الويك إند .. يعني هلا بالخميس 😅.. سنة 1497 ..

الويك إند .. يعني هلا بالخميس 😅.. سنة 1497 .. يوم 2 فبراير بالظبط .. كان مُختلف شوية .. ف أثناء ما كان صُحابك في إسكندرية بيرتبوا لحجز كورة و بيفشلوا كالمعتاد لأنهم بقوا عواجيز كسلانين 🤬.. كانت الناحية التانية من البحر المتوسط .. و في فلورنس بالأخص .. عندهم إيفنت مختلف .. كان البلد كلها بيجمعوا حطب .. و فحم .. و أى حاجة تشتعل أو تساعد عالإشتعال 😅. .. إطلاقاً الموضوع ماكنش حفلة باربيكيو ضخمة .. و لكن .. أحد أشهر حرائق الألف سنة اللي فاتت .. حريقة ضخمة .. تم إلقاء فيها كم ضخم جداً من الأعمال الأدبية .. و الفنية .. و الثقافية .. و الحضارية .. و اللوح .. و الكُتب .. و التماثيل .. و السيديهات و الديفيديهات و شرايط الفيديو .. اللي كانت موجودة في فلورنس في الوقت ده .. و فوق الجبل الضخم من الحاجات دي كلها .. كان في تمثال علي هيئة معزة و لها قرنين .. و التمثال ده المفروض إنه بيرمز لل : شيطان . .. و قٌدام الحريقة الضخمة دي .. كان في راجل لابس إسود فأسود .. و شكله مُخيف .. و قاعد بيسقف و فرحان .. و هو بيهذي بتعاويذ و أدعية .. .. الراجل ده كان إسمه : سافونارولّا .. جيرولامو سافونارولّا .. .. و الحريقة دي إسمها : ( حريقة الحاجات التافهة الرخيصة 🤣= Bonfire of the vanities ) . و زي ما عوكل صرخ في الفيلم الصرخة الشهيرة ( أخوكي بياكل صٌحابه 🤣🤣🤣 ) .. باقي العالم كان بيصرخ في الوقت ده : ( فلورنس .. بتحرق حضارتها ) . … إيه الموضوع ؟! ده يبقي البوست السابع من سلسلة ( عصر النهضة بالحلمنتيشي ) .. . لو مش متابع حتي الآن .. ف في الحلقات .. أقصد الأجزاء السابقة حصل التالي :

• البوست الأولاني : باقول فيه ليه أساساً بدأت الكتابة عن الجزء ده من التاريخ .

• البوست التاني : لخصت بشكل مٌخل للغاية .. و بالحلمنتيشي جداً .. قصة تاجر البندقية .. أحد أهم مسرحيات شكسبير .. و اللي بتوضح خطوط عريضة لمفاهيم زي ( القانون , الديون و الربا , وضع اليهود ) في فلورنس في الزمن ده .

• البوست التالت : هريت فيه شوية بالتفصيل عن الربا .. و تاريخ البنوك في أوروبا … و بالأخص عيلة ( ميديتشي ) .. اللي تعتبر أحد أهم عائلات عصر النهضة .

• البوست الرابع و الخامس : بدأت فيهم حكاية عيلة ميديتشي من أول إسم مشهور فيهم .. الحاج الكبير ( جيوفاني ) .. و مشينا بتسلسل سريع للغاية .. مٌلخص للغاية .. لحد ما وصلنا ل مرحلة ( لورينزو الجامد فحت 🤣 = Lorenzo the magnificent ) .. و إنه كان فاتح في بيته حاجة زي حضانة بعد الضهر كده بيربي فيها المواهب 🤣 .. و من المواهب دي كان في أسامي مشهورة جداً .. زي ( دافنشي , مايكل أنجلو , … و غيرهم كتير أوي ) .

• البوست السادس : خدت فيه فاصل سريع إتكلمت فيه عن علاقة التلميذ بأستاذه في الوقت ده .. عشان يتفهم فيما يلي الإبداع كان بيتنقل إزاي من فنان .. لتلميذه . … عشان نكمّل بقي تاريخ عيلة ميديتشي .. و نعرف ب شكل أكثر وضوح .. هو ( لورينزو الجامد زوحليقة🤣 = Lorenzo the magnificent ) .. إتسمي ( جامد زوحليقة🤣 = Magnificent ) ليه .. … لازم نعمل ( زوووووم أوت ) كبير شويتين تلاتة أربعة .. كإنك في خرائط جوجل مثلاً .. و نشوف العالم المُحيط ب مدينة ( فلورنس ) .. و جيرانها اللي هما باقي محافظات إيطاليا حالياً .. و بعدين نشوف فرنسا و ألمانيا و باقي دول دوري أبطال أوروبا 😅 .. و بعدين نزوووم أوت أكتر .. و نشوف العالم الإسلامي في الفترة دي .. قبل ما أحمد عبد العزيز ( قٌطز ) .. يلاقي جلنار .. و قبل ما الظاهر بيبرس يغزّه 😅. … لو عملت كل ده .. حتفهم بشكل كبير جداً حقيقة الوضع في فلورنس بالظبط عامل إزاي .. … و إزاي .. إن بعد 5 سنين بس .. من موت ( لورينزو الجامد زوحليقة ) سنة 1492 .. حصلت ( حريقة الحاجات التافهة ) دي !!! .. لورينزو .. اللي خلّي فلورنس هي المكان اللي تتمني تروحه عشان تشوف الفنون و التماثيل و الثقافة و الحضارة .. لورينزو … اللي يوم جوازه البلد كلها طلعت ترقص .. لورينزو … اللي صرف علي فلورنس ملايين .. و كتير كانوا بيعتبروه أبطال .. و يغنوا له ( إخترناك إخترناك 🤣 ) .. *** الجزء اللي فات ده حقيقي بالمناسبة .. لورينزو كان من أوائل الناس اللي ظهر في عهدهم موضوع الأوبريت ( operetta ) .. بس علي صغنن شوية … عشان تفهم إزاي الشعب الفلورنسي الأصيل عمل كده .. و وصل بيهم الأمر إنهم تقريباً نفوا عيال لورينزو ( بييرو , جيوفاني , جوليانو ) من البلد .. .. لازم تفهم إن الشعب الفلورنسي الأصيل … مٌتدين بطبعه 🤣🤣 و إن الراجل اللي كان ماسك الولاعة فأول البوست ( جيرولامو سافونارولا ) .. ده كان رجل دين متشدد جداً .. جداً … جداً جداً .. .. و كان زعلان للغاية من :

• إن رسومات كتير أوي من اللي إترسمت في عهد لورينزو .. كانت أغلبها نودز 🤣 … بل إن جزء كبير كان +18 ..
• تماثيل كتير من اللي إتنحتت برضو .. كانت بتتنحت من غير هدوم ولامؤاخذة .. يعني نودز 3d 🤣
• و إن عدد محترم من أشهر فنانين عصر النهضة ده ( دوناتيللو , مايكل أنجلو , دافنشي ذات نفسه … و حتي لورينزو الجامد زوحليقة ) كانوا ولامؤاخذة ( رينبو 😅 ) … شواذ يعني .. … غير تفاصيل تانية كتيييييييييييييييييير بقي لها علاقة ب الكم الضخم من الفساد المادي و الإقتصادي و السياسي و الأخلاقي اللي كان متغلغل لحد أعلي كراسي الحكم أيامها .. الحكم السياسي ( الملوك و الأمراء ) .. . و الحكم الديني ( يعني بابا الكنيسة الكاثوليكية ) . … هنا لازم تسأل : طيب .. إزاي راجل واحد زي سافونارولّا يقدر يعمل كل ده ؟! .. و يوصل إنه مش بس يجبر مدينة فلورنس بالكامل إنها تحرق جزء ضخم من تراثها ؟! .. .. و لكن .. ده لما بابا الكنيسة الكاثوليكي ذات نفسه .. بعت له .. و قال له ( بطّل تشدد يا حاج .. و حنديلك من عندنا طاقية كاردينال حمرا ) .. سافونارولّا تقريباً عمل صوت من مناخيره 🤣🤣 .. و قال بأعلي صوت ” حمراااااااااااااااااااااا … ماشي .. انا عايز طاقية حمرا .. بس مش عشان أبقي كاردينال بيها .. و لكن عشان حتبقي حمرا بالدم و من غير ولامؤاخذة 🤣🤣” .. سافونارولّا كان مقطّع البطاقة 🤣 … عشان تفهم كل ده … لازم تسأل السؤال المهم أوي : ” مين بابا ياض ؟! ” 🤣🤣🤣 .. مين هو بابا الكنيسة الكاثوليكية ؟! ليه أساساً إسمها كنيسة كاثوليكية ؟! .. و هي الكنائس التانية ( الأورثوذوكسية .. و البروتيستانتينية .. و غيرهم .. طلعوا إزاي و إمتي ؟! .. و ليه ؟! ) . .. و إيه هو نوع القوة السياسية و الإقتصادية و العسكرية .. اللي كانت عند الكنيسة الكاثوليكية في الوقت ده ؟! .. و ليه ؟! .. … علي مدار فترة ال300 سنة تقريباً المشهورين بتوع عصر النهضة .. ال كنيسة الكاثوليكية .. بتٌعتبر أحد أهم أبطال القصة .. بل .. إن كثير من المؤرخين اللي إتكلموا عن الفترة دي … بيستنتجوا إن قصة عيلة ميديتشي بالكامل .. كانت إنهم يوصلوا للكرسي ده ( كرسي البابا ) .. و ده بيتم فعلاً .. و أكتر من ( Pope ) بيتم إختياره من عيلة ميديتشي .. و بكده .. بيكونوا حققوا أحد أهم أهدافهم العابرة للعصور و القرون … و هي إنهم يطلعوا الدرجة الأعلي في السلم الإجتماعي . … لو تفتكر في أول أو تاني بوست .. لما شرحت إن ( ولامؤاخذة اللي إسمه .. إحم .. كوزيمو ) كان وصل و مسك فلورنس تقريباً ك حاكم .. كان الكل عارف إنه حاكم عٌرفي .. لكن مش شرعي .. و السبب .. هو إن عيلته ( ميديتشي ) كانت بتٌعتبر عيلة درجة تانية في السلم الإجتماعي .. . و قانون فلورنس .. و إيطاليا و أوروبا عامة في الوقت ده .. كان فيه إنك ترتكب جريمة قتل .. أهون عند الناس و القانون من إنك ترتكب جريمة : إنك تتصرف ك طبقة إجتماعية أعلي من طبقتك . … يعني .. كوسيمو نفسه .. لما إتقبض عليه و حبسوه فأعلي أوضة في البرج .. و قرروا إنهم يعدموه .. تهمته الأساسية كانت : ( acting above his class - إنه بيتصرف ك طبقة أعلي من طبقته الإجتماعية ) .. … و الطبقات الإجتماعية دي بالمناسبة .. ما زالت موجودة حتي يومنا هذا .. و بالرغم من إن قوانين دول كتييييييييييييييييير تبدو إنها مش بتجرّم إنك تتصرف ك طبقة أعلي من طبقتك … إلا إن الحقيقة هو إنها جريمة .. و بتتعاقب عليها .. و بالقانون . … يعني .. لما يبقي كسر السرعة القانونية جريمة .. و لكن عقوبتها غرامة مادية .. إذن هي مش جريمة بالنسبة للكل .. و لكن جريمة بالنسبة لغير القادر علي الدفع فقط .. . لما يبقي لبس بطريقة معينة .. تصرف بطريقة معينة .. أو حتي تناول مواد مٌخدرة مثلاً … كلها جرائم عقوبتها غرامات مادية .. إذن .. هي مش جراائم علي الجميع .. و لكنها كلها تصرفات ممنوعة فقط علي غير القادرين علي الدفع . … دي طبقية مادية .. و لكن .. بعد جيل أو جيلين .. أى طبقية مادية … بتتحول بشكل مباشر لطبقية إجتماعية .. … و أحد الطرق إنك تمتلك الرخصة اللي تخليك تعلّي درجتك الإجتماعية .. و إسمك و إسم عيلتك يبقي من الأسامي اللي لها أصل و تاريخ .. هو إنه يتكتب ضمن أسامي ال ( باباهات ) بتوع الكنيسة الكاثوليكية . و لكنك عشان تبقي مٌرشح أساساً .. لازم تبقي كاردينال .. و عشان تفهم يعني إيه كاردينال ؟! .. و أول ( بابا ) كان مين ؟! .. و باقي الإجابات علي الأسئلة الكتير في البوست الضخم ده .. إذن حتضطر تنتظر بوست الجزء الثامن إن شاء الله .. … و الله أعلم .