إتخيل إني إديتك كتاب كبير .. أوي .. مليان كلام

إتخيل إني إديتك كتاب كبير .. أوي .. مليان كلام و صور و تفاصيل عن حاجات كتير تهمك و لها علاقة بيك و بذكرياتك و أفكارك .. و معلومات كتير عن كل شيء فشغلك و دراستك .. بس الكتاب مش مترتب .. إطلاقاً .. بل ممكن تلاقي فصفحة واحدة معلومات عن أدق تفاصيل تقنية فشغلك .. و تحتها بسطر .. أو حتي فنفس السطر .. ذكري عشوائية من 10 سنين مالهاش أى علاقة بأى بلح فبتنجان فحياتك حالياً أو شغلك أو أى شيء تاني . و الكتاب ده .. مالوش فهرس .. .. يعني لما أطلب منك تدور فيه علي حاجة معينة .. معلومة معينة .. ذكري معينة .. مافيش فهرس يخليك عارف تروح لأنهي صفحة و أنهي فصل بشكل مباشر .. لا .. كل مرة بتحتاج تدور علي أى شيء .. بتحتاج تفر الكتاب بالكامل .. صفحة صفحة . و كل مرة بتعمل ده فيها .. و أثناء ما بتفر الكتاب بالكامل .. عينك بتقع علي حاجات من اللي تهمك في الصفحات دي .. و تقف قدامها شوية .. و تقرا تفاصيلها .. لأنها حاجات .. تهمك . … التشبيه اللي فات ده … صورة بسيطة عن عقلي . و عقل أى إنسان عنده ( ADHD ) . … خلال الفترة اللي فاتت .. أكتر من بوست من اللي كتبتهم إنتشر بشكل فيروسي ( Viral ) .. و ده أدّي إن عدد كبير ( تقريباً 3000 بنى آدم ) عملوا ليا متابعة . و بما إن أغلب بوستاتي اللي باكتبها بيكون متوضح فيها معلومة أو إتنين عن إني ( ADHD ) .. و بما إن ال (ADHD) ده نسبة مش قليلة في البشر إطلاقاً .. و لكنها موجودة عندهم بدرجات .. فطبيعي تعليقات كتير كانت بتسأل و بتطلب إني أشرح عنه .. و كنت بالفعل عملت ده علي مدار السنين اللي فاتت كتير .. و لكني .. زي ما وضحت في التشبيه اللي فوق ده .. بانسي .. فخليني أكتب شوية حاجات فدماغي لها علاقة بموضوع النسيان و الذاكرة و ال ADHD ده بحكم إني شغال عليها خلال الأيام اللي فاتت . … لما باقول إني عندي مشاكل في الذاكرة .. ده مش معناه إني باعاني من ( ألزهايمر ) أو فقدان ذاكرة .. و لكن زي ما وضحت في التشبيه اللي فوق .. قدرتي علي إستعادة الذكريات هي اللي فيها المشكلة . خصوصاً تحت ضغط . .. بنفس التشبيه اللي فوق .. إتخيل لو أنا إديتك الكتاب ده .. و فضلت أزعق لك . .فين المعلومة اللي أنا عايزها .. فين .. فييييييييين !!!! .. متخيل إنت حتعمل إيه ؟! .. أبسط شيء .. حتتنرفز و ترمي الكتاب فوشي .. … و ده بالظبط اللي عقلك ( لو إنت adhd ) إتعود يعمله طول حياتك .. بتكون ( Flustered = متلخبط ) .. بالظبط كإنك قاعد بتفر في صفحات الكتاب و متوتر و خايف . و كل ما تخاف أكتر .. و تتوتر أكتر .. كل ما بتبدأ تشك في نفسك و عينيك أكتر .. … لما بتحاول تفتكر معلومة / ذكري ما .. عقلك بيبدأ يتوه بين مئات و آلاف الذكريات بسرعة خرافية .. و كل واحدة منهم تهمك .. و كل واحدة منهم بتفتكر فجأة إنك كنت بتدور عليها مثلاً من كام يوم و ماكنتش لاقيها .. فبتخاف تنساها تاني .. و بتحاول تفضل فاكرها .. تقوم تطلع تجري تدور علي ورقة و قلم تكتب إسم الأغنية اللي كانت معلقة فذهنك و معذباك بقالك أسبوع .. في حين إنك أساساً قاعد في إجتماع مهم و كنت بتحاول تفتكر معلومة عن الشغل مثلاً !!! . … عايزك تتخيل حياة كاملة بالمنظر ده .. حياة كاملة إتعودت فيها إنك طول الوقت تعتذر و تتأسف .. لأنك ماعندكش أى ثقة في إنك إنت الصح .. لأنك ماعندكش أى ثقة في إن ذكرياتك صح .. ده لو إفتكرتها أساساً في الوقت المناسب .. … كل محادثة عشتها في حياتك .. فوقتها كنت مركز بالعافية علي إنك ماتبوظش الدنيا و تقول حاجات ماينفعش تتقال .. و بعدها بيوم .. أو أسبوع .. أو حتي شهور .. عقلك بيبدأ يفتكر الردود المثالية و المعلومات المثالية اللي كان المفروض تتقال وقتها . … كل معلومة تقنية المفروض إنك شغال بيها يومياً .. طبيعي جداً فجأة و بدون مقدمات .. تلاقي نفسك مش فاكرها إطلاقاً .. حتي لو كنت لسة شغال بيها من ساعة !!! .. و فجأة برضو .. و بدون مقدمات .. حتلاقي نفسك إفتكرتها بكل تفاصيلها .. بس غالباً حتكون بتغني عيد ميلاد سعيد فحفلة مثلاً .. و طريقة غناء حد من اللي في الحفلة هو اللي فكرك بالمعادلة التقنية المعقدة جداً دي 🤣😅!! . … الناس اللي ماتعرفنيش كويس .. أو لسة عارفاني من خلال كام بوست قرأوهم ليا .. و بيستغربوا هي بوستاتي بالمنظر ده ليه ؟! .. إيه علاقة مشهد من مسلسل ؟ بتسلسل أفكار فلسفي معقد ؟! بذكري ليا من طفولتي ؟! بمعلومة تقنية لسة نازلة طازة من كام يوم ؟! . .. ببساطة .. أنا لما باكتب بوست هنا .. بيبقي كإني قطعت صفحة من كتاب عقلي بالظبط .. باوريك عقلي متسجل فيه الحاجات إزاي .. .. يعني .. أنا مش باقعد ساعة أو إتنين بادور علي علاقة بين كل حاجة من الحاجات اللي فوق دي .. والله أبداً .. أنا فعقلي .. الحاجات دي موجودة مع بعضها بنفس المنظر اللي باكتبه هنا .. و في الأغلب .. باكون مسحت من البوست كمية ضخمة من التفاصيل و العلاقات الزيادة .. اللي بابقي متأكد إن ماحدش حيفهمها غيري أنا و إتنين آخرون مثلاً . … عقل الإنسان ال (ADHD) .. لأنه بيسجل الحاجات بشكل عشوائي للغاية زي ما وضحت .. و من أول لحظة في طفولته .. بيتعود بعد كده علي العلاقات الغريبة و العجيبة دي .. فبالتالي .. بيبقي قدرته علي إنه يشوف العلاقات دي .. و يترجمها .. أكبر بكتير جداً من غيره . .. في كتير من اللي عندهم ( ADHD) ده بيسبب لهم حياة كاملة من الوهم و المعاناة .. لأنك بتعيش طول الوقت شايف حاجات ماحدش غيرك شايفها .. … لكن .. لو قضيت فترة طويلة بتدرس و تتعلم عن كل شيء و أى شيء ( وجهت فضولك يعني تجاه إنك تعرف أكتر عن العالم ) .. بتبدأ تفهم شوية إن مش كل اللي إنت شايفه صح .. و مش كله برضو غلط .. و بتبدأ تتعلم إزاي تستخدم القدرة دي .. و ده أحد أسباب إن الناس اللي عندهم (ADHD) قدرتهم علي الإبداع بتتخطي بمراحل و مراحل .. أى إنسان عادي . … الحاجات اللي فوق دي كلها إفتكرتها .. لأني باخلص في تفاصيل كورس بابنيه بقالي فترة .. كورس للناس اللي زيي فقط .. ال (ADHD) . باحاول أشرح فيه إزاي ممكن يتم إستخدام الأدوات التكنولوجية الحالية ( أغلبها ai ) .. عشان يتم عمل فهرسة للكتاب اللي شرحت مثاله في أول البوست ده … و إزاي إن أغلب الإتهامات اللي إنت عشت طول عمرك مصدقها عن نفسك زي :

• إنت كسول .
• إنت لعبي و ماشي بمزاجك و حتضيع نفسك .
• إنت بتقعد تلعب بالساعات و مش عارف تذاكر دقائق .
• إنت اللي مابتركزش و إنت بتذاكر عشان كده مش فاكر .
• إنت بتشوف الرسايل و مابتردش عشان إنت مغرور 🤣 و غيرها من اللي الإتهامات الظريفة دي .. . أغلبها .. معظم الوقت .. بيكون عبارة عن إنك ماسك كتاب .. ضخم .. مليان مالوش فهرس .. و بتفر فيه … من غير ما تكون دي غلطتك من الأساس . … … … و الله أعلم .