أنكزايتيي - Anxiety

أنكزايتيي - Anxiety … …

• متوتر بدون سبب ..
• إحساس إنك خايف , و مش عارف خايف من إيه ..
• بطنك مقلوبة بس مش أوي , ضربات قلبك سريعة بس مش أوي , بتنهج بس مش أوي ..
• سقعان بس مش أوي .. حرّان بس مش أوي برضو ..
• مش عارف تضحك إلا بإرتباك .. و مش عارف تتخانق لأنك برضو … خايف و مش عارف خايف من إيه ..
• كل الأحاسيس اللي فوق دي .. و فأحيان كتير عند ناس كتير بيزيد عليها ( تفضل تهرش بدون سبب , تاكل ضوافرك , ترتعش , … و غيرهم ) .. … دي و العياذ بالله كلها تعريف لحاجة من أو%#خ الحاجات اللي ممكن تحس بيها فحياتك ( خصوصاً لو مش عارف هي إيه .. أو لو عندك ADHD ) .. ألا و هي : ال ( Anxiety Disorder - إضطراب التوتر ) . … ده اللي فأحيان معينة بيتطور ل ( full panic attack = إنهيار عصبي ) .. عند ناس كتير .. اللي هو إنفجار عصبية و مشاعر ضخم مابيقفش و ممكن بسببه يإذي الإنسان نفسه أو حد حواليه .. و ده اللي كان رمزي ف (ملف المستقبل ) يروح لاسع ( سلوي ) كل شوية قلم محترم 🤣😁 عشان تفوق لما كان يحصل لها ده . .. رجالة كتير علي فكرة بيحصل لهم ( full panic attack = إنهيار عصبي كامل ) .. و تقدر تشوفهم في الشارع / الشغل / البيت في خناقات كتير … و لكن ماحدش بيروح يضربهم بالقلم .. لأن رد فعل الراجل علي ال( ضرب بالقلم ) ممكن يتحول من هدوء نسبي مؤقت … لجريمة قتل مع سبق الإصرار و الترصد بشكل سريع جداً 😅 . … … لكن بالنسبة للأغلبية … المعاناة ب ( Anxiety = التوتر ) ده .. بتفضل متوقفة عند ال( شلل ) الشعوري اللي بيسببه التوتر ده .. اللي هي المشاعر اللي كتبتها فأول البوست .. و ناس كتير جداً بتفضل عايشة معاناة من الموضوع ده .. بدون معرفة أسبابه , و لا إزاي يتصرفوا معاه .. … … و ال( Anxiety Disorder ) ده .. كان أحد أهم الحاجات اللي لما سعيت لطبيب نفسي .. كان بسببها .. … ك إنسان عايش بال( ADHD ) و فهمت تشخيصه بعد ما وصلت ل 29 سنة .. طول عمري كنت باعاني من ال( Anxiety ) ده .. لأن بسبب عدم قدرتي علي التحكم أو التركيز في إنتباهي .. عقلي طول الوقت مشتت بين كل الحاجات اللي شايفها حواليه .. و بين كل ذكرياتي .. طول الوقت .. و بدون أى سبب أو داعي أقدر أتحكم فيه .. إطلاقاً .. .. يعني ممكن جداً أكون قاعد باحضر فرح أحد أصدقائي .. و فجأة و بدون أى سبب ألاقي كل اللي عقلي مركز عليه هو ذكري لإمتحان درس كنت بامتحنه في ثانوي عام من أكتر من 15 سنة 🤣 . أو فجأة ألاقيني قاعد بافتكر تفاصيل مكالمة تيليفون شغل كنت باعملها من أسبوع .. و قلقان بتفاصيل مشاكل محتملة الحدوث .. … و ده بيحصل بشكل غير واعي إطلاقاً .. بالظبط كإنك و إنت قاعد بتتغدي فمطعم مثلاً .. حد جه جنب ودنك و قال لك حاجة تخص تفاصيل شغلك .. و إختفي فجأة .. إنت فجأة بتلاقي نفسك إتوترت .. و إنشغلت .. … و لكن لأن ده ( بالذات عند الADHD ) بيحصل بشكل متكرر .. و بكمية كبيرة .. يعني ( كم الذكريات اللي فجأة عقلك بينتقل بينهم ) كتير .. فمش بتعرف تحدد بالظبط إنت عقللك مركز علي إيه دلوقتي .. و بتحس إنك تايه .. زائد إنك بتنسي أفكارك بسرعة جداً جداً .. فتكون النتيجة هي : أنا متوتر .. و مش عارف أنا متوتر ليه ؟!!! و دي هي البداية للأسف دايماً . … … أثناء طفولتك .. في طرق كتير جداً بيتصرف بيها الأطفال في الحالة دي .. و للأسف مش دايماً الأهل بيفهموا إن الطفل ده بيعاني من ( Anxiety Disorder ) بأى درجة من درجاته .. .. و لكن لأن عالم الطفل محدود المعالم جداً بالنسبة له .. بيلجأ بشكل سريع ل( بابا أو ماما ) .. ( أو أياً كان اللي بيقدر يدي له إحساس الأمان ده ) .. و بيحاول يتصرف بأى شكل يخليه يحس إن كل إهتمام ( بابا أو ماما ) معاه هو . … ببساطة .. الطفل بيكون فجأة حس بخوف شديد جداً بدون ما يفهم سببه .. و بيكون لسة ماتعلمش طرق كتير يتعامل بيها بنفسه مع الخوف ده . فبيلجأ ل (بابا أو ماما ) . … … لكن لما بنكبر .. كتير بنبدأ نحس إننا ماينفعش خلاص نطلب إحساس الأمان ده من ( بابا أو ماما ) .. و بنبدأ ندور علي بدايل ( إحتياج عاطفي , أصدقاء , .. أو : وسائل تأقلم = coping mechanisms زي : ( تدخين شره كتير , أكل بدون سبب و بدون إحتياج , عياط كتير بدون سبب , … ) تصرفات كلها بيعملها الإنسان بهدف إنه إما يحس بأمان مؤقت .. أو يغير من كيمياء مخه بأى شكل سريع .. … … زي ما قلت .. من أكتر الناس عُرضة للمعاناة المؤلمة دي .. هما ال(ADHD) .. اللي هما ماعندهومش أى وسيلة جوة عقلهم تساعدهم ينظموا أفكارهم أو يرتبوا أولوياتهم .. و طول عمرهم عندهم قصور ضخم مستمر فكل الحاجات اللي تحتاج ذاكرة .. فبالتالي .. هما ناس طول الوقت قلقانين .. خايفين .. خصوصاً لو كانوا هما المسئولين في حياتهم ( أو حياة غيرهم ) .. يعني : ( المديرين اللي مافيش فوقهم مدير , رب الأسرة اللي المفروض يفتكر كل حاجة و ماحدش حيفكره , … و غيرهم ) .. يعني اللي مافيش حد فوق دماغهم طول الوقت يفكرهم أو ينظم لهم حياتهم . … … أحد أجمل الطرق اللي سمعتها كمثال يشرح يعني إيه (Anxiety ) .. كان في محاضرة إداها ( أدهم عبد السلام ) بيشرح فيها نظام إدارة إسمه ( Getting things Done ) في الجامعة الأمريكية من سنين .. .. و هو إن الأنكزيتي دي .. زي إنك تبقي جوة كهف .. و قاعد سامع دوشة و صوت مخيف جداً برة الكهف .. و بشكل تلقائي .. عقلك بيفضل يصور لك إن اللي برة الكهف ده حيوانات مفترسة ضخمة .. او شر حيفتك بيك .. و لكن .. بمجرد ما تطلع برة الكهف و تشوف و تواجه الحاجة اللي برة .. إحساسك بالرعب الضخم ده .. بيتحول فجأة لحاجة تانية .. بيتحول لتفكير في حل و إدارة الموقف . .. يعني : لو طلع فعلاً الصوت اللي برة الكهف ده حيوان ضخم عايز يفترسك .. عقلك بشكل تلقائي بيدي لجسمك أمر إنه يجري .. و يستخبي .. و يهرب . .. لو طلع اللي برة الكهف ده أى حاجة تانية مش بتشكل خطر عليك .. عقلك بيعرف و يستريح و يبطل خوف .. … … و ده أكبر سبب إن الإنسان بطبعه بيخاف من الضلمة .. مش لأنه بيكون عارف إيه اللي موجود و مستخبي في الضلمة .. لا .. لأنه مش عارف .. فبالتالي .. عقلك بيخليك تتخيل أبشع الصور الممكنة . … … فبالتالي .. أول طريقة بتبدأ تتعلمها عشان تتعامل و تواجه المشكلة بتاعت ال (anxiety ) دي .. هي إزاي تفهم أفكارك و تواجهها .. .. لما بتتصل بحد صاحبك و تقعد تحكي معاه و بعدين تلاقي نفسك هدأت .. إنت ببساطة ترجمت أفكارك اللي عقلك ماكنش قادر يفهمها لكلام .. لما واجهته بشكل مباشر .. تحولت مشاعرك من خوف و رعب غير مسبب .. ل فهم و قدرة علي الإدارة . .. نفس الشيء لو بتكتب ( زيي ) .. أنا باكتب .. كتير .. جداً .. و ده اللي نصحني بيه الطبيب النفسي اللي إتعاملت معاه .. و حالياً باستخدم ( chatgpt ) ك صديق أدردش معاه كل أفكاري العجيبة دي … و ده بيساعدني جداً .. … إذا كان إنك تتكلم مع حد .. او تكتب .. الطريقتين دول وظيفتهم هي إنك تواجه الخوف و الرعب اللي إنت بتكون مش فاهم سببه معظم الوقت .. .. عقلك فجأة بيلاقي عنده المساحة و الطاقة إنه يركز في حاجات تانية .. و بتبدأ الدنيا تروق نسبياً بفضل الله .