سمعت قبل كده عن "بطرمان باندورا "🤣😅؟! ( الجزء الأول

سمعت قبل كده عن “بطرمان باندورا ”🤣😅؟! ( الجزء الأول - غالباً ) . … القصة مشهورة أوي في ال ” ميثولوجيا الإغريقية = الفولكلور الشعبي القديم الإغريقي يعني ” .. إيه هي القصة ؟! .. زمااااااااااااااااااان .. و بعد ما الواد الصايع اللي قلبه ميّت اللي إسمه ” بروميثيوس ” سرق سر النار من الآلهة الإغريق .. و إداها للبشر .. و البشر بقوا بيستخدموا النار براحتهم عشان يعملوا عروض فاير علي أنغام موسيقي ( فيفتي سينت ) في حفلات الزفاف 🤣🤣 . و بعد ما الآلهة عاقبت بروميثيوس بإنهم علّقوه بين جبلين عشان الطيور تفضل تاكل من أعضاءه ولامؤاخذة ( كبده يا قليل الأدب 🤣) . .. الآلهة ( و علي رأسهم زيوس - الكبير بتاعهم .. و أبو هركليز اللي جه غلطة من ليلة ضعف و نزوة مع واحدة مش مراته 😅 ) .. كان لسة متنرفز و حاسس إنه إتعلّم عليه .. إن لسة هيبته مشروخة .. فقرر يعاقب البشرية كلها .. يعمل إيه ؟! . … راح جايب واحدة مُزّة مافيهاش غلطة .. و كلها إمكانيات 🤣 .. إسمها ( باندورا = الإسم نفسه معناه كده .. اللي هو معناه All gifted .. أو اللي عندها كل الإمكانيات يعني 🤣 ) .. و لبّسها طقم التايجر .. و نزّلها البلد و هي معاها بطرمان مقفول . .. اللي حيعمل نفسه مُثقف و يقول ( لا ده كان صندوق = pandora’s box ) .. حاقول له .. أنا كمان كنت مفكّر كده .. لحد ما عرفت إن في الرواية الأصلية للقصة اللي قبل 500 سنة .. كان ( بطرمان ) .. و تم تحريفه ل ( صندوق ) .. ما علينا .. حتي لو كانت القصة عن ( كيسة سودة مربوطة ) .. حتمشي برضو . … زيوس كان منبه علي البنت الجامدة أوي دي .. ماتفتحيش البطرمان يا بت .. البطرمان يفضل مقفول يا حلوة .. البطرمان إنتي مش محتاجة تفتحيه يا عروسة .. إني عندك من الإمكانيات اللي يخليكي توقعي أجدعها رجل أعمال في البلد .. سيبي البطرمان مقفول و روحي إعملي شوبنج بفلوس رجل الأعمال اللي حتوقعيه بطقم التايجر . … إلا إن .. باندورا كان عندها فضول .. زيها زي كل البشر علي مدار التاريخ .. و فتحت البطرمان .. و بمجرد ما فتحته .. طلع منه كل الشرور اللي ملت العالم ( أمراض , حروب , حزن , خوف , أصوات مغنيين المهرجانات , تكاتك , تروسيكلات سايقها عيال لسة مابلغتش … و الدوري المصري ) . . باندورا إتخضت .. و بسرعة حاولت تقفل البطرمان .. و فعلاً قفلته قبل ما آخر حاجة خاااااااااالص تطلع . و روايات كتير جداً بتقول إن آخر حاجة ماطلعتش من البطرمان و فضلت محبوسة جواه هي : الأمل . … ليه بقي أنا إفتكرت القصة دي بالذات أول ما قرأت الرسالة دي . و بالمناسبة .. أشكر كاتب الرسالة إنه بعتها ليا فأكتر من مكان ( علي ماسنجر و صراحة ) .. دي أفضل وسيلة إني أفتكر أرد بيها 🤣 . … أول مرة فحياتي درست إزاي تم حساب محيط الأرض كنت فإبتدائي تقريباً .. و قرأت الإثبات بتاع ( إيراتوثينس ) في مكتبة ساحة النصر اللي كنت باتدرّب فيها كاراتيه .. فنفس الكتاب اللي قرأت فيه تجارب حسن إبن الهيثم عن الكاميرا ( الشمعة و خرم الباب الضيق في السجن 😅 ) . و لما رجعت البيت .. ماما سمحت ليا أعمل تجربة الشمعة .. لكن ماكنش في إمكانية معلش إني أعمل تجربة إيراتوثينس 🤣 . … و علي مدار سنين حياتي بعد كده .. زادت الإثباتات و المعلومات اللي عندي اللي لها علاقة بالكواكب و أشكالها و كوكب الأرض .. و مافيش لحظة أعتقد علي مدار حياتي ( لحد منتصف عشرينياتي ) شكّيت فيها مثلاً إن يكون في حد لسّة ماقراش كتاب المخترع الصغير اللي كان في ساحة النصر اللي كنت باتدرب فيها كاراتيه 🤣 .. و يكون لسة متخيل إن الأرض مسطحة مش كروية . … في منتصف عشرينياتي .. عرفت أكتر إن في ( Flat earth society - مجتمع الناس اللي مصدقين إن الأرض مُسطحة ) .. و ده عرفته لما بدأت أتابع عن قرب كيفية إستخدام الإنترنت في تكوين و تشكيل وعي جماهيري يخدم مصالح اللي معاهم فلوس كتير . . و إزاي تم عمل ده بمهارة منقطعة النظير في أمريكا .. و حرب الوعي بين الجمهوريين و الديموقراطيين في أمريكا .. و إزاي ملايين من البشر صدّقوا خرافات زي : إن هيلاري كلينتون و توم هانكس مشتركين في عصابة بتشرب دم الأطفال و بيبيعوا أعضائهم .. و يبيعوهم هما شخصياً ك عبيد للمتعة الجنسية .. من فين ؟! .. من خلال بدروم أحد محلات البيتزا 🤣🤣🤣 و اللي تم التعارف عليه فيما بعد بإسم ( Pizza gate = فضيحة البيتزا يعني ) . … معظم الخرافات دي كانت بتنتشر بسرعة و بقوة ضخمة .. لأن كان في تُربة خصبة جداً تم إعدادها علي مدار السنين قبل كده .. و التُربة دي كان إسمها ( 4chan ) . .. إيه موضوع ( 4chan ) ده ؟! . .. بإختصار شديد جداً جداً .. ده موقع ناس كوميديين بنت نكتة 🤣 .. أو إبتدي بإنه يكون كده . الكوميديا بطبعها سلاح خطر جداً جداً جداً .. ليه ؟! لأن الكوميديا تتطلب قدر كبير جداً جداً من الذكاء و الوعي .. عشان تعرف تضحك عليها بدون ما تصدقها . . مثلاً .. في بلدنا ( مصر ) .. كم ضخم جداً من النكات كان بيتم تداوله عن الصعايدة .. لدرجة إن جزء كبير جداً من وعي الإنسان المصري صدّق إن الصعيدي فعلاً إنسان علي قدر كبير من الغباء و السذاجة . . لكن .. الحقيقة هي العكس بالكامل .. ( مش جزئياً ) .. لا .. بالكامل فعلاً .. الصعيدي كان و ما زال من أكثر الأعراق ذكاءاً و نباهة و قٌدرة علي مدار تاريخ مصر . و عشان كده .. النكتة نفعت تتقال زمان من عشرات السنين .. و كانت بتضحّك بين ناس فاهمين .. ناس فاهمين إن مستحيل حد يصدقها .. لأنها نكتة .. ناس قهراويين .. عارفين و متأكدين إنهم أقل في الذكاء و القدرة من الصعايدة .. ف قالوا عليهم النكت و الكل ضحك .. بما فيهم الصعايدة زمان .. . اللي هو بنفس الطريقة اللي أضعف زميل لك في الجيم .. بينكّت إن أقوي زميل لك في الجيم مايقدرش يشيل الدامبل ال 5 كيلو من عالأرض .. الكل بيضحك و ماحدش بيزعل .. ليه ؟! لأن الكل عارف إن اللي قال النكتة في الحقيقة هو الضعيف جداً .. و إن اللي إتقال عليه النكتة .. قادر علي إنه يشيل 50 كيلو أساساً بكل سهولة . … و لكن .. لما اللي بيسمع النكتة بقي .. يكون قليل العلم .. ضعيف العقل .. إيه اللي بيحصل ؟! بيكررها وسط ناس أجهل منه .. و تدريجياً .. الناس بتصدق .. و تؤمن إن ( زميلك .. أقوي زميل لك في الجيم ) فعلاً ضعيف .. و مهما شافوه .. و مهما شافوا من قوته و قدرته .. إلا إنهم بيفضلوا يكرروا النكتة لحد ما يصدقوها . … علي مدار التاريخ .. الكوميديا كانت و ما زالت سلاح بالخطورة دي . … بالمناسبة .. في دلائل كتير جداً عن الجزء اللي فات تقدر تبحث فيها ( فمجالات الأنثروبولوجي و علم الإجتماع ) .. عشان تفهم إزاي إن الإنسان الصعيدي فعلاً ما زال بيستمتع بأكبر قدر من التفوق الجيني علي القاهري .. لأن الصعيد كانت بمعزل عن مخمضة و إحتلال كتير حصل في شمال مصر .. بس دي قصة بوست آخر . … ف ما علينا .. الموقع اللي هو (4chan) ده بقي .. علي مدار حياته من بدايته .. و هو كان مرتع للناس الأذكياء جداً جداً .. اللي لقوا فيه مهرب من غباء الواقع الرأسمالي اللي تفحّل في أواخر التسعينيات و بدايات الألفينات .. و بدأوا يهزروا .. ينكتوا .. يقولوا نكت و قصص خرافية مستحيل حد يصدقها .. و كلها بتتقال علي سبيل ( النكتة و المزحة ) اللي بنضحك بيها علي ألم الواقع و معااناته . … و لكن .. تدريجياً .. كثير جداً من الجهلاء ضعاف العقول بدأوا يدخلوا عالموقع .. و يقروا القصص دي .. و مش بس يصدقوها و يعتنقوها .. لا .. دول يزودوا عليها كمان .. .. و النتيجة .. هي حاجات زي (QANON) .. حركة مليانة بناس بتصدق أى شيء و كل شيء طالما بيوافق السردية القصصية الظريفة اللي إعتنقوها في البداية . … و لأن العالم حالياً مكان يمتلئ بالحقراء اللي معاهم فلوس كتير أوي .. كل الأطراف السياسية اللي كانت بتتخانق .. صبّت بنزين ( فلوس يعني ) علي الناس دول عشان يعلّو صوتهم .. ليه ؟! .. لأن الناس دول كانوا زي العيال الصغيرة اللي في الحارة اللي قالعين بنطلوناتهم و قاعدين بيلعبوا بصوت عالي أوي .. و إنت و جارك بتتخانقوا .. و كل واحد فيكم عايز يستخدم العيال دول لمصلحته .. . فإنت تدفع لهم عشان يتكلموا وحش عن جارك .. و جارك يدفع لهم عشان يثبت إن إنت جمهورك هو العيال اللي مش لابسين بنطلونات دول . و جاركم التالت اللي معاه فلوس كتير و عايز يعمل محتوي من العبط ده كله علي القنوات الإخبارية .. يدفع للعيال الصغيرة دول برضو عشان يعملوا عبط أكتر .. و يتعمل محتوي أكتر .. و يجيب مشاهدات و فلوس أكتر . … فهمت ؟! … و في التربة الخصبة ( بتاعت العيال الصغيرة دول ) … ترعرع ال (Flat earth society ) .. سردية قصصية فيها إن : الأرض مسطحة في الحقيقة .. و كل ما هو حواليك من معلومات عن كروية الأرض .. ما هو إلا كذبة كبيرة هدفها إن : الحقيقة المثيرة جداً تستخبي . . و لكن .. لو فضلت ماشي شوية .. و طوّلت إستريييت زي ما إنت 🤣 .. حتلاقي حافة الأرض .. و بعدها حتلاقي أسرار الكائنات اللي عمرك ما تخيلتها .. و حاجات تانية كتيييييييير خطشيرة خطشيرة خطشيرة .. و لو دورت أكتر .. غالباً حتلاقي العمل اللي معمول لنادي الزمالك و بيخليه يخسر دايماً 🤣 .. حد مخبيه هناك في أندروير تنين مجنح بينفخ نار أهه .. … ليه بقي السردية دي إنتشرت و لها أتباع بالملايين ؟!!! .. لأن : الفضول البشري ( اللي خلّي باندورا تفتح البطرمان ) .. لا حدود له .. .. أحد أشهر التجارب اللي إتعملت في المجال ده .. جابوا أطفال و حطّوا قدامهم صندوقين .. واحد شفاف و التاني مش شفاف .. و كان واضح إن الصندوق الشفاف تحته فيه شوكولاتة .. و قالوا للأطفال إختاروا .. و الأطفال إختاروا ال : صندوق اللي مش شفاف .. اللي مايعرفوش في تحته إيه . … لسة عايز أكتب عن التركيب النفسي للفضول .. لسة عايز أكتب عن نقط تقاطع كل اللي فات ده مع الوعي الديني للناس حالياً .. لسة عايز أكتب عن ( طب نعمل إيه عشان نتحكم في فضولنا ) .. لسة عايز أكتب عن حاجات كتير أوي لها علاقة عن الموضوع ده . … .. و لكن .. في حاجة مهمة أوي .. خطشيرة أوي .. لو الناس عرفتها .. ماحدش حيعرف ينام النهاردة .. ولا بكرة .. و لا بعده 🤣 . و أنا شغّال عالحاجة السر الخطير أوي ده 🤣🤣🤣🤣.. اللي يتطلب مني إني أوقف كتابة دلوقتي … و الله أعلم حافتكر أكمّل بعدين ولا لا .. .. الله أعلم .