دروس سريعة مُختصرة مش محتاجة شرح كتير و بوستات طويلة

دروس سريعة مُختصرة مش محتاجة شرح كتير و بوستات طويلة ( Canned Wisdom ) 🤣 . … 1- ماتؤردرش و إنت جعان . 2- ماتوعدش و إنت فرحان . 3- ماتهددش و إنت غضبان . 4- من جد وجد .. بس مش لازم ح يجد اللي هو متوقعه … و مش لازم حيجده مباشرة .. أو حتي في حياته نفسها .. اللي هو إنت ممكن جداً تفحت نفسك جد طول حياتك .. و تموت من غير ما تجد حاجة في الدنيا .. بس ح تجد في الآخرة إن شاء الله .. و الناس ح تجد ثمرة مجهودك ده بعدك . . 5- ماتؤردرش و إنت جعان .. و لو لازم .. خلّي حد شبعان يؤردر لك . . 6- لما تصب ل نفسك كبّاية شاي .. كل ما حتملاها أكتر عن حد مُعين .. كل ما حتمشي خايف تكب منها أكتر .. و تمشي أبطأ .. و عينيك مش حتشوف غيرها و حتفضل متعلقة بيها . لكن لو سبت فيها جزء فاضي كفاية .. حتمشي بثقة .. و بسرعة .. و حتقدر تبص حواليك و تتفرج عالحياة و إنت مش قلقان . . 7- حاجات زي ( الألم , القلق , الخوف , التعب , الزعل , … ) و غيرها .. دي نتائج الإبتلائات اللي في الدنيا .. و لو بدل ما شلت السنة .. كنت طلعت الأول . و لو بدل ما الشغلانة باظت و فلست .. كانت نجحت و بقيت مليونير . و لو بدل الإصابة اللي مضايقاك .. كنت بترمح في الملاعب ولا كريستيانو في عزّه .. برضو كان حيبقي في حاجة غيرها تخليك تشوف نفس المقدار من : ( الألم , القلق , الخوف , التعب , الزعل , … ) أول آيات سورة العنكبوت : الٓمٓ (1) أَحَسِبَ ٱلنَّاسُ أَن يُتۡرَكُوٓاْ أَن يَقُولُوٓاْ ءَامَنَّا وَهُمۡ لَا يُفۡتَنُونَ (2) . . 8- ماتؤردرش و إنت جعان .. و لو مش لاقي حد يؤردر لك .. إكتب الأوردر بتاعك في ورقة .. و بعدين أطلب نصّه مش أكتر من كده . . 9- زمااااااااان .. العبيد كانوا ممنوع يتعلموا .. و عشان كده كان لازم ( يتفحتوا ) شغل ليل نهار لحد ما يتم التأكد إن مافيش أى طاقة فاضلة يقدروا يتعلموا بيها … حتي لو حيتم إجبارك إنك تحفر حفرة و تردمها تاني .. لما أصبح مافيش شغل يتعمل خلاص ( لأن المكن بقي يعمل الشغل أحسن من العبيد ) .. تم إيجاد بدائل تانية كتييييييييير جداً عشان يتصرف فيها الوقت و الطاقة اللي عندك .. ف حاول تسأل نفسك كل يوم بالليل قبل ما تنام … إتعلمت حاجة جديدة النهاردة ؟! . و لو في يوم حسّيت بينك و بين نفسك إنك ( خلاص وصلت .. و إتعلمت كل حاجة و عرفت كل حاجة و مش محتاج تتعلم حاجة جديدة ) .. يبقي إعرف إنك إتعلّم عليك .. ( العبيد زمان كانوا بيعلموا عليهم ب حرق علامات في جسمهم أو بالوشوم 😅🤣 ) . . 10 - ماتؤردرش و إنت جعان .