دماغي 🙂🥹🥲

دماغي 🙂🥹🥲 … 1- البوست اللي شرحت فيه العلاقة فذهني بين مسلسلين ( بلاريباص , كارثة طبيعية ) … كان نتيجة تحضيري ل باقي بوستات سلسلة عصر النهضة .. و اللي باركز فيها بشكل أكبر علي حياة ( جاليليو ) .. و اللي مشكلة حياته تقدر تفهمها بشكل كبير جداً من خلال نفس التساؤل ( تسعي للنجاة الفردية في مجتمع أغلبه غبي 🤣.. ولا تسعي لمساعدة المجتمع الغبي ده ؟! ) . … 2- و بعدين قررت أكتب بوست الأول عن نمو العلوم العقلية التجريبية ( رياضة , فيزيا , كيميا , أحياء , .. ) في المجتمعات عموماً علي مدار التاريخ .. و كنت حاضرب المثال في البوست ده ب نمو العلوم العقلية دي في الدول ( الصين , اليابان , كوريا الجنوبية ) خلال آخر 100 سنة .. و بعدين في الهند خلال آخر 50 سنة . . 3- لكن في بداية كتابتي للبوست ده .. وقفت عند سؤال ( مدي تأثير الشخص علي المجتمع ) .. و ده اللي فكّرني ب موضوع ( دون كيهوتي 🤣🤣🤣 = أو عشان ماحدش يتضايق .. دون كيشوت ) .. و وجه التشابه بينه و بين الشخصية اللي بيقدمها أستاذ كمال أبو رية في مسلسل ( كارثة طبيعية ) . … 4- البوست اللي كتبته ده ( بتاع دون كيهوتي ) مش الهدف منه إطلاقاً إني أعرض صورة ( الحالم المتوهم ) ك صورة شخص مسكين نتعاطف معاه .. بالعكس .. القصة الأصلية ( مش اللي تم معالجتها درامياً في أبو العلا البشري ) .. تخليك تكره جداً شخصياً ( دون كيهوتي ) .. و تشوف إنه منين ما بيروح فأى مكان .. بيكون تأثيره أغلبه سلبي . تخليك تشوفه شخصية ضعيفة .. متمسك بأوهام في سبيل تسكين أوجاعه الخاصة .. بالظبط زي أى مدمن مخدرات .. بيضرب ال( ستروكس ) عشان يعيش فأجدع أوهام إنه جامد تنين . . و علي مدار مسلسل كارثة طبيعية حتي الآن … الإنطباع السيء ده هو اللي بتحس بيه لما بتشوف شخصية ( كمال أبو رية ) . … 5- سبب إني قلت إني عايز أكتب أكتر بكتير بقي عن مؤلف القصة نفسه ( ميجيل دي سيرفانتيس ) .. ف ده لأنه عاش فأحد أكثر الفترات العجيبة في حياة أسبانيا .. أسبانيا كانت وصلت إنها إحتلّت العالم كله تقريباً ( في نهايات عصر النهضة الأوروبي ) .. و كان عندها فلوس و فضة أكتر من اللي تعرف تصرفهم حرفياً .. و المقاتلين الأسبان كانوا بيٌعتبروا أجمد مقاتلين في العالم حرفياً في الوقت ده .. و بعدين .. في خلال 150 سنة .. أسبانيا تحولت لأحد أفقر الدول .. و بريطانيا تقريباً إشترتها خٌردة بالكامل 🤣 . … 6- ميجيل دي سيرفانتيس كان راح حارب في الجزائر .. فأحد أكثر الفترات العجيبة في تاريخ الإمبراطورية الإسلامية .. و إتسجن هناك في الجزائر فترة طويلة .. و لما رجع أسبانيا تهريب عن طريق قراصنة .. رجع مفلّس .. و مات فقير و مفلّس . ف لما كتب ( دون كيهوتي ) .. كان كاتبها من منطلق فكري مشابه جداً لحياته هو نفسها . فارس إبن حضارة فرسان مأصلين .. بيحارب في جيوش غلط .. عشان هدف غلط .. في بلد غنية جداً لها تاريخ عريق جداً .. ماسكها شوية ملوك عٌبط بيفقروها كل يوم زيادة عن اليوم اللي قبله .. و الناس حواليه في كل مكان بيغنوا أغاني فروسية و شجاعة .. أثناء ما هما مطاطيين دماغهم لنظام حكم واضح جداً إنه مش عارف راسه من رجليه . . فبالتالي .. كتب رواية ( دون كيهوتي )العبيط ك شاهد علي عصر العبط 🤣 . … 7- لكن .. ده مخليني عايز أشرح بقي جملة ( إن بريطانيا إشترت أسبانيا خٌردة ) .. و أبدأ في كتابة سلسلة بوستات قد تكون من أضخم و أعقد ما كتبت حتي الآن .. و هي سلسلة ( شركة الهند الشرقية المحدودة - East India Company ) 😮😮😮😮 . . لأن .. بإختصار شديد فحت أوي جداً خالص .. الشركة دي بالذات .. هي أحد أكبر أسباب إن العالم بتاعنا ( الغلط ) بمنظره الحالي ( الغلط ) .. غلط 🤣. . يعني .. الهند كانت إمبراطورية غاية في البرنسسة 😇 الصين كانت إمبراطورية غاية في الأستذة العالم الإسلامي كان إمبراطورية غاية في البغددة . أوروبا ذات نفسها كانت لسة حالاً طالعة من دُش عصر نهضة و مسشورين شعرهم و بيحطوا برفيوم ريحته نيوتن و لايبنتز و حاجة جميلة جداً . . و أسبانيا و البرتغال كانوا عندهم أساطيل بحرية و قراصنة .. و بيبلطجوا علي باقي العالم فأفريقيا و أمريكا الشمالية و اللاتينية .. و شغالين في تجارة عبيد ( أغلبهم مسلمين بالمناسبة ) 🤬 . . و بعدين .. إذ فجأة .. تطلع الملكة إليزابيث الأولي ف بريطانيا .. و تصدر قرار يقنن وضع شركة ( ستارت أب 🤣 ) بتتاجر في العطارة و التوابل .. . و خلال 100 سنة تقريباً .. الشركة دي ( اللي هي شركة الهند الشرقية ) … تحتل العالم ( حرفياً ) مش مجازياً . . إزاي ؟! و ليه ؟! … 8- و النتيجة إذن ؟! قٌدّامي 47 تاب مٌختلفين .. كل واحد فيهم كاتب فيه شوية سطور من بوست فأحد المواضيع دي أو أحد المواضيع المٌتفرعة منها .. و مش مكمله .. لأني باكتشف إني عايز أشرح حاجة مبنية عليها الأول 🤣🤣🤣 .. … يعني مثلاً .. الراجل الطيب ( يوهانيس جوتينبرج ) .. راجل طيب مات سنة 1468 … كان إخترع الطابعة .. و بس كده 😅 . . عشان تفهم بقي تأثير الكلمة دي ( إختراع الطابعة ) .. إتخيل أرض زراعية جرداء مثلاً .. فيها مسارات و تفرعات كتير جداً .. و بعدين إفتح فيها ميّة .. و شوف المياه بتمشي إزاي .. و بتقف فين .. و بتؤدّي لنمو زرع فين ؟! أو بتقتل زرع من نوع تاني فين ؟! . ده بالظبط اللي حصل مع إختراع الطابعة .. العلوم البشرية ( المياه ) .. إتحركت من منابع معينة في الأرض .. في إتجاه أماكن أخري .. و أدت لنمو حضارات .. و إنهيار حضارات تانية خالص . . و دلوقتي .. سنة 2025 .. نفس الإختلاف ده في توزيع الموارد العقلية ( العلوم البشرية ) بيتعرض لحركة مشابهة بسبب وجود أدوات تعميم القدرة التنفيذية ( ال AI ) .. . ف يا تري .. يا هل تري .. مين رايح فين إمتي و ليه و إزاي ؟! … و الله أعلم .