من كام يوم .. هزمني الحنين 🤣 .. و نزّلت

من كام يوم .. هزمني الحنين 🤣 .. و نزّلت تاني أحد أكثر الألعاب اللي أدمنتها و عشت جواها سنين طويلة حرفياً .. ( Command & Conquer Generals Zero Hour ) .. اللعبة دي أنا فضلت ألعبها يومياً لمدة 5 سنين تقريباً .. من 2006 ل 2011 .. قبل ما أدمن ( League of Legends ) .. .. و كنت بافكّر فعلاً أستريم كام يوم في رمضان و أنا بالعبها أونلاين .. و أشرح ليه هي بتشكّل جزء ضخم من فهمي عن إستراتيجيات الحياة عموماً و البيزنس خصوصاً . و غالباً فعلاً ممكن أعمل ده قريباً إن شاء الله .. … لو ماتعرفش اللعبة عبارة عن إيه … ف هي ببساطة إنك بتتحكّم في جيش .. و بتلعب ضد صديقك اللي بيتحكّم في جيش آخر .. و ممكن يزيد عدد اللاعبين لحد ( 8 ) يقدروا يلعبوا ضد بعض .. . و بتبني جيشك من البداااااااااية خاااااااااااالص .. و بتحسب ميزانية كل شيء , و إستهلاك الموارد , و سيطرتك علي الخريطة , و الخطر المٌحتمل , و تكتيكات و إستراتيجيات الدفاع و الهجوم .. . و بتبدأ تهاجم و تدافع … و اللي بيفوز .. هو اللي بيدمّر جيوش الأعداء و يفضل واقف لحد آخر لحظة .. … واحد من أهم مبادئ اللعبة دي .. و هو إنك لما بتتعلم اللعبة .. بتبدأ تركّز جداً علي البناء .. البناء أوي .. البناء جداً .. مطارات و مصانع و أسواق .. و تفضل تبني دفاعات حوالين اللي بنيته .. و تبقي فرحان بشكل جيشك و هو مٌحتل الرقعة المسموحة لك من الخريطة .. . لحد ما تلاقي واحد فاهم اللعبة فعلاً .. كل اللي عمله من أول لحظة .. إنه بدأ يهاجم بأول دبابة طلعها مثلاً .. ف بدأ ياخد جوايز مقابل إنه هجم بدبابة يتيمة علي بلدوزر مسكين في جيش اللي جنبه من أول ثانية .. و بعدين بيحتل رقعة أكبر .. و بعدين يهاجم أكتر ب شوية عساكر لسة طالعين طازة .. و هكذا و هكذا .. .. عند مرحلة معينة .. بيتلاقي الجيشين دول .. جيش اللي فضل يبني أسواق من أول الجيم .. و أصبح عنده مئات الآلاف في بنكه … و فرحان بفلوسه و أسواقه و مستني يرستأ أموره عشان يبدأ بقي ينتج دباباته و طياراته و … . و جيش اللي تقريباً ماعندوش غير كام ألف في حسابه .. و لكن كل فلوسه عبارة عن دبابات و طيارات و عساكر متنطورة فكل مكان في الخريطة .. و واخد جوايز كتير بسبب إنه هزم و ضرب جيوش تانية .. .. و لما بيتلاقوا .. بتتعلّم .. بتتعلّم بدري أوي أوي أوي .. إن عسكري واحد فقط .. ممكن يدمر عشر أسواق ..خصوصاً لو كنت صرفت كل فلوسك علي الأسواق .. و مابنيتش عساكر ولا أسلحة .. و إن .. عاجلاً أم آجلاً .. قانون اللعبة هو ال : هجوم .. … أنا و بلا فخر كنت السبب إني كرّهت إصحابي ( اللي علموني اللعبة دي ) فيها 🤣🤣🤣🤣 .. و جيشي المٌفضّل كان ( Toxin ) 😁 و لكن لهذا قصة أخري أحكيها لاحقاً إن شاء الله .. … و الله أعلم .