= صباح الخير يا هندسة

= صباح الخير يا هندسة .

• صباح العسل .. = معاك أستاذ ( ***** ) , رئيس مجلس إدارة مجموعة شركات ( ***** ) , و العضو المنتدب لمجموعة شركات ( **** ) , و عضو مجلس إدارة نادي ال( **** ) , و مقسّط عربية بانزل أشتغل عليها أوبر بعد الضهر , و مشارك في كشك سجاير علي أول شارعنا .
• 🙂🙂 … معاك .. أقدر أساعدك إزاي ؟! . = الواد إبني عنده 8 سنين .. و حاسس فيه بوادر عبقرية .. و غالباً حيطلع حاجة كبيرة أوي .. و عايز أعرف أخليه ياخد كورسات إيه عشان أنمّي فيه العبقرية دي ؟! … اللي فات ده تقريباً .. تلخيص ل رٌبع الرسايل اللي عندي في الأنبوكس و الothers 😅 علي مدار 10 سنين تقريباً .. و علي مدار ال 10 سنين دول .. إجابتي كانت دايماً بتبتدي ب : تنهيدة طويلة أوي … هممممممممممممممممممم … طيب .. إنت عندك وقت و طاقة قد إيه تسمع ؟! . … … ده هو البوست السادس في سلسلة ( عصر النهضة بالحلمنتيشي ) .. البوستات السابقة ( من 1 ل 5 ) حتلاقيهم قبله مباشرة … .. في البوست اللي فات .. كنا وصلنا إن الحاج أبو ليوناردو .. خد الواد ليوناردو الصغير و ركب أول ميكروباص طالع من ( فينشي ) .. و نزل بندر ( فلورنس ) عشان يودّيه يعيش هناك . و زي ما شرحت .. لأن الحاج أبو ليوناردو ( بييرو ) ماكنش كاتب علي أم ليوناردو ( كاترينا ) 🤣 .. ف ليوناردو بقي إسمه ( ليوناردو ال فنشي ) .. نسبة لبلده يعني .. مش لأبوه . ما علينا .. بدون الدخول في أعراض ( لأن غالباً حندخل فيها لاحقاً 🤣 ) .. . ليوناردو .. عشان هو كان إبن حرام 🤣 .. ماكنش ينفع يشتغل شغلانة أبوه الشريفة العفيفة ( أبوه كان موظف في الشهر العقاري - Notary ) .. . فبالتالي .. ماكنش ينفع برضو يتعلم تعليم حكومي ( يعني حضانة و مدارس .. حاجات زي ألف أرنب .. ب بطة 🤣 ) .. ف طالما مش حتتعلم و تدخل مدارس .. يبقي تمسك صنعة .. و زي ما شرحت في البوست اللي فات … أى حد في الوقت ده .. كان يتمني إن إبنه يكون بيعرف يرسم .. ( زي ما دلوقتي .. أى حد يتمني إن إبنه يكون بيعرف يلعب كورة 🙂 ) . … و فعلاً .. ليوناردو الصغنن بيروح فلورنس مع أبوه .. و بيدخل ( ورشة فيروكيو ) .. … إيه بقي ( ورشة فيروكيو - Verrocchio’s bottega ) دي ؟! … زمااااااااااااااااااااااااااااااااااااااااااااان .. ( و لو إنت متابعني من سنين .. قد تكون قرأت بوستات كتير شرحت فيها تفصيلياً عن الموضوع ده قبل كده ) .. نظام التعليم كان مختلف عن دلوقتي . . نظام التعليم كان عبارة عن : ( معلّم - Master ) .. و ( تلميذ - disciple ) .. طب إيه الفرق ؟! .. ما دلوقتي برضو في ( معلم و تلميذ ) .. .. لاااااااااااا .. فرق كبير جداً جداً .. دلوقتي .. ال ( معلّم إسمه - Teacher ) .. و التلميذ إسمه ( Student ) .. .. برضو مش فاهم .. إيه الفرق ؟!! . .. الفرق هو إن ال ( Master ) ده ماكنش عبارة عن مُدرس ل مادة واحدة .. أو مهارة واحدة .. و لكن كان ( كل حاجة في حياة ال تلميذ ) .. كان بابا .. و ماما .. و أنور وجدي . . و التلميذ .. ماكنش مجرد عيّل ب مريلة بيروح لمدة كام ساعة يرازي في أستاذه و يكتب وراه في كراسة و خلاص .. . و لكن كان ( ملازم له = disciple ) .. اللي هي جه منها كلمة ( إلتزام = discipline ) .. . يعني .. كان بياكل مع مٌعلّمه .. يشرب معاه .. يخدمه .. يغسل له هدومه .. يبري له أقلامه .. يكنس له أوضته و ورشته … يعيش معاه حياته بالكامل مٌلازم له .. مٌلازم له بالكامل .. في حياته … و شغله . … العبد أو الخادم .. كان بيعمل كل ده في البيت فقط .. لكن كان ممنوع يدخل الشغل .. أو حتي يتواجد في الورشة احياناً .. كان ممنوع يشوف المٌعلّم في شغله و يعرف أسرار الصنعة .. . لكن ال ( تلميذ الملازم ) .. كان بيتواجد في البيت و الورشة .. تواجد كاااااااااامل .. … ليه بقي ؟! … لأن .. من زمااااااااااااااااااااااااااااااان … من بداية تاريخ تواجد الإنسان علي الأرض .. و بداية إن الإنسان يفكر و يستخدم عقله .. و الإنسان فهم .. إن الأهم من النتيجة .. هو السبب المٌسبب للنتيجة دي . … يعني .. يعني إيه اللي خلّي (محمد صلاح) عنده المينتاليتي 🤣 اللي تخليه يستحمل قرف الرياضة في مصر .. و الواسطة … و المحسوبية .. و الإحباطات .. و يفضل مٌلتزم ب روتين و تمرين و ينضبط … لحد ما تيجي له فرصة السفر لأوروبا ؟! .. يعني .. إيه اللي خلّي ( محمد صلاح ) .. بمجرد وصوله لأوروبا و بداية نجاحه هناك بأى صورة .. إنه ماخدش أول شيك قبضه من أول نادي .. و طلع يشقط بنات من الخمّارة اللي جنب النادي ؟!! . و لكن إلتزم .. و إتمرّن .. و إنضبط .. ؟! … يعني .. إيه اللي خلّي ( محمد صلاح ) .. يستحمل نفخ المٌشجعين المصريين له .. و رغبتهم في تأليهه .. و مايتنفخش .. و مايتغرّش .. و فضل يتمرّن .. و يلتزم .. و ماطلعش في فيديوهات سوشيال ميديا ياخد ياخد شاور إعجاب تحت التلييف ده كله . ؟! … كل النتائج اللي إتكلمت عنها فوق دي ( فمثال محمد صلاح ) .. و أمثلة تانية كتييييييييير ل ( masters - أساتذة ) في مجالاتهم علي مدار التاريخ الحديث و القديم . . مهما حاولت إنك ( تدرّسها ) .. و ( تشرّبها ) .. و ( تلخصّها ) .. و ( تختصرها ) .. ل طلبة أو تلاميذ .. نسبة الفشل فيهم بتكون عالية جداً .. جداً .. . لأنك تجاهلت : السبب . … إيه هو بقي السبب ده ؟! .. . السبب هو : الحياة كلها .. أو تفصيلة صغيرة في روتين الحياة اليومي للأستاذ مثلاً .. بتؤدي إنه يبقي رائع في مجاله ..
  و فأحيان كتير جداً .. بيكون ال ( Master - أستاذ ) نفسه .. مايعرفش يحدد بالظبط إيه في حياته بيؤدي إنه بيفكر بشكل معين .. أو عنده مهارة معينة .. و بالتالي .. بيكون ( مٌدرّس ) فاشل .. هو رائع في المهارة أو المجال بتاعه .. و لكنه ماعندوش القدرة التحليلية اللي تساعده يفهم الأسباب اللي بياخد بيها في حياته .. ب تؤدي بيه للنتيجة الرائعة دي . . و ( معلّمين - Masters ) كتير جداً .. علي مدار التاريخ .. تلامذتهم هما اللي قدروا يحللوا حياتهم و الأسباب اللي أدّت إنهم يبقوا رائعين بالمنظر ده .. . و بتكون نتيجة حاجة زي كده .. إن في أحيان كتير .. شهرة ال( تلميذ ) بتفوق شهرة ال( معلّم ) بتاعه .. … و مش معني كلامي إطلااااااااقاً إن بالتالي لازم التلميذ ياخد حياة أستاذه ك نسخة طبق الأصل .. و يحاول ينسخ الأسباب اللي فحياته عشان يوصل لنفس النتائج .. بالعكس .. .. اللي الطالب بيتعلمه .. هو : إزاي يستخدم أسبابه الخاصة .. تفاصيل حياته الخاصة .. ذكرياته و مشاعره هو نفسه .. عشان : يٌبدع . … … البيئة بتاعت ال ( مدرسة ) بصورتها الحالية .. بيئة لا تؤدي للإبداع إطلااااااااااااااااااااااااااقاً .. البيئة اللي فيها تشتت مستمر بين عدد كبير من المٌدرسين .. البيئة اللي فيها تقييم مستمر ب معيار مٌختل زي معيار الدرجات .. البيئة اللي مافيش فيها أى علاقة مٌباشرة بين الطالب و الأستاذ .. .. دي بيئة قاتلة بكل المقاييس لأى نوع من أنواع الإبداع البنّاء ( يعني الإبداع القائم علي تعلّم مهارة من أستاذ ) . و أى إبداع بينتج في بيئة ال ( مدرسة ) .. بيبقي زي الزهرة اللي بتنبت وسط أسفلت .. أو للتعبير الأدق ( رغماً عن الأسفلت ) . … طيب .. هل معني الكلام ده .. هو إن الأب اللي في أول البوست يدور علي ورشة معلّم .. و يودّي إبنه يعيش هناك ؟! . .. للأسف .. عالمنا الحالي ( عالم المدينة ).. صعب فيه جداً النصيحة ب حاجة زي كده .. عالم المدينة اللي هو عبارة عن علب كبريت صغيرة ( شٌقق يعني ) .. جنب بعضها .. و كل شقة مايعرفش حاجة إطلاقاً عن الشقة اللي جنبه .. و كل طفل بيتربّي في مساحة أمتار بسيطة جداً .. و أى حرية يأمل في الحصول عليها .. بتكون لمدة بضع ساعات أسبوعياً في النادي .. . ده عالم ( مٌختل ) .. و ماينفعش فيه الأب يدور علي صورة تاريخية ل ورشة زي ورشة ( فيروكيو ) .. … … طب إيه الحل ؟! الإبن اللي عنده بوادر عبقرية ده .. و اللي ممكن يكبر و يبقي الناس بتقول عليه ( حمادة الفنشي 🤣 .. أو حمادة دافنشي ) .. يروح فين ؟! … … ببساطة … زماااااااااااااان .. كان أولاد الملوك و الناس الأغنيا جداً برضو .. ماينفعش يروحوا يعيشوا في الورشة .. كان الأهالي .. بيجيبوا ( المٌدرّس - المٌعلّم ) هو اللي يعيش وسطهم و في القصر .. . و من أكبر الأمثلة ( اللي حنشرحها في القصة ) .. هو جاليليو جاليليي … الراجل ده .. كان هو المٌعلّم اللي عايش في القصر عشان يلازم الأولاد و يعلمهم . … و قبل ما ألاقي الرسائل في ال( Others ) فيها ناس بتدعوني أروح أعيش معاهم 🤣🤣 .. نصيحتي هي : إنت ( يا أب ) .. و ( يا أم ) .. اللي لازم تكون المٌعلّم بتاع إبنك . إنت اللي لازم تتعلم تبدع .. إنت اللي لازم تتعلم يعني إيه خيال .. يعني إيه فضول .. يعني إيه حرية .. … لأن : المٌلازمة … أحد أهم شروط التلمذة . … و الله أعلم … . البوست ده ماكنش بيحكي .. قد ما كان بيشرح مبادئ أساسية .. كانت هي اللي مٌحيطة ب أعضاء ورشة فيروكيو .. و اللي في البوست الجاي .. حنكمّل قصصهم إن شاء الله .