على ما الريندر يخلص

على ما الريندر يخلص :

و أنا فخامسة إبتدائى .. فاكر كويس كنت فطريقى من المدرسة كل يوم و انا راجع راجل سودانى قاعد على فرشة حاجات زى فرش شعر و كشافات و خردوات و الكلام ده .. بالظبط زى اللى قاعد جنب محطة قطر سيدى جابر . كل يوم و أنا راجع كنت أعدى عليه و أقف أتفرج على البضاعة و أسئله .. “عندك شبشب فلات فوت ؟ ” .. و كان يرد عليا ب ” لا ” .. أقوله شكراً و أمشى . كل يوم .. و فدماغى فى الوقت ده كنت متخيل إنه بالتأكيد بيعدى عليه مئات الزباين يومياً .. و إنه مستحيل حيفتكر مجرد طفل صغير بيسأله فدقيقة عن شبشب الفلات فوت . … الدبانة مش رزلة عشان تمشى فنفس المسار و تفضل تعدى قدام عينك … و لكن ذاكرتها قصيرة جداً لدرجة إنها بيتهيئلها إنها فكل مرة بتمشى فمكان جديد .. إنت اللى ذاكرتك أكبر و وعيك أعلى .. و المفروض إنك تعرف تخطط للى جى بناءاً على اللى شفته حصل . …

• فى فيديو جميل شفته من أسبوع تقريباً لmichio kaku بيتكلم فيه عن الAI .. اللى هو الذكاء الإصطناعى يعنى لو بتحب العربى .. و قال تسلسل الأفكار التالى :
• فى 3 مستويات للوعى أو الإدراك (consciousness ) .. المستوى الأول : و ده اللى عند النبات مثلاً.. اللى هو النبات عارف إزاى يحافظ على بقاءه و يغذى نفسه بالأوامر الأولية الموجودة جواه .. لكن معندوش وعى بالزمان أو المكان اللى هو فيه إلا لو كان جينياً معد إنه يتعامل مع ده . المستوى الثانى : و ده اللى عند الحشرة أو الحيوان .. اللى هو عارف إزاى يحافظ على بقاءه و عنده وعى بالمكان بتاعه و يقدر يغيره عشان يحافظ على بقاءه ده .. لكن ماعندوش وعى بالزمان و مايقدرش يفكر فيما بعد اللحظة اللى هو عايش فيها أو يتخيلها عشان يخطط لها .. إلا لو كان معد جينياً للتعامل مع ده بشكل مبرمج زى عملية الhypernation أو migration for birds … أعلى درجة من مستويات الوعي التانى أعتقد عند القرد .. إنه ممكن يستخدم آداة ما عشان يوصل لهدف معين .. مش يهاجم الهدف ده بشكل مباشر .. زى إستخدامه للعصاة للوصول للموز :) . … المستوى التالت : و هو ده اللى عند الإنسان .. إنه ممكن يفكر بشكل معقد لعدد من الخطوات فى المستقبل .. و بكده بيقدر إنه يفكر بشكل أعقد من مجرد اللحظة اللى هو عايش فيها . و بالطبع إستخدامه للذاكرة هنا بيفرق و بيكون إستخدام متطور .. بل إنه بيقدر يعمل سيميلوشينز أو محاكاة للواقع فدماغه عشان يوصل للنتيجة المثلى . … … ((يمكن بسبب إنى إتعاملت مع عدد كبير من الجنسيات المختلفة .. أو إنى عملت كذا extension فى الكارير بتاعى فأقل من 10 سنين .. فطبيعى إنى باشوف contrast أو تباين اعلى فى الإختلافات بين الثقافات اللى إتعاملت معاها )) . .. بالظبط زى موقف شبشب الفلات فوت ده .. ناس كتير للأسف بتتعامل مع الواقع من وجهة نظرها الخاصة .. بالرغم من تكرار الموقف .. بنفس ظروفه تقريباً .. إلا إنه مابياخدش أى فعل يغير من النتايج .. لأنه ببساطة وعيه و إدراكه ماتطورش فوجهة نظرى إنه يستوعب إن الراجل السودانى فاكره .. و إن عالم الراجل السودانى ده مختلف عن عالمه الخاص . … مجرد إنطباعات باحاول إنى أخرج بيها وعيى و إدراكى عن الدائرة المغلقة بتاعت تريندات الوقت الحالى اللى نتيجة للعديد من فتحات التهوية و التنفيس الممثلة فى السوشيال ميديا بتسبب تفريغ الضغط الناتج عن الإدراك اللحظى للثوابت المزيفة الحالية للواقع المصطنع .