10 نقط عن ماظو ال ADHD . ( في وجهة

10 نقط عن ماظو ال ADHD . ( في وجهة نظري ) . … بما إني محتاج أشرح شيء منتشر بشدة .. و للأسف مافيش كمية معلومات كفاية عنه .. فحاضطر أستخدم مثال ( مسلسل اللعبة , و شخصية ماظو ) كأداة تساعدني في الشرح . لأن شئنا أم أبينا .. المسلسل منتشر .. و ناس كتير شافته و بتشوفه .. و أصبح لغة سائدة بين المجتمع حالياً . … أحد أكثر التشبيهات قرباً لشخص بيعاني من ( ADHD ) في الثقافة المحلية المنتشرة حالياً .. هي شخصية (ماظو ) في مسلسل اللعبة .

1- إنسان يمتلك كم ضخم من المهارات .. اللي لو وجهه في إتجاه واحد ( أى إتجاه ) حيكون من أفضل 1% في الإتجاه ده .

2- لما بيحط حاجة في دماغه .. أو للتعبير بشكل أدق ( لما حاجة معينة بتتحط في دماغه ) مابيهمدش غير لما يجيب آخرها . و سبب إني إستخدمت التعبير التاني ده .. هو إن اللي بيعاني من ( ADHD) بياخد تمرين و وقت طويل جداً .. لحد ما يتعلم يتحكم ( يحط إيه في دماغه و مايحطش إيه في دماغه ) .

3- في الغالب معظم اللي بيعانوا من ( ADHD) مدمنين ألعاب بشكل عام ( فيديو جيمز , قمار , كورة , … ) و السبب في ده .. هو إن في طفولتهم لما شافوا اللعب لأول مرة .. إكتشفوا إن عقلهم بيدمن الإثارة الناتجة عن المنافسة .. و إحساس التحفيز الناتج إنهم بيهزموا حد و ينتصروا عليه .. لكن لو ماكنش اللعب بشكل عام جزء من طفولتهم .. غالباً بيكونوا أدمنوا حاجة تانية تديلهم الإحساس ده ( زي في حالة ماظو .. إبنه .. اللي أدمن العلم و المذاكرة ) .

4- أيون .. إبن ماظو ( كريم العاق ) .. هو كمان أغلب الظن بيعاني من (ADHD) .. لأن بالنسبة الأضخم دي حاجة وراثية .. و عن طريق الأب مش الأم . و لكن إبنه مدمن مذاكرة و علم ( زيي ) .. مش لعب .. و ده بيحصل كتير .. إن الإبن بيطلع دايماً مختلف عن أبوه في إتجاه الإدمان بتاعه .. ك نوع من أنواع البحث عن شخصيته و ذاتيته .

5- تفسير أكتر للنقطة اللي فاتت : معظم الآباء اللي عندهم ( ADHD) بيكونوا آباء مثاليين فأول 5 سنين من حياة الطفل .. لأنهم بيشاركوا الطفل لعبه و عالمه و بيكونوا متغلغلين بشكل ضخم في تنشئته .. بعد كده .. خلال السنين من 5 ل 10 تقريباً .. بتبدأ رغبة الطفل في تكوين شخصيته و ذاتيته و إستقلاليته تتكون .. و مع ده بيحاول إنه يفوز علي أبوه .. و يهزمه .. و يلاقي أى أمل في إنه ينافسه أساساً . و لكن الأب اللي عنده (ADHD) و مش فاهم كتير عن التربية .. بيفضل يستمر يفوز علي إبنه . و ماقصدش هنا يفوز في لعبة .. لا .. لو شيخ و رجل عالم في الدين مثلاً .. إبنه حيفضل يشوف إنه مهما جود قرآن صح .. أبوه حيفضل يصحح له و يطلع له أخطاء . مهما حفظ من أحاديث .. أبوه حيفضل حافظ أكتر منه .. . و نفس الشيء في الألعاب .. فبتكون النتيجة إن الإبن بيبدأ يدور علي مجال مختلف بالكامل و بعيد عن مجال أبوه عشان يحقق فيه إستقلاليته و ذاتيته … و بتلاقي كتير إن : من ضهر العالم فاسد .. و من ضهر الفاسد عالم . . طبعاً دي مش قاعدة عامة .. و ليها إستثناءات كتير .. و لكنها متكررة بنسبة ضخمة .. و خصوصاً لو كانوا طفلين مثلاً ( أخ كبير و أخ صغير ) .. بتشوف التضاد ده بشكل ضخم بين الطفلين .. . طبع الطفل عموماً .. إنه لما بييأس فعلاً .. مش بيحاول يفهم .. و لكن بيهرب لمجال مختلف بالكامل .. و بيكون شخصيته هناك . . 6- ال ADHD مش إضطراب سلوكي .. تلاتة بالله العظيم مش إضطراب سلوكي .. يعني مش ( شقاوة ) .. مش ( قلة أدب ) .. مش ( عند ) . ال ADHD إضطراب عضوي .. يعني المخ متركب بشكل مختلف .. كيمياء المخ مختلفة عن الإنسان العادي . الإنسان العادي بيبقي إسمه (neurotypical ) و الإنسان اللي عنده (ADHD) بيبقي إسمه (Neurodivergent ) . ( نيورودايفرجنت ) دي مظلة ضخمة يعني تركيب مخه مختلف .. تحتها عدد كبير جداً من الإضطرابات المختلفة .. زي علي سبيل المثال :

• التوحد autism
• فرط الحركة و تشتت الإنتباه ADHD
• و غيرهم من الإختلافات . . 7- ده مش مرض .. يعني اللي عنده الموضوع ده ماسموش مريض .. إسمه ( مختلف ) .. بنفس الطريقة اللي مش بنقول فيها علي القصير مريض بالقصر .. لا .. هو ربنا خلقه كده .. قصير . مهما حاول إنه يطول و يلعب عقله .. مستحيل .. جيناته و تركيبه و حكمة ربنا في خلقه إنه قصير . . 8- العالم الحالي بتاعنا ( بتاع المدارس و الثانوي العام - و الشغل من 8 الصبح ل 2 الضهر - و الإقساط و الجمعيات - و الشهادات و السيفيهات - .. و كل الهري ده ) عالم مؤلم جداً جداً جداً للشخص اللي بيعاني من ال ADHD . العالم الحالي بتاعنا ده .. عالم مصمم لل ( قولبة ) يعني للقوالب .. يعني لو إنت شبه اللي حواليك .. حتعيش مستريح و برنس .. حتلاقي مكان علي مقاسك في أوتوبيس .. حتلاقي تقديراتك في الدراسة مستقرة .. حتلاقي شغل يناسب روتين نومك و صحيانك .. و هكذا .. . لكن لو إنت مختلف .. طويل زيادة عن اللزوم مثلاً .. كراسي الأوتوبيسات بالنسبة لك حتكون جحيم . مهما حاولت تذاكر .. حتنسي ( لأنك ماعندكش ذاكرة قصيرة = short memory تنفع للمذاكرة أساساً ) . مهما حاولت تظبط مواعيد نومك … مستحيل .. من رابع المستحيلات .. دايماً نومك حيبقي بايظ . ببساطة .. إنت إنسان مش زي الباقيين .. ربنا خلقك مختلف .. و دي مش غلطتك . . 9- ال (short memory = الذاكرة القصيرة ) و دي أكبر لعناتي الشخصية مع ال ADHD . يعني مستحيل تفتكر أرقام تيليفونات .. بل مستحيل تفتكر ال OTP اللي بيجيلك علي الموبايل و إنت بتدخل باسوورد مثلاً . حتعاني في إنك تفتكر أسامي معارفك .. و أشكالهم .. . حتعاني فإنك تفتكر أى مواعيد مهمة .. و حتضيع علي نفسك مواعيد طيارات و قطارات و إمتحانات مهمة ( أنا شخصياً عملت كل ده ) . . عقلك مافيهوش الجزء اللي يخليك تفتكر الحاجات دي.. و مهما حاولت .. مش حتقدر تكونه .. لازم تعرف تستخدم أدوات تحل محله . . 10 - الشخص اللي بيعاني من adhd لو ربنا كرمه بشخص جنبه يفضل ملازم ليه و يساعده و ينظم له الخلل في حياته .. غالباً حتبقي تنين مجنح و تلاقي الحياة سهلة جداً بالنسبة لك و حتحقق نجاحات ضخمة .. بس اللي معاك حيبقي بيعاني إنه طول الوقت محتاج يفكرك بكل حاجة . . ربنا يبارك لها و يحفظها أمي .. كانت هي الشخص ده طول حياتي لحد مرحلة الكلية . في الكلية ماقدرتش تواكب مواعيد و روتين حياتي .. و سابتني أعتمد علي نفسي … ضعت أكاديمياً ( تقدر تقرا البوست المثبت عندي لو عايز تعرف أكتر ) . حالياً .. ربنا يبارك لها زوجتي .. من غيرها أضيع حرفياً … كفاية كده دلوقتي و ممكن أكمل فبوست تاني .. و إلا البوست ده حيكون 100 نقطة علي الأقل .

** ملحوظة أولي : حاقعد شوية النهاردة كمان ساعة أو إتنين مثلاً إن شاء الله أرد علي معظم الكومنتات قدر إستطاعتي علي البوست ده .. و البوست اللي قبله اللي إنتشر بشكل فيروسي .

** ملحوظة تانية : حاضر .. حاشرح إستخدامي للزعفران في قهوتي .. و فوائده لل ADHD إن شاء الله .