المساواة في الظلم ... عدل ؟!!!!

المساواة في الظلم … عدل ؟!!!! … في (تجربة- لعبة) إجتماعية مشهورة جداً .. تقدر تمارسها بأبسط المقادير في الشارع تحت بيتكم .. إنزل وقّف أى إتنين ماشيين مايعرفوش بعض .. و بعدين و هما واقفين قٌدامك .. إشرح لهم إنك عايز تدّي لهم هدايا .. بس بشرط . إيه هو الشرط ؟! إنك حتدّي للأول 10 جنيه .. بس بشرط إنه يقبل إنك تدّي للتاني ألف جنيه . بس كده 😅 .. و شد كُرسي و إتفرّج عالخناقة . … علي مدار الأيام اللي فاتت .. شُفت بوستات كتير .. أوي .. عن الإستياء من اللي بتعمله بعض شركات السياحة .. في إستخدام إسم ( داعية مشهور , إنفلونسر مشهور , أى حد شكله طيب و إبن حلال و الناس بتحبّه 😅 .. زي عصام عمر قبل ما يتشبحن مثلاً 🤣 ) .. و يعلنوا عن رحلة حج أو عمره .. بصُحبة الشخص ده . .. و إزاااااااااااااااااي ؟!! الحج المقدّس ؟! … العمرة المقدسّة ؟؟!! .. الشعائر المٌقدسّة ؟!!! يتم إستخدامها بشكل تجاري رخيص بالمنظر ده ؟! .. و إزااااااااااااااي ؟!! وصل الأمر ب الناس اللي صدقناهم .. و سمعناهم بيقولوا ( قال الله و قال الرسول ) .. و هما شبهنا و مننا .. يقبلوا علي نفسهم حاجة بالمنظر ده . … بالظبط كده .. عيد قراءة الجملة اللي فاتت دي لو سمحت .. و أقف عند جزء ( شبهنا و مننا ) . … في التجربة اللي شرحت لك إزاي تعملها فأول البوست .. نسبة إن الطرف الأولاني ( اللي إنت بتخليه مٌتحكّم ) يرفض .. نسبة ضخمة جداً .. اللي هو بيبقي لسان حاله : لاااااااااااااااااااا … يا نعيش عيشة فٌل .. يا نموت إحنا الكل 🤣 . . و بالرغم من إنه خسران .. و مابياخدش أى حاجة خالص .. إلا إنه بيفضّل ده .. و يوافق عليه .. طالما شايف إن ماحدش حياخد أكتر منه .. و حيشوف الكل قاعدين خسرانين جنبه . … و لكن .. النسبة دي بتتغير بشكل كبييييييييييير جداً … علي حسب حاجتين مهمين جداً جداً … و هما : 1- إنت بتعملها في مجتمع عامل إزاي . 2- إيه نوع الهدايا اللي بتقدمها . … يعني إيه ؟! … يعني .. تعالي نطلع في مجتمع مستوي الرفاهية المادية فيه عالي أوي .. و الناس هناك مثلاً بتصرف في إزازة المياه العادية 200 جنيه بدون أى مشكلة .. و بيسيبوا 50 جنيه فوقهم كمان بقشيش للولد اللي فتح لهم التلاجة و جاب لهم الإزازة 🤣 . و جرّب تعمل التجربة هناك .. و تخلي الهدايا فعلاً ( فلوس ) .. بنسبة كبيرة أوي .. حتلاقي إن النتائج مُعاكسة .. يعني ؟! .. يعني حتلاقي إن الطرف الأولاني .. حتي لو إنت عرضت عليه 10 جنيه بس .. حيوافق إن الطرف التاني ياخد 1000 جنيه .. و يبقي بيس و كوول يا مان .. و قشطة .. و تعالي بالليل نسهر و نطلع سافاري كمان 🤣 . ليه ؟! لأن الهدية اللي إنت قدمتها له .. بالنسبة له .. مش هدية .. و تقريباً .. عمره في يوم ما حس بالحرمان منها .. أو الخوف من فقدانها . … لكن .. في نفس المجتمع ده .. قدم هدايا من نوع مختلف .. و حتلاقي إن النتيجة المُعتادة .. بتكون برضو إن الطرف الأول بيرفض إن أى حد ياخد أى حاجة . .. هدايا إيه بقي اللي أقصدها ( غير الفلوس يعني ) في مجتمع بالمنظر ده ؟!

• ( وظائف سيادية - نفوذ و سلطة ) .. يعني إعرض عالأول إنه يشتغل في سفارة موزنبيق مثلاً .. مقابل إن التاني إنه يشتغل في سفارة فرنسا 🤣.

• وجاهة إجتماعية … يعني إعرض عالأول إنه يتجوز بنت سفير موزنبيق مثلاً .. مقابل إن التاني يتجوز بنت سفير فرنسا 🤣 .

• أو حتي صورة من صور القيمة بإعتباراتهم … يعني … إعرض عالأول إنه يتكرم من سفارة موزنبيق مثلاً .. مقابل إن التاني يتكرم من سفارة فرنسا 🤣 … و طبعاً .. تقدر هنا تتخيل … لو المجتمع اللي إنت حتجرّب فيه التجربة دي بقي … مجتمع بيفاصل علي تذكرة الأوتوبيس إنها ب جنيه و نصف .. مش إتنين جنيه 🥲 . … في الحالة دي .. لأن الإحتياجات الاساسية نفسها بتبقي تحدي ضخم .. و معاناة … ف بتكون الفلوس سهل جداً إنها توضح نتائج التجربة بشكل مباشر . … و أحد أهم و أشهر ال ( Variants = الأنواع المختلفة يعني ) من التجربة دي .. لما بيكون الشخصين عارفين بعض .. يعني لو جبت إتنين ( مش أصدقاء ) .. و لكن يعرفوا بعض … .. نسبة نتيجة إن الطرف الأولاني يرفض .. بتتحول من 50% علي أقل تقديرات .. لأعلي من 80% … ليه ؟! لأن الطرف الأولاني في أغلب الوقت عقله بيرفض بكل الأشكال إن الشخص اللي هو يعرفه كويس .. يتميز عليه . … و ده يفسّر لك بشكل واضح جداً جداً جداً .. ليه فمجتمعات صغيرة ضيقة ( زي الفلاحين و القري ) .. التجربة دي بتظهر بوضوح فظيع .. و ده لأن القري و الفلاحين .. تقريباً القرية كلها عارفة بعضها .. و كلهم بيبقوا عايزين يحسوا إنهم عايشين فنفس الحالة بالظبط .. . و لأن .. بطبيعة حال المجتمع ( المصري أو الهندي أو الباكستاني مثلاً .. أو ما شابه من دول العالم اللي إقتصادها بعافية شوية ) … بتكون القري هي أكتر مكان فيه نسبة معاناة إقتصادية عالية … و رفاهيات قٌليلة .. . ف بتلاقي إن : ( النفسنة ) .. هي المٌسيطرة .. … كل الكلام اللي فوق ده .. جه فبالي علي مدار اليومين اللي فاتوا زي ما شرحت لما شفت كمية البوستات اللي بتهاجم ( أمير منير , أبو زيد , … و غيرهم من اللي شبههم ) . .. لاحظ هنا كلمة ( شبههم ) دي .. يعني إيه ؟! .. يعني .. الناس كانت شايفه كريستيانو رونالدو .. و قبله نجوم كورة كتير .. عايشين كل رفاهيات الحياة لعشرات السنين .. و قشطة و عادي و نحبهم و نلبس تيشيرتاتهم و نعلق صورهم عالحيطان .. و طبعاً كان في كلام علي ( شوف هما معاهم فلوس قد إيه ؟! ) … و لكن الكلام ده كان نسبة قليلة جداً . . و لكن .. بمجرد ما الناس شافت واحد ( شبههم ) .. زي محمد صلاح .. بيعيش الحياة دي . كل صرخات ال ( لاااااااااااااااااااااااااااااااا ) … ظهرت بقوة و ضوح . اللي هو ( طالما أنا ماخدتش .. يبقي هو ماياخدش ) .. أو ( طالما أنا مش باخد كتير .. يبقي هو ماياخدش حاجة .. و نعيش كلنا زي بعض زي زمان ) . … … ف نفس الموضوع ده بيظهر بقوة برضو .. لما بيكون في أى وجه تشابه بينك و بين الشخص اللي بتشوفه بيتميز قٌدّامك . … يعني .. مش لازم يبقي إبن منطقتك .. إطلاقاً .. و لا بيتكلم نفس لغتك .. لكن ممكن يكون متخصص فنفس المجال العلمي بتاعك مثلاً .. و نفس سنّك .. و عايش في الناحية التانية من الكرة الأرضية .. ساعتها حتحس إنك ( بتنفسن ) عليه .. لو هو خد منحة .. و إنت لا .. أو لو هو خد منحة أحسن بكتير من اللي معروضة عليك . … ف .. ليه بقي موضوع ( الحج و العمرة ) ده بالذات عامل مشكلة ؟! … لأن .. الدين .. شيء مشترك مع الجميع .. كلنا مسلمين ( اللي متضايقين من الموضوع ده يعني ) .. كلنا حافظين الفاتحة بفضل الله .. و بنعرف نصلّي و ندعي .. و بنصوم كمان . كتيييييييييير بيعرف يرتّل القرآن أفضل من أمير منير .. كتييييييييييييير بيعرف يفتي أحسن منه .. كتييييييييييييييييير بيعرف يتكلم بالدين ( و قال الله و قال الرسول ) بطلاقة و بلاغة أكثر منه .. . و لكن .. و لكننا مش كلنا عندنا ملايين بيتابعونا .. مش كلنا بيتعرض علينا فلوس من شركات سبونسر .. مش كلنا بيتعرض علينا نطلع رحلات حج و عمرة .. مقابل إن صورتنا اللي ماحدش يعرفها تنزل بوست . … … أنا تقريباً عمري ما سمعت عن ( باشمهندس أحمد أبو زيد ) .. إلا بعد الأزمة اللي حصلت له .. و عمري ما كنت شفت له أى فيديو قبلها .. .. و تقريباً عمري ما كنت سمعت أكثر من دقيقتين متفرقين علي مدار السنين اللي فاتت مثلاً .. ل ( د أمير منير ) .. حاجات متفرقة كانت بتظهر قدامي صدفة . .. أغلب المحتوي المصري و العربي مابيظهرش عندي إطلاقاً علي السوشيال ميديا بتاعتي ( يوتيوب , فيس , إنستا , تيكتوك , … ) .. و ده بسبب حياتي من زمااااااااااااااااااان أوي .. .. فبالتالي .. عمري ما كنت حاحكم علي الأشخاص دول ( بالسلب أو بالإيجاب ) … من خلال بوستات متفرقة شفتها مكتوبة عنهم بتظهر قدامي . … لكن .. لما الموضوع ده ظهر قدامي بشكل متكرر .. لدرجة إني لقيت إني عايز أفهم أكتر .. لأول مرة .. إتفرجت علي محتوي ل ( أحمد أبو زيد ) .. و أول حاجة شفتها له .. بودكاست أربع ساعات .. غااااااااااااااااااااااااااااااية في الروعة … مع ( هشام عفيفي ) .. .. و بعدين .. شفت له بودكاست تاني إمبارح .. 3 ساعات و نصف … مع د أمير منير و قسماً بالله .. أنا سعيد و فرحان .. سعيد و فرحان إن الناس دول .. عندهم منصات بيتابعها ملايين .. لأن الكلام اللي هما بيقولوه .. ( بالنسبة ليا ) .. كلام لا يسع الإنسان جهله .. ( لاحظ هنا إني ماقولتش الإنسان المسلم … لااااااا ) .. .. قسماً بالله .. أى إنسان عموماً .. مسلم أو غير مسلم .. محتاج يسمع الكلام اللي إتقال في الإتنين بودكاست دول .. أو عالأقل يفهم نفس المعاني المشابهة من أى مصدر تاني . .. و في بودكاست د أمير منير بالذات … نقطة تجارة الدين .. و التجارة بالدين .. تم الكلام فيها بشكل وااااااااافي جداً .. بحيث إني مش محتاج أعيد صياغتها هنا بأسلوبي الحلمنتيشي .. و لكن .. إن كان عندك شيء في نفسك في هذا الأمر … أنصحك تتفرج عالبودكاست . … … النهاردة الصبح .. واقف في المطبخ باعمل قهوة بالزعفران مع معلقة كاكاو 😅 .. و مشغل تيك توك كالمعتاد .. عشان يظهر قدامي خبر عن : ” ملياردير برازيلي .. ثروته تٌقدّر ب 2 مليار دولار تقريباً … قرر إنه يكتب ( نيمار ) .. الوريث الوحيد له 🤣🤣🤣 ” . . هو مافيش بينه و بين نيمار أى صلة قرابة .. ولا حتي صداقة .. ولا حتي قابله صدفة في صالة رجال الأعمال في المطار مثلاً و خد معاه سيلفي و مابينزلوش في السوشيال ميديا عشان هو مابيحبش يعمل كده 😎😎 .. . و لكن .. هو بيحب نيمار .. و بيحب طريقة لعبه .. و ماعندوش أى عيال مخلفهم .. أو أى قريب له يورّثه .. فقرر .. يورّث نيمار كل ثروته . 🤣🤣🤣 … أى حد لعب معايا كورة .. عارف مهاراتي الفظيعة المُريعة 🤣🤣.. عارف إني لولا مشغول شوية .. كنت رحت و نافست عالبالون دور و كسّبتنا إتنين كاس عالم 🤣🤣🤣.. و ناس كتير من اللي لعبوا معايا .. قالوا لي ده إنت نيمار .. باصي يا نيماااااااااااااار .. شوط يا نيمااااااااااااااااااااااار .. الجون بتاعنا الناحية التانية و مش ده يا نيماااااااااااااااااااااااااااااااار 🤣🤣 … بس هما كانوا بينطقوا نيمار غلط ( مايعرفوش برازيلي معلش ) .. و بدل النون و الياء .. كانوا بينطقوهم ( حاء ) ..🤣😁🤣😁 … و الله أعلم .

***** محلوظة رقم (1 ) : في كلام كتير جداً كنت عايز أكتبه عن ما يقوله الدين و الشرع في إصلاح النفس البشرية في هذا الأمر .. و ( حب لأخيك ما تحب ل نفسك ) .. و كل الكلام ده .. لكن أغلب الكلام ده مذكور في بودكاست د أمير منير زي ما شرحت .. بشكل أفضل من لو كتبته . … ***** ملحوظة رقم ( 2) : في تعليقات و رسائل كتير جداً علي البوستات السابقة عايز أرد عليها إن شاء الله كلها .. أنا مش متجاهل أى تعليق أو رسالة.. و لكني فعلاً مشغول جداً .. و مش دايماً بالاقي وقت أقعد و أرد علي كل تعليق أو رسالة كما ينبغي .. ف بتأخر في ذلك .. إعتذاري لهم جميعاً علي التأخير .