سؤال في غاااااااااااية الخطورة

سؤال في غاااااااااااية الخطورة . … زماااااان .. أول ما إشترينا الكمبيوتر سنة 2003 و أنا في أولي ثانوي , معلوماتي كانت أقل من الصفر حرفياً عن كل ما له علاقة بالكمبيوتر .. لدرجة إن بعد شراء الكمبيوتر بأسبوع والله العظيم .. إتصلنا بالراجل صاحب المحل اللي أشترينا منه الجهاز و طلبنا إنه ييجي يعمل صيانة له لأن في مشكلة فيه و مافيش صوت بيطلع من السماعات . بعد 3 ساعات الراجل جه .. و قعد قدام الجهاز .. و علي الصوت اللي كان معمول له ( mute ) من تحت جنب الساعة في التاسك بار … و سلم علينا و مشي و هو بيضرب كف علي كف 🤣😅 . … بعد شهور من شراء الكمبيوتر .. و بعد ما مهاراتي فيه تقدمت بشكل كبير جداً .. لدرجة إني بقيت قادر علي تعلية و توطية الصوت من تحت جنب الساعة في التاسك بار لوحدي و من غير مساعدة 😅🤣 . قررت إن الوقت جه إني عايز أجيب ألعاب جديدة علي الهارد زي ما أصحابي اللي في المدرسة بيقولوا إنهم بيعملوا .. و أصحابي في المدرسة شرحوا ليا إزاي أفك الهارد .. و أروح لعمو صاحب محل الكمبيوتر .. و أقول له إني عايز أنزل ألعاب علي الهارد . … فكيت الهارد ال 80 جيجا .. و شيلته في فوطة ( آه والله العظيم كنت باعمل كده ) و لفيتها عدد مرات عشان تحميه كأنه عيل صغير .. و نزلت و أنا عامل بالظبط زي نبيل الحلفاوي و هو بيوسع خُرم العسلية أقصد القنبلة ولا مؤاخذة في الطريق لإيلات . وصلت لعمو صاحب محل الكمبيوتر .. عرض عليا مساعدته .. رديت عليه بكل ثقة و غرور ” لا شكراً .. ركب إنت الهارد بس و أنا حاتعامل .. أنا كفاءة و مافيش حاجة في الكمبيوتر ماعرفهاش 😎” . … عمو ركب ليا الهارد ال80 جيجا في واحد من الأجهزة بتاعته .. و سابني و راح لجهاز تاني يكمل شغل عليه .. فتحت جهاز عمو .. رحت لحد الفولدر اللي فيه ( جيمز ) عنده .. جيت آخده عندي .. إكتشفت إن مافيش مساحة عندي في بارتيشين الجيمز . بصيت لعمو .. و ماحبتش أزعجه أو أوري له إني مش عارف أتصرف إزاي .. قررت أعتمد علي نفسي .. و بعدين إكتشفت إكتشاف مهم اوي أوي أوي .. إن كان في فولدر مساحته كبيرة جداً جداً جداً (إسمه جيمز ) علي الهارد بتاعي .. و فيه نفس الجيمز اللي موجودة عندي في فولدر تاني مساحته صغيرة جداً جداً جداً علي الديسكتوب . … قلت لنفسي .. أكيد في حاجة غلط .. بس طالما في فولدرين .. الإتنين فيهم نفس الأيقونات .. واحد مساحته كبيرة أوي .. و التاني مساحته صغيرة … و أنا محتاج مساحة دلوقتي .. أنا حامسح اللي مساحته كبيرة أوي ده … و كده كده أنا عندي الفولدر التاني اللي مساحته صغيرة جداً جداً جداً فيه كل الألعاب .. … عملت ده بالفعل … و خدت شوية ألعاب من عند عمو .. و رجعت بيتي حاسس بالإنتصار و النشوة و السعادة و الفخر و الحاجات الحلوة كلها .. … ركبت الهارد .. و جيت أفتح اللعب اللي كنت بالعبها في المعتاد … مافيش لعبة بتفتح .. كل ما أضغط علي أيقونة لعبة .. ألاقيها مابتفتحش .. و بيطلعلي رسالة معناها فهمته يومها و مانسيتهوش أبداً .. معناها : إنت بتضغط علي الشورتكات .. فين الملف الأساسي ؟! 🥹😭😭😭 … … علي مدار سنين حياتي بعد كده .. إتعرضت لمواقف كتير جداً .. كنت بافتكر الموقف ده فيها .. إنك بعد ما تبذل مجهود ضخم ( بالنسبة لك ) .. و تظن إنك إنتصرت ( بالنسبة لك ) .. تطلع النتيجة بالنسبة لك … فشل . … تقريباً كل سنين الكلية بتاعتي و ذكريات إمتحاناتي فيها نفس الشيء ده بالظبط .. مجهود جبار ( بالنسبة ليا ) بابذله .. و باطلع من الإمتحانات حاسس إني المفروض آخد جايزة نوبل علي حلولي .. و النتيجة … ( فشل ) . … … سؤالي اللي فضلت كتير أسأله لنفسي : تعرف إزاي ؟! تعرف إزاي إن الطريق اللي إنت ماشي فيه ده .. هو اللي المفروض تكمل سعي فيه و تعافر و تبذل مجهود أكتر ؟! . .. تعرف إزاي إن المجهود اللي إنت بذلته ده .. في الطريق الصح ؟ .. لما مسحت الفولدر اللي فيه الداتا الأساسية بتاعت الجيمز .. و كنت فاكر إن فولدر الشورت كاتس كفاية و مش محتاج غيره .. ماكنش عندي معلومات غير كده .. ماكنتش أساساً لسة أعرف يعني إيه ( shortcut ) .. .. لما عانيت معاناة السنين في الكلية .. و كنت طول الوقت فاكر إني مقصر و إني لو بذلت مجهود أكتر حاقدر أحفظ و أحل صح .. ماكنتش أعرف لسة إني مستحيل فحياتي أقدر أحفظ حاجات زي دي .. و ماكنتش أعرف أى شيء عن يعني إيه ( ADHD ) . … … بكل تأكيد الإجابة الصح ماكنتش : ( كمّل سعي ) .. يعني : لو كنت رجعت لعمو بتاع محل الكمبيوتر و طلبت منه أنقل لعب من عنده تاني .. و قعدت أنقل (Shortcuts ) .. كنت برضو حارجع البيت ألاقي إني باضغط علي أيقونات فاضية .. بالرغم من إني سعيت و بذلت مجهود كبير . .. و بكل تأكيد مهما فضلت أحاول أذاكر بنفس الطريقة و أبذل مجهود أكبر في الكلية .. آخري كان حيفضل ( مقبول ) .. و بالعافية كمان . … … طب أعمل إيه ؟! . … كنت في الجيش أفتكر سنة 2013 … عشر سنين بعد 2003 .. لما قرأت لأول مرة جملة فأحد روايات باولو كويلو ( مش متذكر هل كانت the pilgrimage ولا aleph ) .. و لكن معني الجملة دي خلي دماغي نورت فجأة بأول جزء في الإجابة علي السؤال . .. الجملة كان معناها : الحكمة و حقيقة الحياة .. في إنسان ممكن يخوض مغامرات ضخمة في أعماق البحار و أعالي الجبال عشان يوصل لها … و إنسان تاني ممكن يلاقيها في أبسط المهام اليومية العادية .. حتي لو كانت مجرد إنه يهدهد إبنه الصغير عشان ينيمه . 😮😮😮 … الجملة دي لما قرأتها .. فاكر كويس جداً إني قفلت الكتاب .. و بصيت لسقف المكان اللي كنت قاعد فيه شوية .. و عقلي كأنه إتفتح له كمية أبواب كتيييييييير أوي فجأة .. … … … هو الإنسان عايز إيه من حياته أساساً ؟! .. مُتع جسدية ؟!
أى متعة جسدية مهما كانت .. الإنسان بيمل منها و يعتادها .. أي أكل آخره شبع لدرجة إنك تبقي مش عايز تشوف صور الأكل حتي .. أى متعة جسدية .. حتي لو ملكة / ملك جمال العالم .. آخره ملل و شبع برضو … … طيب .. يبقي مُتع عقلية ؟! أى إنجاز حتعمله و حيتم الإحتفال بيك .. حتلاقي نفسك حاسس إنه مش كفاية .. خُد نوبل .. إتنين نوبل .. و عليهم ميدالية فيلدز في الرياضيات .. طب كمان ميدالية .. طب حل ال 7 مسائل الأشهر في الرياضيات .. و إغلب ماجنس كارلسن في الشطرنج و حط عليه .. و بعدين إطلع علي ميسي و رونالدو و صلاح و علم عليهم و خد سبع تمن بطولات كاس عالم علي كاس أمم أوروبا .. و بعدين إنزل علي شلتك في القهوة علم عليهم كلهم و إغلبهم عشرة طاولة .. خلصت ؟ إستريحت ؟! مستحيل .. أى إنسان جرب يحقق إنجازات من النوعية دي فعلاً .. بيكون من أكتر الناس اللي عرفوا إن الإجابة مش هنا .. مش في الإنجازات دي . … … طيب … يبقي أكيد السلطة و المال ؟! .. روح أحكم يا باشا .. أقول لك ؟ .. خُد .. إمسك .. معاك حُكم العالم أهه .. سيادتك بقيت رئيس العالم و الكرة الأرضية و العضو المنتدب لكفر الدوار في بلوتو .. إستريحت ؟ غزيت العالم كله و حطيت إسمك جنب إسم الإسكندر الأكبر ؟ .. ( مُتخيل دلوقتي لو اللي عمل كده فعلاً إسمه ” طلعت ” .. طلعت الأكبر 🤣😁😅 ) . … روح إقرا بقي السير الذاتية لكل اللي حكموا دول .. ماحدش فيهم لقي الإجابة هناك . … … أحد الجُمل العبقرية أعتقد اللي سمعتها في حصة إقتصاد في تالتة ثانوي لما درسنا لأول مرة ( هرم ماسلو ) للإحتياجات هي : الهرم فوق آخره خازوق 🤣🤣🤣🤣🤣🤣. … … … عايز تعرف الإجابة إيه ؟! عايز تعرف : الإنسان محتاج من الحياة إيه ؟! .. … الإنسان فعلاً … مش محتاج حاجة من الحياة . … آه والله العظيم .. الإنسان ربنا خلقه .. مش محتاج حاجة خاااااااااااالص من الحياة .. .. إنت مش محتاج أى متع جسدية .. إنت ” عايز ” متع جسدية … إنت يكفيك تاكل لقيمات .. و لكنك بتبقي ” عايز ” تاكل وجبة ماكس كومبو لارج دابل سطافد جوسي من برة كريسبي من جوة . .. إنت مش محتاج أى متع عقلية .. إنت ” عايز ” متع عقلية .. ربنا خلق لك كون كامل مُسخر لك تتأمل فيه و تستمتع بيه و تسبح بحمد ربك .. و لكنك بتبقي ” عايز ” تحس بالإعجاب .. و تحس بالسيطرة .. و تحس بالإنتصار .. و تحس إنك مميز . … … و هي دي الخدعة الكُبري اللي الإنسان بيعيش فيها طول حياته … .. عايش بيدور و بيبذل مجهود في البحث عن ” سراب ” .. و كل الرسائل اللي ربنا أرسلها لنا منذ آدم عليه السلام .. حتي سيدنا محمد صلي الله عليه و سلم .. بتشرح لنا بالتفصيل ده .. بتشرح لنا إنها ( لعب و لهو ) .. بتشرح لنا إنها ( كأنهم يوم يرونها لم يلبثوا إلا عشية أو ضحاها ) بتشرح لنا إنها ( متاع الغرور ) … و لكن الإنسان ( ضعيف , قنوط , جحود , جدول , عجول ,هلوع , جزوع , … ) … … … طيب .. يعني برضو مافهمتش … أكمل سعي و أعافر .. ولا أقف و أغير إتجاهي أدور عالنصيب فحتة تانية .. و لا أعمل إيه بالظبط .. … الإجابة : آمن بالله … آمن يعني : ( خليك عارف .. واثق .. متأكد … مطمأن ) بالله .

• عارف يعني إيه ( الله ) .. و يعني إيه ( إله قادر قوي حكيم له الأسماء الحسني جل جلاله ) . … … السؤال اللي في الصورة ده .. أول ما قرأته .. شفته نفس التساؤل اللي في آيات من سورة الأنعام .. أعتقد إن الآيات دي بتشكل أحد الأعمدة الأساسية جداً في تفكيري و فلسفتي الخاصة .. … بسم الله الرحمن الرحيم : ۞ وَإِذْ قَالَ إِبْرَاهِيمُ لِأَبِيهِ آزَرَ أَتَتَّخِذُ أَصْنَامًا آلِهَةً ۖ إِنِّي أَرَاكَ وَقَوْمَكَ فِي ضَلَالٍ مُّبِينٍ (74) وَكَذَٰلِكَ نُرِي إِبْرَاهِيمَ مَلَكُوتَ السَّمَاوَاتِ وَالْأَرْضِ وَلِيَكُونَ مِنَ الْمُوقِنِينَ (75) فَلَمَّا جَنَّ عَلَيْهِ اللَّيْلُ رَأَىٰ كَوْكَبًا ۖ قَالَ هَٰذَا رَبِّي ۖ فَلَمَّا أَفَلَ قَالَ لَا أُحِبُّ الْآفِلِينَ (76) فَلَمَّا رَأَى الْقَمَرَ بَازِغًا قَالَ هَٰذَا رَبِّي ۖ فَلَمَّا أَفَلَ قَالَ لَئِن لَّمْ يَهْدِنِي رَبِّي لَأَكُونَنَّ مِنَ الْقَوْمِ الضَّالِّينَ (77) فَلَمَّا رَأَى الشَّمْسَ بَازِغَةً قَالَ هَٰذَا رَبِّي هَٰذَا أَكْبَرُ ۖ فَلَمَّا أَفَلَتْ قَالَ يَا قَوْمِ إِنِّي بَرِيءٌ مِّمَّا تُشْرِكُونَ (78) إِنِّي وَجَّهْتُ وَجْهِيَ لِلَّذِي فَطَرَ السَّمَاوَاتِ وَالْأَرْضَ حَنِيفًا ۖ وَمَا أَنَا مِنَ الْمُشْرِكِينَ … … دراستك / كورس بتاخده / هواية بتحاول تتعلمها … كل ده المفروض يكون في سبيل الله وحده .. و تنقي النية دي من أى رغبة في ( تنطيط علي زمايلك , فلوس عشان موبايل تتمنظر بيه , عربية عشان تكروز بيها عالساحل , … ) . في الحالة دي .. حتلاقي البوصلة بتتظبط . … شغلك / إستثماراتك / فلوسك / دولار و جنيه / حصالة بتحوش فيها .. كل ده المفروض في سبيل الله وحده .. . أظبط النية .. البوصلة حتتظبط .. … علاقاتك العاطفية / الأسرية / عالقهوة / في ديسكورد / … كل ده المفروض في سبيل الله وحده .. أظبط النية .. البوصلة حتتظبط .. … … رجاااااااااااااااااء : إفهم يعني إيه ( إله ) و يعني إيه ( قِبلة ) توجه ليها نيتك و عقلك و أفكارك .. قبل ما توجه ليها جسمك و فرشة الصلاة بتاعتك . … … دلوقتي 2023 .. عشرين سنة بعد 2003 .. ماعتقدش إني فاكر أى لعبة من اللي مسحتهم إني ندمت إني مسحتها .. ماعتقدش إني فاكر غير الإحساس الغتت الممل الوحش اللي فضلت حاسس بيه أيامها .. و إني مسحت أحد أغلي ما أملك من مُتع في الوقت ده … بوستات كتير باشوفها يومياً ما معناها ( و يفيد بإيه إن اللي تتمناه ييجي بعد ما تفقد الشغف ) .. البوستات دي بالنسبة ليا عبارة عن ( شيطان متنكر ) .. لأن أى ندم علي أى شيء في الدنيا .. ده من الشيطان فقط .. و لو فكرت شوية فيها حتفهمها لوحدك .. … … الندم الحقيقي .. يكون علي حاجة حقيقية .. علي حقيقة .. علي حق .. و الحق الوحيد .. هو الله . … … و الله أعلم .