تعقيباً علي البوست اللي قبل ده ( اللي إتصل بيا

تعقيباً علي البوست اللي قبل ده ( اللي إتصل بيا بيدعي إنه من البنك المركزي و عايز يحدث بيانات الفيزا بتاعتي 🤣🤣 ) .. و بما إني فاضي دقايق أكتب بوست … فرجاء إقرا التالي :

1- قاعدة عامة و أساسية و مابتتغيرش أبد الآبدين هي : ” إسأل أكتر من تتكلم ” .. يعني لما تلاقي اللي قدامك أو بيكلمك طالب منك معلومات .. و إنت عندك و لو ذرة شك فيه … إشتري و ماتبيعش . لو بيقول لك إنه بيكلمك من بنك … إسأله ” أنهي فرع ؟ , إسم مديرك ؟ , وظيفتك ؟ , طب أنا إسمي بالكامل ظاهر قدامكم إيه ؟ , طب اللي إنت بتقولي عليه ماينفعش أروح أعمله في الفرع ليه ؟ , طب إنتوا كام فرع ؟ , طب إنت إتغديت إيه إمبارح ؟ , طب بتحبني ولا مابتحبنيش ؟ , طب إنت عامل إيه دلوقتي ؟! , … و هكذا .. ” … ببساطة .. لو هو فعلاً من جهة مخولة بالإتصال بيك ( بنك أو ما شابه ) .. فبنسبة 100% المكالمات بتبقي متسجلة و متراقبة .. و بيبقي لازم يجاوب علي كل أسئلتك بكل طول بال و روقان و سعادة … لكن لو حسيت إنه بدأ يتعصب و يعرق و يكره حياته و اليوم اللي فكر يتصل بيك .. إقفل السكة فوشه .. و لو إتصل بيك تاني .. إفقد الذاكرة .. و إرجع إسأله نفس الأسئلة مرة تانية .. و بعدين إقفل السكة فوشه . … 2- تحت أى ظرف .. أرقام الفيزا بتاعتك التلاتة اللي علي الضهر … مايتقالوش في التيليفون … و خليك متأكد إنك طالما قلت ال3 أرقام دول في التيليفون .. إنت كده بتدي اللي إنت بتكلمه الحرية الكاملة إنه يدخل يشتري و يصرف اللي عندك في الفيزا بتاعتك . … 3- لو أى حد .. حتي لو فنان مشهور إتصل بيك تيليفونياً .. و قال لك “مبروك إنت كسبت كذا ” … أياً كان ال ” كذا ” دي إيه .. أشكره و أطلب منه إنه يتبرع بالجايزة دي لأمه .. و إقفل السكة .. .. حضرتك كل البرامج التيليفزيونية اللي ربت وعي أجيال الناس اللي عندها 40 و 50 سنة حالياً ( كلام من دهب ) .. و طارق علام .. و إفتح الباب و زغرت عشان إنت عندك مساحيق غسيل جوة دي .. كل االلقطات اللي من النوعية دي .. بيبقي معمول لها إعداد الأول … و بيتم الترتيب لها .. و التحضير .. و بتتعاد كذا مرة لحد ما بيبان إن الزغروتة اللي طلعت .. طلعت مفاجأة … و إطلاقاً مابتكونش مفاجأة أو عشوائية . … و لكن لأن أجيال كاملة إتزرع فعقلها فكرة إن حد ممكن يتصل بيك و يكسبك لمجرد إنك عندك مساحيق غسيل مثلاً .. فالأجيال دي حالياً بتمثل أرض خصبة جداً لأي نصاب عنده مستوي ذكاء متوسط حتي . … 4- لو إنت ربنا كرمك و بقيت بتشتغل مع عملاء برة مصر … بنسبة كبيرة حتلاقي أرقام من دول مختلفة في العالم بتتصل بيك .. و بيتكلم معاك إنجليزي … و بنسبة 99% .. حيكون إنجليزي بلكنة هندي .. و حيقول لك تعالي أكلمك عن الإستثمار في البورصة .. .. حترد عليه بالإنجليزي : thank you, kindly sir please give those advices to your mother . … لو إنت عندك وقت بقي و حابب تتسلي .. كمل معاه المكالمة .. بس ماتنطقش بأى رقم ماتكونش فاهم بنسبة 100% توابع إنك تنطقه .. يعني رقم حسابك في البنك .. ماتقولوش .. إلا لو فاهم توابع ده .. بطاقتك , صندوق البريد الخاص بيك , و لا حتي مقاس بنطلونك … أى رقم تقوله .. إما تكون فاهم 100 % توابع إنك تقوله … او ماتنطقوش .. و بعدين تكمل دردشة بالإنجليزي .. لو مستواك في اللغة متوسط .. أوعدك الحوارات مع إخواننا الهنود حيخليه أفضل نسبياً .. و حتحس بطراوة و نعنشة لما تسمع أى لكنة تانية بعد كده . … 5- لو اللي بيكلمك طلع مصري أو خليجي أو عربي عموماً .. و بيقول لك تعالي أكلمك عن البورصة .. إتبع القاعدة رقم واحد … و بعدين القاعدة رقم 4 … … 6- بمناسبة الفالانطاين … لو ماشي في مول .. و معاك خطيبتك .. و دخلت عليكم بنت شبه ” دنيا سمير غانم ” في فيلم طير إنت لما كانت شغاله في مول .. و بدأت تكلمك عن فرص إنك تكسب أسبوع في بورتو السخنة .. او الساقعة .. أو إنك تقتني الشاليه الخاص بيك مجهز علي أحدث الستايلات العالمية .. بمقابل 45 جنيه بس .. و حتديك ال5 اللي فاضلين فضية عشان تحاسب المواصلات .. و كمان إنك عشان وشك سمح و الرومانسية باينة في عينيكم و إنتوا بتحبوا بعض … تيجوا تحضروا ميتنج عشان تاخدوا جوايز قيمة .. .. حترد عليها بكل رومانسية و ذوق إن ” متشكر جداً … إحنا متبرعين بالشاليه لمامتك ” … و تسيبها و تمشي . … 7- لو مانفذتش اللي قلته في النقطة رقم (6) .. و رحت مع البنت اللي فاردة شعرها دي .. و حضرت الميتنج … عايزك كل 10 دقايق تقوم في مكانك و تزعق بصوت عالي : ” تاااااااايم شيييييييييير - TIME SHAAAARE ” .. و بعدين تقعد تاني .. … و بعدين ( و إنت قاعد فمكانك ) .. تفتح باقة و تفتح يوتيوب .. و تتفرج علي كام فيديو عن معني نصباية ال ( TIME SHARE ) .. و معاناة الناس اللي إتنصب عليهم في الموضوع ده . … و بعدين تاخد البروشور و الكام ورقة ملونة اللي بيقولوا لك فيهم إنهم فيهم الجوايز بتاعتك … و تبرمهم كويس أوي … و بعدين .. و بعدين ترميهم طبعاً .. ” يا قليل الأدب ” .. … 8- القاعدة العامة الأبدية الأزلية اللي مش حتتغير حتي تقوم الساعة إن شاء الله … أى مكسب يجيلك .. أو يتعرض عليك .. و إنت مش عارف كويس جداً إنت دفعت مقابله إيه … فهو بنسبة 100% … نصب . و حتدفع مقابله ( ده لو أخدته 😆😉) أضعاف مضاعفة .. و تندم إنك في يوم ( أخدته 😉😆 ) . … 9- القاعدة العامة الأبدية الأزلية اللي بعدها برضو .. . أسهل طريقة عشان لما تبص في المراية تشوف نفسك ( ولا مؤاخذة ) حمار .. إنك حد يعرض عليك إنه ياخد فلوسك .. و يشغلها أو يستثمرها .. و إنت قاعد مفخد مأنتخ .. و بعدين يرجعها لك أكتر شوية . .. ده بيبقي إسمك فيه ( DUMB MONEY ) .. يعني ( فلوس حمقاء ) .. و أبداً ماتعملش ده .. ماتستثمرش مع حد في علم إنت مش فاهمه .. ماتستثمرش مع حد في مجال إنت مش جواه .. ماتستثمرش مع حد في أرض إنت مش حتنزل تزرعها و تحرتها و ترويها بنفسك .. … و إلا … ماترجعش تشتكي . … 10 - لو أى حد من إصحابك القدامي بتوع المدرسة ..كلمك فجأة .. و قالك تعالي أعزمك في كافيه ديكوراته حلوة .. عشان أكلمك عن فرصة بيزنس 😆😆.. روح إشرب القهوة الغالية علي حسابه .. و سيبه و إمشي .. .. و لو سمعت منه أى كلمة زي ( كيو نت , دوبلي , دوكس , فوركس , … ) .. كب القهوة عليه .. و بعدين أطلب سحلب .. و بعدين كبه عليه هو كمان .. … 11- القاعدة العامة الازلية .. عشان ماتخلطش بين ( الأفيلييت ) .. و ال( تسويق الشبكي ) .. .. الأفيلييت : إنت مابتشتريش أى شيء بنفسك … لا … إنت بتشتغل الأول … عشان تبيع منتج .. و بعد ما المنتج بيتباع .. و الشركة تقبض تمن المنتج من الزبون … إنت بتاخد عمولتك من الشركة .. ده حلو .. ده صح .. ده إسمه تجارة .. ده شغال منذ بدء البشرية علي الأرض . … … التسويق الشبكي : إنت حد بيستحمرك .. و بيخليك تشتري كمية من المنتج الأول بنفسك .. علي أمل إنك بعد كده حتبيعها … و بعدين مابتعرفش تبيعها .. و بتحطها تحت السرير بتاعك .. و تقعد فوقه تلطم علي المبلغ اللي دفعته و خسرته .. و بعدين بتلبس قميص شيك .. و تدور في موبايلك علي أرقام زمايلك اللي ماشوفتهمش من 15 سنة .. و تتصل بيهم عشان تعرض عليهم فرصة بيزنس في عزومة حتعزمها لهم في كافيه محترم … و تحاول تستحمرهم هما كمان . .. ده وحش .. ده كخة .. ده غلط … ده إسمه تسويق شبكي ( PYRAMID SCHEME ) .. ماتعملوش . … … كفاية كده دلوقتي .. ممكن أكمل بعدين إن شاء الله .. و الله أعلم .