الشير و التفاعل ؟! . … إطلااااااااااااااااااااااقاً كلامي مش معناه عدم توجيه ضوء السوشيال ميديا علي أمراض معينة بهدف علاجها .. . و لكن كلامي مجرد توضيح إن البؤرة اللي موجه عليها الضوء .. بتمثل جزء ضئييييييل جداً من الواقع .. و إن ضوء السوشيال ميديا .. ضوء أهوج .. بيتبع فقط ما هو مثير للإنتباه .. … طيب .. نعمل إيه بناءاً علي ما سبق ؟! .. . ولا أى بلح .. فقط إعرف إن مقابل كل إتساع لبؤبؤ عينك و إنت بتلهث ورا أخبار مين قتل مين إمتي إزاي و فين و ليه … إنت صرفت من وقتك و إنتباهك و مجهودك و طاقتك .. و اللي قبض المقابل ك فلوس .. مش إنت إطلاقاً .. و لكن غيرك من اللي فهم الكلام اللي فوق . … و الله أعلم .