عمرك سألت نفسك : هو حل فزّورة جحا و إبنه

عمرك سألت نفسك : هو حل فزّورة جحا و إبنه و الحمار .. كان إيه ؟! … الأول خليني أحكي لك الفزّورة .. جحا كان رايح الهايبر يجيب شوية طلبات بقالة .. و كبسولات إسبريسو عشان الكوفي ماشين كانت فاضية … قال ياخد إبنه معاه .. و طلّع الحٌمار من الجراج . و هو معدّي من قٌدّام الريست عند البنزينة .. شوية شباب قاعدين بيسكرولوا علي موبايلاتهم شافوه .. راح كل واحد منهم بسرعة مطلّع موبايله و فاتح لايف و بدأ يشيّر المنظر .. و هو بيقول :

• شايفين جحا القاسي الجاحد ؟! .. شايفين جحا اللي كل شوية يطلع في فيديوهات يشرح عن التربية الحديثة و الأخلاق ؟! .. شايفين جحا اللي كان متضايق إن فستان الفنانة المشهورة كان قُصيّر و فاضح ؟! .. قٌدّام عينيكم أهه .. بالفيديو و بالإثبات .. جحا راكب الحمار .. و إبنه .. إبنه الصغير المسكين .. ماشي علي رجليه .. فين التضحية ؟! .. فين الرجولة ؟! .. فين الأبوّة ؟! . . و التعليقات نزلت بالمئات تشتم في قسوة جحا .. و الفيديو بقي تريند .. و ناس من معارف جحا بعتوا له لينك الفيديو .. و شاف نفسه طالع مسرح و متشيّر له في كل صفحات التريندات .. . ف قرر ياخد أكشن بسرعة .. و فعلاً .. نزل جحا من عالحمار .. و ركّب إبنه مكانه .. و إتصور معاه سيلفي .. و إتخيل إنه ب كده خلاص .. قفل التريند . … إلا إن .. إلا إن واحد من الشباب اللي كان قاعد بيحتسي فرابتشينو إكسترا صوص بستاشيو علي كافيه الريست .. أخد المكنة ( الموتوسيكل يعني ) بتاعته .. و طلع يسوق جنب جحا .. و راح مصور المنظر لايف .. و هو بيقول : عشان تشهدوا يا ناس أهه .. بالصوت و بالصورة الفضيحة العلنية .. جحا .. جحا اللي كل بوستاته و فيديوهاته بيتكلم فيها عن إحترام الأب .. و هيبة الأب .. و بر الوالدين … إبنه الشاب القوي اللي ممكن يفضل 7 ساعات يلعب كورة من غير ما يتعب .. راكب فوق الحمار و مدلدل رجليه .. و مخلّي أبوه ماشي في الحر ده .. و تعبان .. و مش بس كده .. لاااااااااااا .. ده إبنه كمان ماسك الموبايل و قاعد بيتصور سيلفي و ينزّل صورته .. فين أيام زمان ؟! .. فين أيام زمان لما كان الواحد مننا لو سمع صوت أبوه بيتنحنح علي أول الشارع .. كان يحفر ل نفسه حفرة و يردم علي نفسه من خوف و هيبة الأب .. فين أيام زمان ؟! .. لما أبويا ف مرّة شاف ضلّي نايم علي الأرض .. زعّق فيا .. و من يومها ضلّي دايماً واقف جنبي ضد قوانين الفيزياء و الكون .. … الفيديو بسرعة جداً بقي تريند برضو .. و كل زمايل إبن جحا بعتوا له بسرعة يسألوه علي الطريقة اللي قدر يسيطر بيها علي أبوه .. و كل الفضائيات بقت بتتسابق علي نشر فيديو ( الطفل اللي ذل أبوه ) .. بل إن في دعاوي قضائية بدأت تترفع عشان منظر إبن جحا و هو راكب .. و أبوه ماشي .. منافي ل قيم المجتمع و قوانين الفيفا . . جحا بسرعة جداً راح منزّل إبنه من عالحمار .. و راح مطلّع موبايله .. و منزل فيديو بيوضح فيه إنه هو و إبنه ماشيين جنب الحمار .. و ماحدش راكب الحمار خالص .. و إن الفيديو اللي إتنشر كان ( ذكاء إصطناعي ) .. … و فجأة .. فيديو جحا ده .. إنتشر عليه كمية ضخمة من إيموجي ال هاها ( 😆 ) .. و كل الناس في التعليقات بتكتب له : إنت عبيط ؟! آدي أخرة مٌحدثين النعمة .. إنت ماحدش علمك إزاي تركب حمار ؟! إنت يبقي عندك حمار .. فبريكة موديل السنة .. و تسيبه فاضي .. و تمشي إنت جنبه علي رجلك ؟! أصلك مش مقدّر النعمة اللي معاك .. تلاقي أمك اللي جايباهالك .. الحمار ده عشان تركبه و تريح نفسك من تعب المشي .. ده ربنا بنفسه قال كده في سورة النحل .. إنت ملحد ياض ؟! … جحا راح منزّل فيديو بعده علطول .. و هو راكب هو و إبنه فوق ضهر الحمار .. و راح كاتب تحته : أتمني تكونوا إستمتعتوا معانا بالبوست السابق .. ده كان كدبة إبريل .. طبعاً إحنا مش حنمشي جنب الحمار و الحمار ضهره فاضي .. مين العبيط اللي يعمل كده .. .. و راح عامل تيكتوك هو و إبنه فوق الحمار و هما بيخمسّوا بيه .. .. و فجأة .. إيموجي أغضبني ( 😡 ) !! .. أصبح هو المٌسيطر علي الريأكشن علي الفيديو .. و التعليقات السلبية إنهالت بالمئات .. بل بالآلاف :
• يا ظلمااااااااااه ..
• الحمار ده مش مخلوق زيه زيكم ؟!
• جمعية حقوق الحمير مش حتسيبكوا في حالكوا .. و حتسجنكوا ..
• ده في ست دخلت النار في قطة .. و راجل دخل الجنّة في كلب … إنت ملحد ياض ؟!
• هي دي التربية الحديثة ؟! .. تعلّم إبنك يستقوي علي الحمار ؟!
• هي دي هيبة الأب ؟! .. بإنك تخليه يخاف لما يشوف بتستقوي علي الحمار ؟! … و عند النقطة دي .. بينزل جحا و إبنه من عالحمار .. و يقف مكانه .. و يتسائل !!! طب إيه الحل ؟! .. و فجأة السمّاعات الصاب اللي جحا كان مركبها فضهر الحمار .. بتفتح إعلان إنستاجرام بأعلي صوت ( بما إن إنستاجرام بيسمع اللي بتتكلم فيه و يجيب لك إعلانات عنه ) .. و بيقول مع موسيقي رخيصة : بتسأل إيه الحل ؟! عايز تعمل اللي علي مزاجك من غير ما تقلق بكلام الناس ؟! عايز تركب الحمار ؟! .. تمشي جنب الحمار ؟! .. أو حتي الحمار هو اللي يركب فوق نافوخك ؟! .. و ماحدش يقدر يفتح بٌقّه ؟! .. . الحل بسيط و سريع .. الللللللللبررررررررررررررنسسسسسسسس .. البرنسسسس .. برنامج من 26 خطوة .. حيحل كل مشاكلك .. البرنسسسس .. برنامج من 26 خطوة .. حيخليك تعمل كل مشاويرك .. من غير ما حد يصورك فيديو و يعمل منك تريند . البرنسسسس .. برنامج تم تجربته بنجاح في العديد من المدن و الدول و الإمبراطوريات .. البرنسسسس .. مستورد من فلورنس حصرياً و تقدر تقتنيه دلوقتي في عرض خاص بمناسبة الكريسماس و رأس السنة . البرنسسسس .. من مجموعة ( نيكولو ماكيالفيللي ) .. إقتنيه الآن .. البرنسسسس .. سر الرجل المعاصر ل حياة زوجية سعيدة .. … و بسرعة جداً .. و بسبب الحالة الصعبة اللي واقف فيها جحا و إبنه و الحمار .. بيطلع جحا موبايله و بيحاسب ب أبل باي … و بيشتري ( البرنس ) .. . و فجأة .. شاشة الموبايل بتضلّم .. و بتبقي سودة بالكامل .. و صوت عالي بيطلع منه و يقول : it’s better to be feared than loved, if you cannot be both, for love is conditional , and fear is … reliable . . جحا بيبص لإبنه و هو مش فاهم حاجة .. و بعدين يبص للحمار .. يحس إن الحمار فاهم .. و بعدين بيغير إعدادات اللغة .. و يغير من الإنجليش .. لل ( حلمنتيشي ) .. و يعيد تشغيل البرنامج .. . ف مرّة تانية شاشة الموبايل بتضلّم .. و بتبقي سودة بالكامل .. و صوت عالي بيطلع منه و بيقول : المحبّة عقد إيجار .. و شروطه ف إيد الناس .. حتدفّع اللي علي مزاجهم الشهر ده .. حتسكن .. لكن لو جيت تدفع نفس التمن الشهر الجاي .. و الناس مزاجها كان إتغيّر .. يبقي حتترمي في الشارع .. لكن الخوف .. تمليك .. حتدفع مرّة واحدة بس تمن كبير .. لكن بعده .. حتسكن .. و تورّث .. و تفرش قٌدّام البيت كمان و تعلّي مٌخالف .. و ولا حد حيتكلم معاك نص كلمة . … جحا بيبص لإبنه .. و بعدين يبص للحمار .. و قبل ما يضغط علي الدرس اللي بعده عشان يعرف بالظبط .. مين هو البرنس .. و مين هو نيكولو ماكيافيللي .. بيلاقي جه له نوتيفيكيشن .. ظهرت له فوق ال( gps ) في الشاشة التيسلا اللي مركبّها علي ضهر الحمار .. بتقول له إنه وراه مواعيد .. و إن البوست طوّل .. و إنه يكمّل بعدين .. … … و الله أعلم .