من خلال معرفتي الضئيلة جداً .. و السطحية جداً ..

من خلال معرفتي الضئيلة جداً .. و السطحية جداً .. بعالم التيليفزيون و السينيما .. أعرف عن أحد أشهر الأدوات في العالم ده .. و هي : الإضاءة الضعيفة , و فلاتر التنعيم . الهدف منهم هو : إن ( عيوب = ديفوهات ) بشرة الممثل / الممثلة أو ملامحهم الغير رائعة .. ماتبانش بشكل يضايقهم أو يقلل من صورتهم ك نجم / نجمة .. في أذهان الجمهور . . و كل فترة .. لما بلاقي شخص معين .. بدأ ( يلمع ) نجمه بشكل ملحوظ فجأة .. باشفق عليه .. باشفق عليه فعلاً .. لأن .. مهما بدا لك إنه ( خلاص وصل ) .. و نال الشهرة اللي حتخليه سعيد .. إلا إن الحقيقة هي إن الكشاف الضخم .. السبوت لايت القوي جداً .. اللي حيتسنتر = يتركز عليه .. و ينوره من كل الإتجاهات .. حيخلي كل ال ( ديفوهات = العيوب ) اللي فيه تبان و تظهر بوضوح جداً . . و لأن .. أغلب البشر ماعندهمش القدرة علي التمييز الكمي .. بتكون النتيجة هي أحكام تعميمية نهائية . يعني إيه تمييز كمي ده ؟!! .. . يعني لو وريتك ورقة A4 بيضاء .. و سألتك إيه دي ؟! .. حترد عليا و تقول لي ورقة A4 بيضاء .. تمام .. لكن لو حطيت فيها خط صغنن بالأسود فوق .. و سألتك إيه دي ؟! .. حترد و تقول لي .. ورقة A4 فيها خط أسود .. . يعني .. مقابل الإختلاف البسيط اللي عينيك شافته .. حكمك تجاهل أغلب التكوين ( اللي هو بياض الورقة ) . . و في الأفراد .. بنستخدم نفس الطريقة بالظبط .. . مثلاً شيخ الجامع اللي حافظ قرآن و معروف عنه كل خير .. مش مسموح له يتعرف عنه أى شيء مش علي مزاج الأغلبية ( حتي لو كان صح بس مُختلف عليه ) . . و العكس بالمناسبة بيكون صحيح دايماً برضو .. . اللي هو المغني اللي دايماً داير ورا الرقاصات .. لو شفته بيصلي فجامع أو بيقرأ قرآن … مش حتشوف غير مصايبه اللي ملياه .. و حتحكم عليه بالنفاق … مهارة إنك تتعامل بقي الضوء المبهر اللي بيغمرك أثناء الشهرة دي .. مش مهارة بسيطة إطلاقاً .. بالعكس … في ناس ذكية جداً .. بتفهم بدري إنه مش من مصلحتها إطلاقاً إن الضوء يتوجه عليها .. . و في ناس أقل ذكاء .. و بيقبلوا بإنهم يكونوا تحت الضوء و يلفتوا الإنتباه .. مقابل تمن رخيص جداً بيحصلوا عليه من الشهرة دي .. و لكنهم رضوا بالتمن . و في ناس أقل و أقل ذكاء .. بيفضلوا طول عمرهم بيجروا ورا الضوء ده نفسهم يحصلوا علي أى جزء ضئيل منه .. . و في ناس أقوياء جداً .. مهما الضوء إتوجه عليها .. مش بتجري منه .. ولا تجري وراه .. و لكنهم بيعكسوا الضوء ده .. و يستخدموه .. و يوجهوه ناحية حاجات أهم .. حاجات الناس محتاجة تشوفها .. . و في ناس تعيسة جداً .. بتدمن الضوء و تخاف تفقده .. فتبدأ تدفع من حاجات غالية أوي .. مقابل إنها تفضل تحته … . . و في نوعية تانية خالص من البشر .. أى حاوي بيشتغل في خفة اليد و خداع البشر .. بيكرههم أوي .. لأن .. لما الحاوي اللي واقف عالمسرح بيقول للناس بص العصفورة هناك و يشاور بعيد .. النوعية التانية دي بتركز ضوء إنتباهها و تركيزها فكل الحتت التانية اللي الحاوي ماشاورش عليها .. بتركز عشان تشوف اللي بيحصل ورا الكواليس … و الله أعلم .